親子廚房︰cake pops

聖誕節整唔到曲奇番學校分享，復活節點都要補番，於是今日趕工整啲cake pop，每個小朋友一支，一定超開心！

三月第二次蚊患

都未到夏季就已經第二次...之後呢幾個月點算...唔通要開始晚晚開冷氣避蚊？！呢次係喺momo塊面仔到拍死嘅，但已經咬咗佢額頭喇 ><

首次到BMX park玩strider

hubby係FB見到朋友仔帶自己個小朋友去BMX park踩單車，佢即刻搵地址，見到原來同屋企好近，所以就帶momo去視察吓環境。去到本來諗住好似交通安全城咁踩單車，但觸目所見，在場嘅小朋友個個都係踩兩輪或者平衡車，於是即場租咗架strider俾momo試吓玩。第一次玩平衡車嘅momo最初都唔太適應，踩一陣就想換車。不過，佢之後跟咗個小朋友一齊玩，就好開心咁係個小斜坡到衝落黎，玩到唔捨得走咁滯 XD
呢到租架strider只係$30一日，又搵到個地方俾個仔放電喇！

啟思開放日

momo在家見到啟思o既班相，都仲可以講到幾個同學仔o既名，但究竟對啟思仲有幾多印象呢？一於去開放日了解吓...

係諗住同佢一齊探吓N班o既班主任，結果其中一位應該已離職，而另一位班主任仲好記得momo，反而momo自己就好似唔多認得老師咁...走馬看花咁到訪每個班房，參與部分o既遊戲活動，但momo逗留最耐o既，係露天playground - 全因playground裏有各樣o既大型玩具車~

親子廚房︰黑豆渣小丸子 & 黑豆渣小餐包

黑豆渣可以點用？今日就同momo整咗兩款食物。以豆渣製作嘅小丸子，可以減少糯米粉嘅比例，食落冇咁滯，而且更健康！
而以豆渣作為麵包材料，焗出來嘅麵包，雖然冇乜豆香，但充分使用豆渣，絕不浪費。兩款製作簡單，係茶點小吃嘅最佳選擇！

自家黑豆漿

momo鍾意飲豆漿，以前多數用黃豆自家製，今次試用黑豆，顏色雖然轉咗，但momo依然喜愛。而家佢知道豆漿係用豆造出來，要隔渣先成為飲品，而豆渣亦可食用。

花苗換盆

去花鋪買咗泥，即刻叫momo幫手移盆澆水，以後每日就靠你自己努力照顧好「花bb」喇！

一人一花花苗

學校派咗一人一花嘅花苗，momo開始要好好照顧呢個小生命啦，希望今年都越種越大啦！

幼營喜動紀念品

學校派咗盒紙牌，可以當砌圖，又可以當配對遊戲，認識多啲健康飲食同多做運動嘅好處，都真係唔錯！

表哥來訪

momo依個年紀比較鍾意同大嘅小朋友玩，所以同表哥特別friend，亦都鍾意模仿佢哋言行。總之，表哥一做，或者一講嘅嘢，佢可以好記得，仲要之後成日做，同我講表哥都係咁㗎，好似會威啲咁...
今日表哥黎咗同佢玩咗成個下晝，仲食埋晚飯先走，兩個都非常開心！

五個小孩的校長

早陣子已知有一套關於教育題材的電影準備上映，看過故事大綱後，更想一家三口齊齊看。一來支持本地創作，二來當做親子交流。雖然這套電影並不是卡通片，但momo也看很相當入神，可能與小朋友和幼稚園有關吧！
戲中感動位的確相當催淚，也再次觸動我那顆以生命影響生命的教育心，對教育工作者來說，真的非常有共鳴。

願你學習的路上也會遇上良師~

三月已經有蚊患

不解釋，唔係你死，我就冇得瞓...

飛行棋開動

三歲半o既momo對紙牌board games都開始有興趣，早前購入地墊式飛行棋，大大張棋盤，啱晒小朋友玩。由於三歲o既小朋友認知有限，於是skip晒所有rules，只係擲骰就行，咁玩起上黎就順暢好多！結果嘛...大家母子二人各有勝負，開心期待下次再戰~~~

親子廚房︰香蕉飛碟包

早係momo仲係bb o既時候，已經買定咗啲曲奇模、三文治模、飯團模、雞蛋模等，準備為佢炮製美食。今日終於用咗個三文治模黎同佢整個飛碟包食，咁梗係食唔停口，又吞埋mami嗰份啦~~~

有營餐券

momo放學一番到屋企，就拎咗張紙出黎，話可以剪出黎用。平時佢唔會留意學校派o既其他資訊，今次真係破格，主動拎出黎分享。咁即管睇吓用唔用得到啲餐券啦~

川龍飲茶去

中午同咗Isaac, Sophia去川龍飲茶，兩個男孩子係到狂食馬拉糕，仲要笑到唔停口，其實有咩咁好笑呢？！
原本諗住係遠足徑行一個圈先走，可惜天氣潮濕，我哋擔心路滑，所以係小食亭草地到玩咗一陣就回家lu。

hubby今晚飛，夜晚同埋婆婆一齊去探嫲嫲。三個第一次搭地鐵去到香港大學站再轉巴士去醫院，仲方便過係中環轉小巴上去，可以避開晒塞車路段。

探入院的嫲嫲

嫲嫲口腔發炎入院，週末帶埋momo一齊去探佢。其實小朋友都入唔到病房，其他探訪人士亦會覺得點解要帶個咁細o既小朋友去醫院，始終醫院多病菌呀嘛...但嫲嫲見到個孫係會開心啲o既，咁帶晒口罩，唔係留太耐o既，都盡量去一次同嫲嫲打氣！嫲嫲要加油呀~~~

開心樂園書

麥記一連三個星期會隨開心樂園餐送兒童故事書，今日第一日，就梗係即刻去食完先番學啦~

好久不見的好友

成個Christmas去咗旅行，冇見一班9月小朋友，好彩momo都冇忘記大家。今日就同睿睿一齊玩再食埋dinner先回家！

rush hour

momo當然未識依規則玩rush hour，但佢見到車仔就話想玩，於是我叫佢跟住啲咭咁排啲車仔上個棋盤到。結果佢好有興趣咁一張接一張咁排，每次排完就叫我幫佢對吓，排啱晒佢會好有滿足感！
原來咁玩都唔錯呀，又可以專注於啲活動，唔駛係到扭住我陪佢，我可以順利煮完餐飯！

cambridge english要轉班

去年9月開始上level 1 (pre-starter)，其實都仲有10堂左右就完呢個level，奈何momo呢一班啲小朋友一係就轉咗去i learn，一係退咗學，得番佢一個人上，於是被迫要轉去第二班...咁下學年佢都會讀全日班，就乾脆提早轉去星期六上啦~
今日收到level 1中期報名，表現係out of my expectation! 睇黎其實佢都幾鍾意上cambridge~~~

管理員之互動

大門嘅管理員叔叔其實好鍾意同小朋友互動，但偏偏momo接近次次都唔多回應，兼有時掂行掂過，招呼都唔打個...我都俾佢呢啲選擇性禮貌激死，只可每次繼續做好自己，待他日佢可以對每個人都一視同仁啦！
其實，我有問過momo點解唔睬叔叔，佢話叔叔好惡，唔鍾意佢。我話叔叔好錫小朋友㗎。終於，今日叔叔係櫃筒拎咗架火車出黎，momo即刻同叔叔好有互動，哈哈哈~~~

親子廚房：雞蛋餅

學校最近專題研習為雞蛋，早前已一起蒸蛋做資料搜集。明天要帶雞蛋製成的食品回校，於是一起製作美味小食與老師同學分享。但...阿仔你都唔駛試味試到食晒成盤㗎...

彭福放電去

同Issac, Sophia一齊去彭福公園玩，momo同daddy飛咗個竹蜻蜓上簷篷頂...下次記住要買番俾人呀~

K1學校旅行

momo人生第一次o既學校旅行，爸媽當然不可缺少啦！可惜今日天氣麻麻，天陰陰，仲要落毛毛雨，學校都冇乜集體遊戲玩，大部分時間係食嘢同參觀。我哋都冇跟隊去行，只係上一上回歸塔，然後就駕車自行先離開。番到屋企，仲可以同同學仔食午飯同玩玩具添， so good!

42 months old - 親子廚房︰無油低卡低糖雞蛋糕

為咗明天o既學校旅行，同momo一齊整蛋糕同小朋友分享。呢個蛋糕冇油少糖，啱晒小朋友食呀！焗好momo緊係一試再試啦，唔叫佢收手o既話，明天就唔夠派o架啦！

今日三歲半啦，終於買咗個小童八達通俾佢，以後搭地鐵有得自己嘟喇~

親子廚房︰合桃一口酥

今日整o既合桃一口酥超啱momo胃口，基本上一焗好，momo就不停咁食。一於星期五學校旅行帶埋去同小朋友分享啦~

中同新年聚

放假最後一擊 -  中同聚！齊齊入天水圍村屋到開大餐，辛苦女屋主為我哋準備o既食物，個個都食到唔停得口！今日momo有幾個小朋友一齊玩，又玩到唔捨得走~

正式逗完利是啦，明天要番學囉~~~