彭福公園&鐵路博物館

long weekend又好天氣，當然要到戶外散心。momo係屋企食完早餐就出發去彭福公園o既大草地玩，不過十時多到步，陽光已經非常猛烈，玩了接近一小時都速速離開食午飯去。呢到好適合帶狗隻同行，所以下次要叫埋momo姑媽姑丈同小吉樂樂黎玩！

係沙田食完飯，順便去埋鐵路博物館。逢車必愛o既囝囝，當然係非常興奮，不停係到講train，又做晒動作揸車車。雖然逼留時間唔耐，不過囝囝應該都好滿足。為明天打風作準備，係大埔買埋呢兩日o既餸先番屋企 (唔係番到樓下超巿或者街巿都應該俾人掃晒啲菜...)。

11年9月小朋友兩歲生日會

同幾個mama一齊搞o既兩歲生日會，一共有24個家庭出席，包咗冒險樂園個playhouse，又有唔同o既sponsors，每個小朋友都有抽獎禮物，大家玩得開心，正！

夜晚同Dr. Philip一家吃飯，momo同Issac以車會友，兩個幾投契咁，似乎佢哋都幾啱玩~
臨走仲有得餵魚魚，momo好積極咁餵！番屋企前行咗陣公園順便賞吓月啦 (好彩都有得睇吓~)

中秋節冇節目

今日接momo放學時，佢手拎住個自家製燈籠，色彩繽紛整得好靚~

答應番6299到食飯，諗住hubby都會早放，食完飯應該仲可以約到幾個bb一齊玩...點知...出發到小巴站時，人龍已多過二十...又一直冇車...已經等到即刻想轉搭地鐵...whatsapp hubby，佢差唔多時間係公司離開都仲快過我到荔景...好可能荃灣大塞車，離開小巴站時，應該有過六七十人排緊...最後成七點幾先去到6299屋企...就係咁...當我哋食完飯之後，都成九點幾，momo又眼瞓...結果中秋節都冇賞月就番咗屋企喇....

親子燈籠

momo人生第一份親子功課，就係中秋節燈籠。雖然mama鍾意做勞作，但冇乜創意，再上momo都係得兩歲，做唔到啲高難度o既嘢，最後用屋企搵到o既材料，整咗個環保巴士燈籠~

momo幫手貼四個車轆同自己張相，其餘都係mamam代勞~

今日郵寄第八間K1申請表 - 劍鳴。

車痴

話說呢個小朋友好鍾意車車，鍾意o既程度令人意想不到！我見佢咁鍾意車，於是上個月尾買咗本書俾佢，咁佢當然超開心啦~ 每睇一頁就要我講架車o既名，然後又自己跟住讀一次。一兩個星期就已經認得十架八架啦，到今日唔夠一個月，佢已經認到接近二十個品牌，仲要係出街係馬路都認到。一個啱啱兩歲o既小朋友，可以做到咁，直程叻過好多大人 (好似mama我咁，都係要教佢，先開始識認吓啲品牌...) 你話佢唔係車痴，咁係乜？

如果學校面試考車o既話，囝囝真係超晒班！咁短時間佢記得咁多，其實佢o既記憶力真係好好，將來讀書應該都唔差，不過佢而家係選擇性去學，車車以外o既，佢又唔會學得咁快喎...所以要引佢學多啲o既話，咩都用晒車做例子就最好，哈哈~~~


今日又一次過交咗第六同第七間K1申請表 - 荊冕堂葵涌及保良局葵芳。

與太婆和嫲嫲到大埔海濱公園

上午hubby同momo游完水，就同momo去荃灣同太婆、嫲嫲、爺爺、姑媽&姑丈飲茶。夜晚男家做節，咁就順便帶太婆同嫲嫲去公園，可以同momo玩吓。

太婆、嫲嫲、hubby同momo都係有血緣關係，而我雖然係家人，不過有時感覺都會好奇怪，我諗呢啲真係做人新抱先明...哈哈~

娘家總動員@迪士尼優先場

多得弟婦，我哋先可以一家大細買平飛入場！今次娘家大旅行好成功，只可以惜爭姨甥女子澄先齊人啦~

大家四點幾係迪士尼車站集合，到步時正正太陽開始落山，西斜又曬，影咗啲大合照就向小小世界出發。穿過城堡，我哋見轉轉咖啡杯冇乜人排隊，於是玩咗先。原來呢個game可以自己較快慢，momo一轉得快就猛咁話驚驚...
玩完就即刻去小小世界，都唔駛點排就有得玩啦，又熱又曬，過吓冷河都好！之後，我哋就去騎旋轉木馬同小飛象，當小飛象係最高o既時候，momo又話驚驚啦...
睇煙花前，全部去醫肚先，揀咗係小小世界嗰間餐廳吃。到煙花環節，估唔到囝囝又驚 (明明佢上年都唔驚，點解而家樣樣都驚呢？)

煙花完咗，啲工作人員開始清場，呢個時候得番包場o既客人，我哋又可以大玩特玩喇！不過姨甥仔梓烯係呢個時候話眼瞓要走，最後行到灰熊山谷都捱唔住...話要番屋企搵妹妹喎...所以細妹同妹夫就帶佢離開。我哋就繼續去toys story land到玩，哈！唔駛點排就玩到彈弓狗，呢個比相像中快，所以囝囝又話驚喇...

呢到冇其他啱囝囝玩o既遊戲，於是轉戰winnie the pooh，然後再去埋巴斯光年射槍。當hubby，細佬、弟婦同大妹去space mountain時，我見馳車天地可以俾momo揸車車，所以就鼠咗去玩...就係咁...一玩連parade都冇得睇...結果俾hubby話我走咗去又唔出聲，成村人搵我同momo...well...

自己揹書包

番咗兩個星期學，雖然問唔到momo學校o既生活，但有時佢都有提老師。不過，我諗佢都開始熟習一啲常規。今日送佢番學時，佢就話要自己揹個書包，唔駛我拎。我諗佢慣咗係學校要自己揹住書包入課室，放學時自己揹書包等mama接，所以唔需要我幫手啦~

今日收番學校手冊，momo都係全剔，嘩~ 叻仔喎！仲有兩個係學校做o既立體手工，好得意喎！

中秋燈籠

昨天同另一青衣媽媽去St. Cat交索取申請表的信 (第四間K1申請)，今日送momo番學後交第五間K1申請表 - 學之園。

上年嗰個奧比斯燈籠漏氣，今年再幫襯，希望可以keep到年年再用啦。

適應上學

第四日獨立上學，momo入校門冇喊丫！校長拖住佢入去，我係玻璃門偷偷望入去，見到佢跟住老師扶住樓梯自己行落去，好叻仔喎！
到我接放學時，成個門口塞滿人，有N班小朋友見到親人已喊住行出黎，momo排到最後，佢離遠望到我，見到佢口型講咗兩聲mami，但冇即刻衝出黎又冇喊，等老師拖住再交俾我，真係乖，當然要即刻大讚吓佢先得啦~~~

送咗上校車？

番學前流鼻水到而家成個星期未收，好彩學校都冇投訴啫~

送momo番學之後，去交第二同第三間K1申請表 - 康傑及路德會。

接放學時，老師以為囝囝搭校車，送咗上架校車到，車走咗...校車媬姆又唔知點解會接收佢，之前都冇搭過，我上星期已經同學校講過佢十月先搭嘛...我whatsapp同其他媽媽講，我諗佢哋都俾我嚇親，不過我又冇因為唔見咗個仔而驚，因為學校即刻call校車媬姆，確定佢係車上面，就要求佢原車反回先。呢個時間，我順便同班主任傾咗一陣，佢話momo只係第一日番學時有喊咗陣，之後入課室都冇再喊過啦。嘩~ 真係叻仔，我仲諗住佢會喊一兩個星期o架，mama錫晒你丫~~~

momo車番黎校門時，又冇因為上錯校車喊喎，只係個人好攰咁，一抱就嗲住係身...希望下個月正式搭校車番學都順利啦~

到海洋公園參加婚宴

趕番黎香港，就係為咗出席恆星莊員o既婚宴...其實事前已經知道日子，但唔知婚宴地點，諗住都係夜晚時間先去，就算係澳門五六點走都實趕得切去飲。到收到帖時先知原來係海洋公園舉行，仲有埋飛入場...蝕咗丫~~~

我哋係上環落船後，就番咗屋企放低啲行李，再揸車出發，去到都係時間剛好咋，張帖寫七時入席嘛！不過因為莊員寄少咗一張入場卷俾我哋，所以係門口又擾攘咗一陣先入到閘口...最後要工作人員引領到海龍王餐廳。

入夜之後，海洋公園有night show，不過momo一見煙火就驚，所以又錯過難得o既入夜節目...今晚場地setting唔錯，可以人少少幾個咁一張枱，唔似啲傳統十二人大圓枱，唔夠人要同陌生賓客share，我哋可以成班莊員自己坐晒！

嘢食就係自助餐，但款式唔多，有茄汁意粉，冇飯，結果momo成晚都唔係食咗好多飽肚嘢...

最後婚宴未夠十點就散場，大家都各自歸家。好彩hubby一早諗住揸車，可以早啲番到屋企休息，momo係車上面都瞓著咗~~~

momo生日暨拍拖5000天澳門慶祝之旅

其實呢個兩日一夜o既澳門之旅係俾hubby一個surprise黎，佢都係出發前嗰一晚先知會過大海！借賀momo生日為名，慶祝我們9月9日拍拖5000天為實，呢個surprise部署咗成個月有多o架啦，完全風聲不漏，大成功！

原本勁想訂banyan tree，但周六兩日一夜package加momo船票要過四千大元，去個澳門未免太奢侈了罷...揀galaxy比較經濟，又可以享用人工沙灘！

星期六朝早等momo食咗早餐之後，就出發到中港碼頭。係個大堂到走來走去都唔知點到換船飛，因為之前去咁多次澳門都係去澳門半島，搭去氹仔都係第一次，所以唔知金光飛航o既船公司名係珠江客運...換到11:30船，係大堂餐廳到食啲嘢就過關上船喇~

一小時o既航程，momo都瞓咗一半就到氹仔，碼頭係機場隔離，momo見到好多飛機好興奮！上酒店o既穿梭巴士，好快就到galaxy喇！入到酒店大堂，hubby同momo都覺得呢到好靚，哈哈，我果然冇揀錯！check in拎房後，順便book咗festiva自助餐，今晚有大餐吃囉~~~

鑒於明晚要出席婚宴，要於下午回港。同hubby商量好今天外出活動，明早到人工沙灘，所以在商場吃過飯後，便向澳門賽車博物館出發！點解揀呢到？當然係為咗個仔啦，佢咁迷啲車...果然佢真係興奮無比，仲叫我哋幫佢影相添~

momo咁細個，對歷史古蹟都唔會有興趣，不過循例都去議事廳同大三巴拍個到此一遊照啦，話晒澳門地標黎嘛！行個大運就番去酒店休息一陣，然後去festiva大吃特吃。momo而家仲係免費吃自助餐，當然抵啲啦~
飯飽飽過去威尼斯人指定店舖shopping！哈哈哈，唔駛講忠實球迷就一定知係邊間~~~
不過去到都唔多款揀，最後只係買咗件polo俾momo咋...行多陣買埋鉅記就番酒店休息lu。

朝早起身去麥當當食咗個貴價早餐，就即刻換衫享用人工沙灘。momo勁驚啲人造浪，所以大部分時間留係嬉水池到玩。最初都唔敢行過幾個噴水圈圈，但陪過佢行一兩次之後，佢覺得好好玩，爭啲就玩到唔捨得走添~

酒店知道我哋有小朋友，已經預早安排延遲一小時check out，不過沖埋涼執埋嘢都係啱啱好夠鐘咋...係商場食個lunch就去碼頭換飛搭15:00船番香港lu...

雖然momo成個trip仲係留住鼻水，但絲毫不減佢o既愉快心情。唔知今年仲有冇機會再出埠呢？

家事小幫手之搣豆豆

第二日正式上學，momo送到校門時都是喊的，但放學上樓梯都冇喊lu。我見有啲小朋友接放學時，一見到家人又即喊，但囝囝見到我反而好開心。我問佢番學開唔開心，佢答我開心，咁已經好足夠啦。

學校每個星期尾都會派手冊回家，呢個星期，momo o既表現真係拍晒手掌！所有項目全剔！好叻仔丫！咁即係呢兩日佢都好享受學校生活，又聽老師話，乖仔！

送咗momo番學之後，就去交第一間K1 o既申請表 - 顯現堂，順便去街巿買咗囝囝最鍾意o既豆豆。而家佢會一齊幫手，我會先將毛豆搣開一半，然後佢就會將啲豆搣出黎，再放去碗入面。呢個活動一舉多得︰

1. 親子活動 - 我唔駛留係廚房做晒啲功夫，囝囝有得參與

2. 訓練小肌肉 - 唔一定要買好多玩具，呢樣已經係一個好好o既活動訓練佢手眼協調

3. 家事小幫手 - 簡簡單單，又易成功，幫到媽媽最開心

兩歲生日正式上學

估唔到momo兩歲生日，就要面對人生一大挑戰 - 獨自上課！今日係正式上課天，冇得再陪上堂，囝囝要自己番足三個小時。雖然之前同佢睇故事書講上學去，不過我都預咗作用唔大。呢個咁痴身o既小朋友，點知會爆喊...係視乎佢喊幾耐啫...

hubby同我一齊送到佢去學校門口，園長親自抱起佢行落樓梯，即時聽到佢大喊媽咪...會唔會喊到攰瞓著呢？事關佢朝早7點幾起身都未瞓過...不過我答應佢放學時會買定生日蛋糕接佢，希望佢記得唔好喊咁耐啦~~~

離開之後，hubby上深圳開會，我就去物色生日蛋糕。下晝天氣唔好，持續落雨，考慮咗好耐拎唔拎蛋糕，因為我好肯定放學個情境係拎書包+抱momo+拎傘子+拎蛋糕+五分鐘路程包扶手電梯行斜路上巴士...明知會好難搞，但為咗承諾同為囝囝打氣，做一次鐵人媽媽都要！！

接放學時，見到佢由老師拖住上樓梯都冇喊，嗰刻心裏面已大讚佢叻仔！咁啱班主任係門口，我問老師佢有冇喊，老師話佢喊咗一陣，之後都冇再喊啦，不過就好攰咁 (由朝到而家都未瞓...)。我俾momo睇有生日蛋糕，原本頗具疲憊o既佢即刻話想食，個樣開心番晒。當然，蛋糕要等埋daddy先一齊切，於是我抱住佢踏上回程之路，雨勢一直都冇細到，冇諗過咁都俾我捱到上巴士...上到巴士，囝囝都即刻瞓著...咁即係代表落車到番屋企段路仲高難度...momo，第時大個要錫多啲mama！

成朝未瞓，仲要上咗兩個幾鐘堂，累極的小朋友瞓到接近晚飯，hubby番到先醒。隨即落樓下商場食大餐，再番上屋企切蛋糕。囝囝見到個蛋糕已經即刻想吞入口咁滯，等唱咗生日歌、吹完蠟燭就急不及待要吃。哈哈，個栗子mini真係足足俾佢差唔多食咗一半。

兩歲大個仔，雖然都未戒到片，身型又偏瘦，不過佢食得是福，情緒言語認知發展自理能力都令人滿意，是大家眼中的乖孩子！有這樣的一個寶貝兒子，這兩年的全職辛勞總沒白費~~~

新生適應日第二天

今日係番學之前氹到momo瞓咗晏覺先，所以可以參與活動。不過，其實都仲係下畫一點幾先瞓，其實係正式番學o既時間...點好呢？如果唔瞓覺番學，就算頂到放學，都攰死啦。但囝囝自從只小睡一次之後，好多時就算朝早七、八點起身，都會一路到下午一、二、三點先瞓，一瞓就兩三個鐘...真係要諗諗，係番學前要佢瞓一陣。

去到課室，當然要點名同埋要同老師講午安啦，然後就去另一個課室到唱遊。老師今次叫家長企係課室外面，小朋友入去圍成半圈咁坐...之但係momo即刻死命咁拖住我唔肯自己入去，仲要喊晒口...老師見到咁，就俾我同另一個爸爸 (佢個囡囡又係喊)陪住入去。囝囝有我抱住坐，就梗係唔驚啦。最初老師一齊帶唱歌時，啲小朋友都ok，但過咗幾分鐘後，就開始有啲喊要搵媽媽，個場面都有啲混亂。不過都有幾個都完全冇事，可以自己坐定定。有啲真係安撫唔到o既，老師都有俾啲媽媽入黎。

呢個時候，我係到諗...真係辛苦晒啲老師，聽日所有小朋友都要自己番學，到時肯定哭聲大合奏，咁混亂可以點？！

唱遊完畢又係洗手間時間，點知momo唔肯拖住行，扭我抱，結果跟唔到條隊，冇入到洗手間...番到課室就係茶點時間，momo以為今日又係食蛋糕，點知係食三文治。最初佢唔要，話想食蛋糕，於是我話：「你唔要，咁請媽媽食。」我就扮放入口，佢即刻好緊張話要番，好乖咁食晒...走o既時候，每個小朋友都有汽球拎走。

明天momo兩歲，亦係正式自己上學，三小時。希望佢早日適應，喊少啲... (雖則我預咗佢爆喊...)

新生適應日第一天

正式上課前有兩天適應日是家長可以陪同，momo編咗第二節上，由三點半到四點半。出發時仲係精神奕奕，不過冇瞓晏覺o既佢，一上巴士就瞓著咗，結果入到課室都係瞓覺mode，全班得佢一個係咁...但老師都好好，話唔好叫醒佢，可以慢慢調節。小朋友玩咗一陣玩具之後，老師就叫小朋友排隊去另一個課室，咁我就緊係抱住佢去啦。老師請小朋友坐係第一排，家長坐後面。呢個時候，除咗三位班主任之外，課室仲有另外兩位老師幫手，講咗個小白兔送紅蘿蔔o既故事。momo就冇份聽啦，去到尾聲就醒咗。
然後老師請小朋友排隊去洗手間，再番課室食茶點。哈哈，囝囝冇錯過最重要o既茶點時間，仲要係佢鍾意食o既蛋糕添！佢真係醒得合時！

First day of school in life

今天又是每年莘莘學子的開學日，而momo今年都加入呢個行列。雖然今日唔係佢正式上學，但都要穿整齊校服回校，所以都係佢生命裏面o既首天在學。

其實今日只係番去拎編班證同開學通告、見吓班主任、參觀班房、了解一啲注意事項咁，不過，因為momo是下午班，hubby要工作就不能同行啦...

下午有兩組幼兒小組，momo嗰班有27個學生，佢被編做蘋果組，張枱係課室o既前右方，個位對正老師，都幾好喎！
係個hall到聽到一半注意事項時，momo頂唔順瞓咗，如是者我要抱佢番屋企了...時間係兩點半左右...咁佢點番下午班呀？！早起早睡的孩子，有考驗了！

首幅有意思的畫

估唔到23個月o既momo，可以用線條型狀畫到架車出黎...真係有車身同車輪o架！其實佢仲可以係個車頂再畫多個頂做的士。我覺得囝囝係呢方面係發展得幾好，好多同佢月齡o既小朋友，只係識用筆不停打圈畫，但囝囝竟然見我哋畫得多 (實情係成日叫我同hubby畫車車...)，就畫到出黎，真係可以考慮吓係呢方面栽培佢！

3位處女座之星的首個生日派對

momo、臻臻表弟同子澄表妹都係處女座，大家o既生日日期都好近，所以由今年開始，可以年年一齊搞生日派對。場地都係揀番會所，不過book咗另一個房。娘家齊集就必然啦，仲有邀請埋momo爺爺嫲嫲同埋表弟o既公公婆婆。大家影吓相，食吓蛋糕同小食，短短兩小時就咁完啦~

祝三位小朋友快高長大、健康快樂、幸福常滿~~~