表哥生日會

11月o既家庭聚會當然唔少得同表哥梓烯慶祝生日啦，其實表哥爸爸媽媽都係11月之星，所以年年11月都自不然有生日蛋糕食。真係益晒鍾意食蛋糕o既momo，哈哈哈~

momo同表哥今日又有一齊玩，見佢同表兄弟妹都相處融洽，又肯分自己啲玩具俾表哥表弟玩，真係太好喇！

城門行+與龍同行+佈置聖誕樹

今日節目豐富，朝早去咗城門水塘行咗一陣，momo好鍾意睇水塘，但好快就話攰要抱，於是諗住去6299到食lunch。不過，原來佢哋出咗街，所以等hubby剪完頭髮，就出尖沙咀食飯。

食完lunch就去睇恐龍展。momo最初去到戶外見到大大隻恐龍好興奮咁，但入到場館就覺得有啲驚，尤其睇完段簡介片段之後。好彩佢都冇驚到喊，跟住冇再見到啲會郁吓郁吓o既模型就冇乜嘢喇。

夜晚去6299到食晚飯，然後番屋企佈置聖誕樹。momo第一次佈置聖誕樹好開心，好落力咁幫手。到亮燈儀式時，佢仲嘩咗出黎添~~~

mo之聖誕禮物

完成囝囝今年o既聖誕禮物啦！係小斗蓬黎o架~襯埋上年o既聖誕禮物，簡直係very good！

培正交表

之前收到培正寄番黎o既申請表同問卷，編咗今日3:30-4:30交form，已經早咗十五分鐘到，諗住都係半個鐘都走得啦。點知去到已經心感不妙，條龍去到培正中學個運動場到...結果排咗差唔多成個鐘先交到囉，搞到要飛的番去，真係差少少就接唔到momo放學。
交埋呢間，終於都完晒K1報名程序啦，到月尾都正式完成所有面試，真係累透！

12/10 10:15am 荊冕堂士德 (pm waiting)
17/10 3:15pm 顯現堂 (am offer)
19/10 9:30am 綠楊 (rejected)
26/10 10:40am 荊冕堂葵涌 (waiting)
1/11 4:15pm St. Cat
2/11 9:30am 海濱方方 (冇去in)
2/11 10:00am 荃灣迦南 (冇去in)
2/11 11:00am 嘉言 (冇去in)
2/11 11:00am 根德園
2/11 1:30pm 劍鳴
9/11 3:10pm 學之園
30/11 12:00pm 康傑
30/11 5:00pm 培正

停車場玩具

hubby今日先飛番香港，帶momo去機鐵站接daddy番黎。結果佢好熱衷幫手推個行李番屋企。

呢個星期淘咗個停車場玩具同棵聖誕樹，等埋hubby砌俾囝囝玩。佢今日一見daddy拆盒時，就已經好興奮咁笑晒，砌好之後，就當車車滑梯咁玩。呢個新寵，應該可以玩好耐囉~~~

至於聖誕樹，要等下星期先再一齊佈置啦。

表兄弟聚

娘家聚會，夜晚去佛堂食飯，帶mo見到細佬到，等momo同表弟玩陣，然後再番娘家等齊人先出發。表弟雖然未識同表哥s玩，但佢都好熱情咁想一齊玩埋一份。而momo就開始可以同梓烯表哥玩到啲啦，應該下一年就可以玩埋一堆啦！

連唱兩首新歌仔

今晚瞓覺前，我問momo happy birthday song同twinkle twinkle點唱，佢竟然係識唱到八成o架啦，平時都聽唔到佢唱，原來係識唱o既！

我是小紳士

今個星期會轉涼，見momo啲鼻水仲未止，都係換季穩陣啲。件冬季校服都幾靚，著起成個小紳士咁款！

Floor mat

上星期係玩具反斗城買咗架Ferrari同張floor mat，momo兩樣都好鍾意玩。我教佢係張floor mat上玩車，泊啲車係適當位置，佢好快就學識，仲記得啲位，真係好犀利！

第九個K1 interview - 學之園

朝早去顯現堂交留位費，然後去青衣公園玩咗一陣，番到屋企momo就瞓咗陣晏覺。

中午係啟思家長日，同hubby帶埋momo一齊去見老師。去到學校，momo個個老師都好驚咁，就連班主任同佢打招呼都即刻攬住我 (好明顯又係到嗲~)。校長見到囝囝，話佢叻仔咗，番學校到門口可能仲要搵媽咪，但行樓梯落去班房時，就冇帶媽咪媽咪咁講喇。
到我哋接見個時間都仲等咗一陣先有得見班主任，鄧老師同陳老師負責見家長，江老師就負責接待。我見鄧老師係班房出黎時見到囝囝係叫佢英文名，唔係中文名喎。陳老師見我哋時，就話momo講多咗嘢，同埋食茶點係會添o架 (哈哈，我日日問佢有冇添，原來佢冇講大話~~)。番到學校都投入啲活動，入到班房會同啲同學仔講嘢，班入面仲有一個同學好friend。最後老師話係屋企多啲訓練佢啲小肌肉，例如玩泥膠、扭樽蓋之類咁，同埋俾心機戒片 (我都好想快啲！)。

見完老師，就出發去學之園面試。面試前去咗隔離餐廳食啲嘢，我就帶囝囝入學校，hubby係出面等)。係門口登記完，就係學校大堂滑梯到玩住等叫名。面試分三部分，要跟組去唔同課室。
先是個人面試，老師問囝囝叫咩名，同邊個黎。佢都好順灘咁答咗老師。老師俾咗幅家居圖片小朋友睇，然後拎四張圖卡出黎，分別有鐘、電話、鎖匙、床，要小朋友講出卡上物品，再指出它們在圖片上的位置。認物件同位置都ok，係鎖匙太細，要睇咗一陣先搵到。老師有問鎖匙、床同電話要黎做乜，不過momo都唔係好答到。
完咗呢部分，就同班房入面其他o既面試小朋友排隊去第二間課室。呢部分一組五個小朋友要聽NET唱砍做手勢講指令，再考小朋友將兩個相同o既水果配對，老師會先拿一個，小朋友再拿另一個。momo都有反應，同拎啱水果。
最後就成組去另一課室填問卷。小朋友坐係隔離睇故事書，然後校長會入黎講介少少同有答問環節。最後由小朋友拿問卷俾校長，校長會比禮物小朋友 (係學校自製o既教材，比起啲送餅同糖o既名幼，呢間啲禮物真係實用)。

今日momo表現都好正常，其實佢有答老師自己名，又做到啲task，我已經覺得佢好叻仔，但等緊面試時，見到好多個樣好大個o既小朋友。我偷聽到話未夠三歲，咁即係上年年尾出世o既超大b啦，囝囝先得2歲2個月，差唔多大成歲，呢間收得好少位，睇怕機會都唔大喇！

荊冕堂葵涌出結果啦

面試表現都ok，但都係得waiting...睇黎荊冕堂真係冇乜緣...
十月o既面試只得一個offer，而十一月嗰啲睇黎都唔會收，真係報十幾間，in十間都係得一個offer...

12/10 10:15am 荊冕堂士德 (pm waiting)
17/10 3:15pm 顯現堂 (am offer)
19/10 9:30am 綠楊 (rejected)
26/10 10:40am 荊冕堂葵涌 (waiting)
1/11 4:15pm St. Cat
2/11 9:30am 海濱方方 (冇去in)
2/11 10:00am 荃灣迦南 (冇去in)
2/11 11:00am 嘉言 (冇去in)
2/11 11:00am 根德園
2/11 1:30pm 劍鳴
9/11 3:10pm 學之園
30/11 12:00pm 康傑

Floor puzzle

上星期買咗副floor puzzle，momo都好鍾意，會主動叫我哋幫手砌黎玩。大大塊係地下砌都幾開心，又可以當馬路俾佢啲車行。

學校每星期都有份勞作帶回家，呢啲係momo最近o既作品，唔知係咪全部都自己畫o既呢？

綠楊出結果啦

今日收到綠楊o既信，momo冇offer，係waiting都冇，即係rejected啦。其實都預咗唔會收，不過，原來冇offer o既唔係全部都waiting。

星期一啟思都退番張留位費支票俾我哋，真係好，可以慳番啲錢~

12/10 10:15am 荊冕堂士德 (pm waiting)
17/10 3:15pm 顯現堂 (am offer)
19/10 9:30am 綠楊 (rejected)
26/10 10:40am 荊冕堂葵涌
1/11 4:15pm St. Cat
2/11 9:30am 海濱方方 (冇去in)
2/11 10:00am 荃灣迦南 (冇去in)
2/11 11:00am 嘉言 (冇去in)
2/11 11:00am 根德園
2/11 1:30pm 劍鳴
9/11 3:10pm 學之園
30/11 12:00pm 康傑

26 months old

26個月大，未戒到片片喲...但說話多咗，可以講到自己搭幾號校車，講到邊間學校同邊班！而家都好少聽到bb話啦，全部都係聽得明o既說話。有自己o既喜惡，亦多咗提出要求。

今日一齊同佢買咗可以吞得o既牙膏番黎用，希望用得開心，鍾意自己刷牙啦~

臂力唔錯喎

今日去咗深水埗食lunch，然後去咗遊樂場玩咗陣就買餸番屋企煮飯食。momo開始可以係遊樂場來去自如，不過都係仍然要我哋陪住佢玩多，但大膽咗去爬上爬落。佢原來可以係呢啲馬騮架上面凌空以手臂支撐到好幾秒，仲要唔驚高添，叻仔咗！

第七及第八個K1 interview - 根德園及劍鳴

其實今日有五個面試，但時間撞晒都去唔到咁多個，而既然momo有am offer，咁就唔好咁辛苦走咁多場，同埋可以去九龍塘名幼見識吓，所以就揀咗KV同KM in啦。

12/10 10:15am 荊冕堂士德 (pm waiting)
17/10 3:15pm 顯現堂 (am offer)
19/10 9:30am 綠楊
26/10 10:40am 荊冕堂葵涌
1/11 4:15pm St. Cat
2/11 9:30am 海濱方方
2/11 10:00am 荃灣迦南
2/11 11:00am 嘉言
2/11 11:00am 根德園
2/11 1:30pm 劍鳴
9/11 3:10pm 學之園
30/11 12:00pm 康傑

hubby揸車，去到根德園時間啱啱好，連隊都唔駛排，我陪momo入。根德園分開男同女in。勁準時，又快，十五分鐘搞掂晒成個面試。
二對二，一個老師同小朋友玩，另一個老師問家長問題。因為同步進行，又要答老師啲問題，我都唔知考咗momo啲乜，只係望到有手抓板、砌圖咁...連有冇問momo問題，佢有冇答到我都唔知...
老師就問咗我以下問題︰
1. 小朋友同邊個住
2. 平日邊個湊佢
3. 屋企主要用咩語言溝通
4. 週末做咩
5. 小朋友係街扭計會點做
6. 戒片未...會唔會番學前戒到
7. 點解揀呢間學校

老師問晒呢啲問題之後，就叫momo唱歌。囝囝都係冇唱到呀，老師叫我一齊唱都係冇唱到 (預咗...)。跟住老師叫momo揀張哈哈笑貼紙，我叫佢講thank you。

離開前要去排隊交張報名表，老師叫小朋友名，再叫佢係籃仔到揀粒瑞士糖 (應該係睇小朋友識唔識講多謝)。囝囝都有(係提示下)講，然後揀一粒就開心離開。
in KV冇扭抱冇喊冇扭計，實在叻仔！我見都有小朋友喊 o架！

之後去又一城行咗陣，見有BMW車展，momo即刻話要坐。係反斗城買咗架Ferrari搖控車同馬路地墊俾囝囝。原本諗住俾佢食埋飯先，但food court又多人，於是買個包頂住先，等見埋劍鳴再去食嘢。

in咗三間九龍塘學校，對劍鳴感覺最好。啲task真係兩歲小朋友會做到，有嘉年華俾小朋友，又有家長義工幫手，啲老師都好nice。
劍鳴唔駛問家長問題，因為面試信已寄埋張問卷填。
形式係一個老師見小朋友同家長。
老師先問momo叫咩名同幾多歲 (囝囝答咗自己中文名同埋講兩歲！驚喜！)
跟住老師俾咗個會襟制彈出黎同形狀配對o既玩具佢玩，玩咗一陣就收拾。老師又用手偶問仔仔眼耳口鼻(都有指到)。然後有四張咭，分別係蘋果、杯、手同香蕉 (囝囝答到apple，杯，手同banana，有同老師give me five)
老師繼續拎咗兩個膠碗同三粒積木出黎，叫momo由一隻碗放去另一隻碗，再疊高三個積木 (囝囝竟然老師未講疊積木，就自己疊起咗，哈哈~~~)
接住，老師拎咗個有四個圖o既手抓板俾囝囝砌番。最後同囝囝玩推車仔。呢關點會難到佢呀，日日都係屋企玩車o架啦！老師推俾囝囝，囝囝又推番俾老師。老師係地下推出去，叫佢執番俾老師，佢都照做晒。最後送咗個火箭玩具俾囝囝，提咗有講thank you。

真正一個面試裏，所有task都做到晒！而且每做完一個task，老師都有讚囝囝，唔似SC，KV咁去考個小朋友，感覺真係好好，只係KM得咁少位，啲task基本上個個小朋友都應該做到，收o既機會都應該好微啦~

呢三個名幼o既interview，momo o既表現都唔錯，hubby話如果收咁點？我就話冇咁易啦，細仔點都難...

剩番學之園，康傑同培正就玩完個遊戲啦，yeah~

完咗個interview，係啲攤位到買咗啲書俾囝囝，然後佢一上車就瞓咗。

揸車過海去北角，約好莊聚探Letty bb，最後得我哋同Winnie到咋...

第六個K1 interview - St. Catherine

今日st. cat o既面試時間係下午，所以又要幫momo請假。朝早同佢去咗公園玩咗陣，等佢面試前瞓個好啲o既晏覺。
st. cat o既面試內容，真係好似考十項全能咁滯，短短o既時間，但就有好多task要完成。momo表現都正常，冇喊，做到少少指令，都真係進步咗好多！

因為我報英粵班，所以面試只有兩部分。全英momo一定冇反應，所以我揀廣東話in。
第一part係齊齊玩lego，分一批批小朋友(四五六個左右)入去，個lego房有四張枱，全部坐晒小朋友。見到都有小朋友喊，入去前仲有個唔肯入，momo就好興奮咁，慢慢行入去，都算叻仔o架啦~ 小朋友坐埋枱玩lego，家長坐係課室四周睇住。然後負責老師會過黎枱到，逐個叫小朋友名，睇佢識唔識回應。跟住，老師會用手指公仔，同小朋友打招呼，要小朋友同佢shake hand。momo最初都唔太肯玩，要搵我一齊坐低，咁好彩都坐得近，冇扭計，但都唔係好回應老師。而我哋張枱都只係得一個小朋友回應到老師同埋shake hand咋。間房其實計埋家長都成二三十人，又有小朋友喊，又有坐唔定o既，其實都好嘈吓...

第二part就係一個老師面對面in。一間房有三組，去到老師會叫家長填問卷。一頁紙有四條問題，但我要八卦考momo啲乜同反應，所以填吓又偷昅吓...
一開始老師放咗唔同顏色o既旗仔同其他物品o既紙牌係枱面，叫囝囝拎黃色旗仔，咁啱支黃色旗仔係中間面前，佢就拎起咗 (我填緊問卷時昅到，即刻偷笑...)
老師拎咗三個唔同顏色扎埋一齊o既紙筒出黎，叫囝囝將支黃色旗插入藍色紙筒到。因為藍色最近佢，又俾佢插啱咗...(我又係到偷笑，因為momo都唔太識分顏色，咁扶碌咁做到顏色o既指令...)
跟住老師拎張大咭出黎，入面全部黃色物品，老師叫囝囝搵鴨仔，佢指到。老師指住香蕉問佢係乜，momo即答nana。老師問佢好唔好食，佢話唔得。老師問點解，佢呆咗 (哈哈)。然後，老師拎把梳問佢係乜，囝囝唔識答。叫佢係張黃色圖入面搵一模一樣的指番出黎，囝囝都指唔到啦。
然後...呢個task就勁啦...得兩歲人仔都唔知邊個會識做...老師拎咗兩塊綠色三角形同一塊啡色長方型木板出黎，示範一次砌咗棵樹，然後叫囝囝砌一次。我見momo都有試，但又點會識砌呀。之後，老師拎咗積木出黎，叫佢拎兩粒細積木疊高，佢都唔係好做到。
接住，老師拎張白紙放係枱面，問囝囝想寫嘢要用乜，叫佢去後面個籃到拎...個籃係啲幾層o既手推架黎，當然入面唔止係筆啦。(背住我做，我見唔到佢揀乜，就聽吓囝囝o既表現啦) 我聽到老師話唔係拎車喎 (果然佢係見車就一定拎車想玩...)，然後老師話要用筆畫，叫佢拎支筆，咁佢又肯拎支筆番埋位喎！老師問佢呢支係乜，佢答老師係筆。老師叫佢畫圖畫，佢又肯畫幾筆。
最後老師叫佢唱首歌 (都唔識唱，預咗唔唱)，問佢唱咩歌，佢答老師︰唱ABC (哈哈，竟然答！)於是老師就唱一句引佢，見momo咀郁都想試咁，但都係冇唱。然後，老師話仲識唔識第二首，佢答巴士 (即wheels on the bus)，咁當然都係冇唱啦...
離開前，老師送餅餅俾佢，冇主動講多謝，但指佢都有講thank you。

講真，對9月出世又慢熱o既仔仔黎講，全部指令咁多，就算唔識做，都好神奇咁聽老師講做吓，我覺得佢已經超晒班啦。幾千人in，雖然都係陪跑多，咪當見識吓囉。而且，我好滿意佢今日表現呀，比起最初in嗰啲，真係好有進步呀~~~

愛上做樂手

呢幾日momo都會係玩具中拎呢個多合一樂器出黎玩，仲每次都會學番hubby教佢個動作咁做，好搞笑！唔知大個仔啲會揀咩樂器學呢？我自己就冇一定要佢學邊樣，但都最好專門學到一種，至少一生一體藝嘛！

有K1 offer啦

今日收到顯現堂o既信，momo有am offer丫，yeah~~~

唔駛擔心佢冇書讀啦，仲要係上晝班添呀，咁放學番到屋企都可以瞓一陣再玩。

今晚即刻寫封信去啟思，取消留位，放番個位俾其他waiting o既小朋友先。雖然未必有得退留位費，但最緊要做良心家長，唔好hold起晒啲位，冇offer o既小朋友同家長真係好心急o架！

囝囝夜晚自己拎咗個吸塵機出黎，仲裝好話想吸塵，哈哈，真係乖到咁~

家事小幫手篇之晾衫

除咗吸塵外，晾衫亦成為momo近期鍾意o既家事之一。最鍾意同我一齊拎住啲衫，然後我抱住佢掛上個架到。

第五個K1 interview - 荊冕堂葵涌

琴晚momo發燒，十二點幾量體溫38.3度，見今日要面試，於是餵佢食一次退燒藥。但佢超級唔合作，合埋晒個口唔俾餵，就算餵到又即刻咳，嘔番啲藥出黎 (即係冇食過啦...)。到今朝六點，摸佢都仲有熱，擰晒頭咁餵多次藥，但原來再量已經落番36.X度。

見佢退咗燒，朝早個人起身都精神，於是出發去面試。今日囝囝表現都ok，真係越見越好。

係校務處登記後，一邊填簡單問卷，一邊玩吓等。先到課室聽副校長簡介學校課程，然後到另一課室見老師。課室中間拍好幾張枱，又係有一籃籃玩具。家長要坐係四圍，小朋友就係中間到玩住等老師過黎玩住傾計。momo一見我唔係旁邊坐，就走黎搵我，好彩老師俾我近少少位置坐低。不過佢最初都唔太肯坐低，我問佢做咩唔坐，佢就話搵車車，只係枱面啲玩具，冇一籃係玩具車黎...佢望咗好彩，面前有木製切切水果，於是囝囝就玩呢樣啦。老師問囝囝叫埋名，都冇答到，但都老師同佢玩住問啲水果時，佢都有答吓老師蘋果咁。有個net teacher過黎同佢傾計，就冇彩人啦。

到差唔多尾聲時，校長入咗黎。老師叫收拾，得momo同另外一個女仔有收拾。囝囝仲拍咗兩張凳，校長就送咗棉花款糖俾呢兩個小朋友，仲有讚momo添。唔知校長俾糖係咪代表收呢？！

退咗燒o既囝囝，當然可以陪daddy一齊出去慶祝生日啦！可惜趕唔切訓練囝囝唱生日歌俾hubby聽，唔係一定會仲開心啫！

試鞋先

啟思優先留位最後限期，未有offer o既情況吓，都係交咗留位費先。希望快啲有個am offer，咁就可以安心啦。

momo對運動鞋應該著埋呢季就唔啱，hubby見有coupon，諗住買定對新波鞋俾囝囝。睇吓佢幾興奮，一見到鞋就自動除自己著緊嗰對，話要試鞋，真係好搞笑~~~

康傑都出咗面試時間啦︰

12/10 10:15am 荊冕堂士德 (pm waiting)

17/10 3:15pm 顯現堂

19/10 9:30am 綠楊

26/10 10:40am 荊冕堂葵涌

1/11 4:15pm St. Cat

2/11 9:30am 海濱方方

2/11 10:00am 荃灣迦南

2/11 11:00am 嘉言

2/11 11:00am 根德園

2/11 1:30pm 劍鳴

9/11 3:10pm 學之園

30/11 12:00pm 康傑

豆豆裏的蟲蟲

momo今朝嘔咗兩三次，搞到成張大床都係，抹得我~~~

不過佢嘔咗啲痰出黎，個人好似舒服咗啲，但擔心佢番學唔知會唔會再嘔，所以都係幫佢請病假。下星期in St. Cat又要請假，呢個月要請三次假添...

瞓醒晏覺之後，應該都冇乜事啦。然後，囝囝又幫手搣毛豆，不過今日啲豆豆可能太美味，發現咗唔少蟲蟲係到郁來郁去。呢啲咁難得o既機會，一定要俾囝囝近距離接觸吓啦！不過，佢話唔鍾意喎...

影張相呀~

同momo講幫佢影張相，有時都幾合作咁即刻望住鏡頭，不過要影張靚o既，都係咁手快先得。叫佢同玩具熊一齊影，得佢自己望到鏡...哈~

收到學之園面試時間︰

12/10 10:15am 荊冕堂士德 (pm waiting)

17/10 3:15pm 顯現堂

19/10 9:30am 綠楊

26/10 10:40am 荊冕堂葵涌

1/11 4:15pm St. Cat

2/11 9:30am 海濱方方

2/11 10:00am 荃灣迦南

2/11 11:00am 嘉言

2/11 11:00am 根德園

2/11 1:30pm 劍鳴

9/11 3:10pm 學之園

嘉道理農場遊

十月中雖然尚未入秋，但都應該係時候可以多啲去郊外玩。嘉道理農場有動物睇，又有啲行徑行，真係唔錯！
不過momo一踏出門口，係屋企平台就先撞瘀咗額頭，即刻紅晒腫咗，睇見都覺得痛 ><

momo今日都行咗好多山路，只係啲梯級好大時，就唔多行到，同埋行得慢...我諗要真正挑戰行家樂徑，起碼都要等下一個秋季先得，唔係就好似今日咁，抱死我...

第四個K1 interview - 綠楊

是日面試時間0930，momo一向早起早睡，可以食埋早餐先出發。

綠楊的面試流程都好流暢，早到十五分鐘，在其中一間課室玩住玩具等叫編號，然後就以小組形式，排隊到所編的地點面試。
整個面試應該有三部分，冇一定次序。開始前主班會講番注意事項。家長要在一旁坐，幾個老師會黎拖呢組o既小朋友逐個部分咁玩。當老師一黎到momo面前，佢已經唔想去，咁唯有我陪佢出去。(主任已講明分數會調整)

老師先帶momo去其中一張枱，俾咗幅冇眼耳口鼻o既面，要佢貼番相應位置。momo先拎眼睛，位置都啱，但其他就亂貼啦...(嘩...細b都真係好難識貼到啱晒啦，如果叫佢指或指住問佢，反而會啱囉...)跟住，老師拎咗四塊木puzzle，老師砌兩塊，momo砌埋其餘兩塊(呢part其實唔幫佢砌，係一定砌到o既，仲要係車車，momo一見到佢就指住話mini~~~哈哈，老師邊會知你講緊mini cooper)。

然後，到大肌肉部分，老師要momo拎個大波波，行跨過啲紙積木磚。momo一見個波即擰晒頭(波波表面係凹凸不平，有啲吉吉嗰隻，我諗囝囝係驚拎起手個感覺...都唔明點解要用呢種波波...)，所以就算我陪埋佢行，佢都唔肯試，呢part當然冇完成啦...

最後到英文部分，見有兩個net，我諗係英文，但momo根本連坐都冇坐埋枱，係咁話驚，可能個男net有鬚...呢part考咁我都唔清楚，我見枱有pear, orange同啲玩具字母。
每個小朋友會收到波波做禮物，momo竟然擰頭話唔要...well...莫講話要主動講thank you...

綠楊呢個interview，真係大b先會做到啲task，好似momo啲咁有分離意識o既細b，又點可以自己完成晒，擺明係收大b啦...不過，momo呢一組都冇乜邊個唔係媽媽陪住出去，而囝囝冇喊，其實都收貨好叻啦！況且，都預咗綠楊唔會收佢，就當見識吓啦！

完咗interview，我哋係綠楊坊食早餐，之後帶momo去6299到，然後就同老公兩個人去拍拖，入咗鯉魚門，又去參觀郵輪碼頭，食埋鐵板晚餐先番去接囝囝，哈！好耐都冇試過！

荊冕堂士德今日收到信，得pm waiting，寫信都搏唔到有second in...不過封信可以回覆是否保留申請，咁就保留同再寫多封求位信俾校長啦。

下個星期仲有一場面試，如果十月呢輪一個offer都冇，真係要慨嘆啦~~~ 細仔加慢熱真係好慘，遇唔到一個有緣o既老師...我諗啟思都係要交留位費先好啲。

啟思留位費通告

收番本手冊，見到夾咗一堆通告，其中一張係K1優先留位o既安排，下星期五前要交。哎呀，趕唔切顯現堂出結果...咁咪要迫住交？！

呢個星期都寄咗第十五間K1申請 - 培正，要等學校寄回申請表，再係19/11或20/11交，11月尾或12月頭面試。民生張申請表我都download咗，要2號去交，但嗰日interview爆晒，要交都去晒in先諗。

第三個K1 interview - 顯現堂

顯現堂面試係平日下晝，變咗要幫momo同學校請假先去得...

成個流程要接近一小時先完成，事關呢間幼稚園o既校長會親自接見每一位申請者。入到學校，已見有好幾位小朋友係地墊上玩緊，我哋交咗面見證俾老師之後，momo都於同一地區玩吓玩具。今日佢對廚房玩具特別愛好，時有其他小朋友黎拎或一齊玩時，佢會嘗試阻止人哋拎或拎起啲蔬菜玩具緊抱胸前...
呢個時間，都有老師間唔中行過黎同momo傾吓計，問吓佢叫咩名，玩緊乜嘢咁。雖然囝囝照樣都冇答，但都有同老互動 - 用隻杯cheers，請老師飲...玩咗大約十五分鐘，老師就叫排隊上二樓參觀學校同埋副校長簡介課程。副校長係男士黎，我都係第一次見幼稚園教師團隊有男士。momo好叻仔呀，上樓梯自己扶住扶手行，完全唔駛我拖住，我諗係啟思呢個幾月訓練有素！
上到二樓中央係個大肌肉活動範圍，課室係四周。副校長話小朋友可以自己隨意玩住先，家長就集合去聽課程簡介。起初momo都自己玩咗陣，轉頭見我行開咗就即刻叫住「媽咪」「媽咪」。離遠見到我時，仲即刻行過黎抱住我對腳係咁話要抱...好彩副校長話小朋友要陪住都冇所謂啫，於是我就邊聽邊應酬呢位痴身少爺。副校長好概括講完後，各家長小朋友繼續留守係大肌肉活動範圍等候與校長面見。momo就同我玩配對蛋蛋，佢上咗手之後，好快就可以搵到相同形狀配對好。而呢個時候，有對母女就過黎一齊玩。正當momo同呢個小朋友係膠籃到拎啲蛋出黎o既時候，個女仔好唔鍾意，一手搶咗成盤配對蛋蛋，仲要擲晒落地...跟住仲出手打momo。好彩囝囝佢好專心咁砌緊佢手上o既蛋，冇見到成個過程，而且背向住個女仔，都唔知佢出手想打佢 (如果唔係，囝囝一係就喊，一係就有機會會還手)。冇打到momo我當然唔會追究，就算係，我都會帶囝囝行開，免得影響佢情緒 (仲未見校長o架嘛...) 女仔o既媽媽即刻鬧佢又打佢手，其實咁樣處理都唔好，如果呢part有老師見到係計分o既話，都唔會收呢個小朋友啦。
等到接近學校o既放學時間，老師安排咗我哋入其中一個課室繼續等...其實成十個八個小朋友，加埋家長，個課室都好滿吓，玩玩具又已經咁耐，就抱住囝囝視察吓課室啦。直至老師話學生已放學，可以去番大肌肉活動範圍到等候，所有人先有多啲活動空間。臨離時課室時，俾囝囝見到有車車玩 (弊！)，好彩今次佢肯放番低，同車車bye bye又冇事行番出課室...唔係唔駛見校長就走得啦！
終於只係等咗一陣，就叫momo個名啦。入到去坐低，校長問囝囝叫咩名(冇答)，校長話唔緊要，俾咗個入圖形o既玩具佢，叫佢將三個圖形入落去，又叫佢唔駛急 (都好順利咁完成)。然後校長拎咗個真蘋果問佢係咩黎 (答咗蘋果)，再拎橙 (猶疑冇答)，校長話係咪橙 (點頭)，再問多一次叫咩名(答Alfred)，最後叫囝囝抽禮物 (我問佢要講乜，有講thank you)。校長俾咗份環保袋同張交待幾時出結果o既通告我，就話可以離開啦。面見都應該冇兩分鐘...我叫囝囝同校長講bye bye，佢有講，仲拍番好凳，自己拎住個環保袋行出課室。

成個流程咁耐，但見校長只係兩分鐘，其實都唔知收生標準係乜？究竟等候o既時候有冇計分？Anyway，momo表現正常，冇好似in士德咁就好好啦~

開金口唱歌啦

等了又等，呢位少爺開金口唱咗隻ABC song，雖然啲英文字會甩，但係都俾我拍到video，yeah！希望之後會聽到佢唱更多歌仔，我唔駛再做人肉點唱機啦~~~

呢兩日收到三間幼稚園o既面試安排︰

12/10 10:15am 荊冕堂士德
17/10 3:15pm 顯現堂

19/10 9:30am 綠楊
26/10 10:40am 荊冕堂葵涌

1/11 4:15pm St. Cat

2/11 9:30am 海濱方方

2/11 10:00am 荃灣迦南

2/11 11:00am 嘉言

2/11 11:00am 根德園

2/11 1:30pm 劍鳴

2號真係撞到七彩，駛唔駛一日五間咁多呀？明明根德園同劍鳴都有其他日子interview，但就偏偏派咗2號俾我...照咁睇起碼要放棄兩間面試。就時間黎睇，如果揀荃灣迦南，就一定會放棄三間面試，再加上要填張好煩o既問卷，應該揀呢間去面試o既機會都唔大。劍鳴係時間上完全冇相撞，雖然收生人數少，但都可以去見識吓。嘉言同根德園，我偏向去根德園見識。至於方方去唔去好？會唔會仔仔一日in三場太辛苦？定俾佢當warm up好？

表妹來作客

今日放假，但hubby都要番工，咁momo唯有留係屋企玩啦，好彩有表妹過黎玩咗陣。表妹好叻女呀，13個月就識行啦，仲識得講好多嘢，啲音都好準添！有哥哥又係女仔果然學得快啲！

第二個K1 interview - 荊冕堂士德

朝早等momo食完早餐，再等埋hubby起身，就出發去面試啦。雖然係第二個K1 interview，但其實呢個先係今年真正報名o既第一場。

係學校登記咗之後，先去聖堂到坐咗一陣，然後就跟住一組一組等安排上課室。一個課室有幾張枱，每枱三個小朋友，枱面有三籃玩具， 玩住就有老師行埋黎同小朋友傾計。一位家長坐小朋友隔離，另一個要企係課室周圍。我哋見枱面有籃車仔，於是就俾momo玩住。

老師先問咗同枱一個女仔，個小朋友表現好好，老師o既問題都答到晒，有多謝老師禮物。然後老師過黎，同momo打招呼，問佢叫咩名（唔答，玩車），老師再問佢係咪叫倬毅（眼睛繼續望住車玩），老師話倬毅可唔可以指鼻哥俾老師睇（唔理，玩車），讚佢玩車叻再問（都係玩車），老師拎六七塊積木叫佢疊高（冇理），老師示範（momo疊咗三塊，之後唔砌）老師拎塊綠色問係乜顏色（唔答，同佢都唔識答）老師問我佢係屋企講唔講嘢，我話講，momo就話：掛住玩車，老師同我自己笑咗，老師拎咗大中小熊仔，叫momo拎最大隻放係車車到（momo最初唔理，跟住隨手拎最近佢嗰隻，放去車車到），老師送禮物俾momo（最初唔想要，接咗老師叫講多謝唔理，老師走咗就講啦）。同枱另一位小朋友都係答晒老師問題，咁比較，其實都知momo冇機會...

點知最後老師叫所有小朋友收玩具拍好凳，就係呢個時候，momo唔單止唔收，仲要架架拎番出黎話唔好，我話要bye bye車車，佢就開始喊，幫佢放咗一兩架，就喊大聲啲添！唔好話拍凳，連tidy up都做唔到。最後，有下一輪小朋友入黎，我同佢講放低車，俾餅餅你食，佢即刻收聲仲放低 （激死）

上星期hubby去簡介會，校長俾咗提示，話小朋友要有禮貌，肯講嘢同埋眼神交流，momo冇樣做到，仲要扭計，我都未見過momo表現成咁，就算N班啲interview都唔係咁的...hubby同我都失望o架。尤其係hubby，佢真係好心儀呢間幼稚園...不過事前我都有同hubby講過，第一場interview只可以當熱身，都唔可以期望momo有咩表現，始終佢慢熱，就算熟人都未必個個睬，可況係陌生o既老師...但係如果心儀嗰啲幼稚園都係咁in法，咁真係間間都bye bye

同hubby分析過，可能唔應該揀車車俾佢玩，佢太專注玩心愛o既玩具車，結果老師問乜都唔理。同埋呢種玩住傾計o既面試形式唔係太啱momo...

完咗面試，一齊食咗啲嘢，hubby就番工。我就同momo去參觀學之園後回家。番到屋企諗住幫momo寫一封求位信，係未出2nd in通知前寄，起碼搏有得2nd in家長同小朋友...

再收到一間幼稚園面試信︰

12/10 10:15am 荊冕堂士德
17/10 3:15pm 顯現堂

19/10 9:30am 綠楊
26/10 10:40am 荊冕堂葵涌

1/11 4:15pm St. Cat

2/11 9:30am 海濱方方

2/11 11:00am 嘉言

褲仔瀨濕咗

momo未戒片，番學係著學習褲o既，之前試過茶點時間，倒瀉水整濕咗褲仔要換。不過今日見佢換咗自己條後備褲，都以為佢係倒瀉水。但我一拎佢條運動褲出黎，就聞到係尿味...咁都瀨濕咗？！或者佢去洗水間vv時痾到濕咗啦~

巴士展

話說中秋節翌日同Issac以車會友之後，momo之後都有提話要搵Issac，於是下晝就帶佢去Dr. Philip屋企。Hubby就同Philip打波，momo就可以同Issac玩...但點知我哋去到Issac瞓咗覺，Sophia又瞓咗，momo只可以自己玩玩具...
兩個爸爸打完波番黎，Issac都仲未起身。原本諗住約佢哋去巴士展，咁唯有等吓，睇吓Issac有冇機會趕得切啦...
終於，我哋都可以係完場之前睇到一陣...

25 months old

朝早同hubby兩個分道揚鑣，我去監考，佢去K1簡介會，而momo就送去6299到玩咗成個朝早。因為SAT個試delay咗先開考，搞到我由朝早六點幾出門口到下晝兩點幾先番到屋企樓下...中間冇食過嘢呀，勁肚餓！hubby帶咗momo去銅鑼灣同啲舊同事聚舊，我企咗成朝，食完飯都成三點幾，根本唔想去咁遠，於是我就係屋企hea住等佢哋番黎，再一齊入屯門食齋。

momo廿五個月大啦，番咗學成個月，不過就繼續送番學都係喊住叫mami，未克服到分離感。但番學佢係開心o既，亦投入學校生活。只係戒片仍未有進展...都係再等吓啦...

面試月即將開始

momo番學又去搞報名o既嘢，先去郵局寄St. Cat份報名表，然後就去交第十四間K1申請 - 嘉言，即時安排面試日期，暫時冇撞︰

12/10 10:15am 荊冕堂士德
17/10 3:15pm 顯現堂

19/10 9:30am 綠楊
26/10 10:40am 荊冕堂葵涌

1/11 4:15pm St. Cat

2/11 11:00am 嘉言

十月4個面試，下星期就開始啦~ 先係hubby心儀o既士德，但係第一次面試，都係唔好太大期望好啲...

開心小樂手

等咗成個幾星期，終於收到st. Cat o既回覆，面試時間暫時都冇相撞。

12/10 10:15am 荊冕堂士德
17/10 3:15pm 顯現堂

19/10 9:30am 綠楊
26/10 10:40am 荊冕堂葵涌

1/11 4:15pm St. Cat

hubby上司送咗個鼓、琴&結他多合一o既玩具俾momo做生日禮物。夜晚佢同daddy玩時，超開心咁拎住搖，真係好搞笑！唔知將來佢會鍾意邊種樂器呢？

首次坐校車

呢個月開始，momo就會搭校巴番學放學。之前希望等佢適應番學，就親自接送佢一個月。學校生活就叫適應咗啦，只係送番學嗰種分離感，似乎未可以克服，所以我都預咗今日佢第一日搭校車會喊...

果然，當校車ee接手就即喊住叫mami，真係好淒涼，但我知道佢番學就唔會再喊，所以要忍住。放學回程就冇事，校車ee抱佢落車，佢仲同我講搭校巴添~

叫爸媽全名

之前教momo講自己中文全名，教咗好多都係唔多講到，但番咗學一兩個星期，佢就已經可以好順口講到自己全名。唔知係咪大個咗啲o既關係，daddy同mami個全名，就只係同佢講兩三次，佢就已經記得。仲要每次問佢都即刻答到，真係叻仔！
24個月，講到自己中英文名、爸媽名、年齡、居住地區同性別，其實已經收貨。只係到時面試佢肯唔肯答，又係另一回事呢...

懂漱口啦

今日又報多兩間K1，海濱方方(第十二間)就親身遞交，而根德園(第十三間)就郵寄資料取報名表。

早幾日經過我示範之後，momo學識漱口啦，但係都唔係晚晚都肯做呢個動作，刷牙亦未肯主動。不過，都可以考慮買啲吞得o既牙膏俾佢，試吓會唔會提高動機。

爬蟲館

屯門公園裏面有個爬蟲館，可以俾巿民免費欣賞啲爬蟲類動物。雖然地方細細，但種類一啲都唔少o架！momo最鍾意應該係啲大龜，睇咗幾次，但其他爬蟲佢就興趣冇咁大，應該係未識欣賞住...

有一段日子冇黎屯門公園，估唔到週末而家淪落到好似啲內地公園咁，四圍都有人開個擴音器拎住支咪係到唱歌...最慘仲係啲充滿北方口音o既國語歌，嘩...真係唔識欣賞囉，可唔可以要番個寧靜o既公園呀，唔該！唔講以為自己番咗內地...

N班生日會

學校每個月都有一次生日會，momo第一個生日會就做主角喇，我諗佢應該好開心！學校頂生日帽都幾靚喎~

今日一次過報咗兩間K1，多得細佬同太太幫表弟交N表時順便交埋momo張K1表，我先唔駛自己去交其中一間。佢哋兩個昨晚就去排隊啦，真係辛苦晒，第十間K1申請表 - 綠楊。自己就去咗交第十一間K1申請表 - 荃灣迦南。

更新面試時間為︰

12/10 10:15am 荊冕堂士德
17/10 3:15pm 顯現堂

19/10 9:30am 綠楊
26/10 10:40am 荊冕堂葵涌

開咗Thomas同其中幾條車軌俾囝囝玩，佢一見火車自己郁，即刻玩到冇晒電為止...

K1報名進度

因為颱風關係，原定星期一去交第九間K1申請表 - 荊冕堂士德，改到昨天下午先辦妥。唔覺唔覺就報咗接近十間。呢個星期仲會交多兩間，預計會交約十五間申請表。可能好多人會覺得太誇張，好怪獸。但事實係momo係9月細仔，再加上佢慢熱，實在需要多啲實戰機會...而且報咗名唔一定有得面試，好多時面試時間會相撞，所以最後可能只係去到十間左右...

有啲學校交表時即時出埋面試時間，暫時日期如下︰
12/10 10:15am 荊冕堂士德
17/10 3:15pm 顯現堂
26/10 10:40am 荊冕堂葵涌

颱風下告假

天兔比相像中威力冇咁大，雖然昨晚發出8號風球警告，但朝早9點20分已改發3號強風訊號。本應諗住momo都應該唔駛番學啦，可惜天文台宣佈如果10點半前取消警告o既話，咁下午班就要復課...誰不知竟然係10點25分取消所有熱帶氣旋警告！爭5分鐘咋喎？！

不過，因為囝囝成12點先瞓著，再加上佢鼻水不斷流，咁不如就請假留家休息啦...如是者，未番夠一個月學就請咗假啦...

字母手抓板

天兔殺到黎，是日不宜外出，留係屋企玩吓新買o既手抓板。雖然momo未識晒A-Z，但字母相關o既詞語，佢就好多都認得。最搞笑係...B - Boy, 佢指住唔係講Boy, 係講Alfred, 哈哈~