新生適應日第一天

正式上課前有兩天適應日是家長可以陪同，momo編咗第二節上，由三點半到四點半。出發時仲係精神奕奕，不過冇瞓晏覺o既佢，一上巴士就瞓著咗，結果入到課室都係瞓覺mode，全班得佢一個係咁...但老師都好好，話唔好叫醒佢，可以慢慢調節。小朋友玩咗一陣玩具之後，老師就叫小朋友排隊去另一個課室，咁我就緊係抱住佢去啦。老師請小朋友坐係第一排，家長坐後面。呢個時候，除咗三位班主任之外，課室仲有另外兩位老師幫手，講咗個小白兔送紅蘿蔔o既故事。momo就冇份聽啦，去到尾聲就醒咗。
然後老師請小朋友排隊去洗手間，再番課室食茶點。哈哈，囝囝冇錯過最重要o既茶點時間，仲要係佢鍾意食o既蛋糕添！佢真係醒得合時！