家事小幫手之搣豆豆

第二日正式上學，momo送到校門時都是喊的，但放學上樓梯都冇喊lu。我見有啲小朋友接放學時，一見到家人又即喊，但囝囝見到我反而好開心。我問佢番學開唔開心，佢答我開心，咁已經好足夠啦。

學校每個星期尾都會派手冊回家，呢個星期，momo o既表現真係拍晒手掌！所有項目全剔！好叻仔丫！咁即係呢兩日佢都好享受學校生活，又聽老師話，乖仔！

送咗momo番學之後，就去交第一間K1 o既申請表 - 顯現堂，順便去街巿買咗囝囝最鍾意o既豆豆。而家佢會一齊幫手，我會先將毛豆搣開一半，然後佢就會將啲豆搣出黎，再放去碗入面。呢個活動一舉多得︰

1. 親子活動 - 我唔駛留係廚房做晒啲功夫，囝囝有得參與

2. 訓練小肌肉 - 唔一定要買好多玩具，呢樣已經係一個好好o既活動訓練佢手眼協調

3. 家事小幫手 - 簡簡單單，又易成功，幫到媽媽最開心

兩歲生日正式上學

估唔到momo兩歲生日，就要面對人生一大挑戰 - 獨自上課！今日係正式上課天，冇得再陪上堂，囝囝要自己番足三個小時。雖然之前同佢睇故事書講上學去，不過我都預咗作用唔大。呢個咁痴身o既小朋友，點知會爆喊...係視乎佢喊幾耐啫...

hubby同我一齊送到佢去學校門口，園長親自抱起佢行落樓梯，即時聽到佢大喊媽咪...會唔會喊到攰瞓著呢？事關佢朝早7點幾起身都未瞓過...不過我答應佢放學時會買定生日蛋糕接佢，希望佢記得唔好喊咁耐啦~~~

離開之後，hubby上深圳開會，我就去物色生日蛋糕。下晝天氣唔好，持續落雨，考慮咗好耐拎唔拎蛋糕，因為我好肯定放學個情境係拎書包+抱momo+拎傘子+拎蛋糕+五分鐘路程包扶手電梯行斜路上巴士...明知會好難搞，但為咗承諾同為囝囝打氣，做一次鐵人媽媽都要！！

接放學時，見到佢由老師拖住上樓梯都冇喊，嗰刻心裏面已大讚佢叻仔！咁啱班主任係門口，我問老師佢有冇喊，老師話佢喊咗一陣，之後都冇再喊啦，不過就好攰咁 (由朝到而家都未瞓...)。我俾momo睇有生日蛋糕，原本頗具疲憊o既佢即刻話想食，個樣開心番晒。當然，蛋糕要等埋daddy先一齊切，於是我抱住佢踏上回程之路，雨勢一直都冇細到，冇諗過咁都俾我捱到上巴士...上到巴士，囝囝都即刻瞓著...咁即係代表落車到番屋企段路仲高難度...momo，第時大個要錫多啲mama！

成朝未瞓，仲要上咗兩個幾鐘堂，累極的小朋友瞓到接近晚飯，hubby番到先醒。隨即落樓下商場食大餐，再番上屋企切蛋糕。囝囝見到個蛋糕已經即刻想吞入口咁滯，等唱咗生日歌、吹完蠟燭就急不及待要吃。哈哈，個栗子mini真係足足俾佢差唔多食咗一半。

兩歲大個仔，雖然都未戒到片，身型又偏瘦，不過佢食得是福，情緒言語認知發展自理能力都令人滿意，是大家眼中的乖孩子！有這樣的一個寶貝兒子，這兩年的全職辛勞總沒白費~~~

新生適應日第二天

今日係番學之前氹到momo瞓咗晏覺先，所以可以參與活動。不過，其實都仲係下畫一點幾先瞓，其實係正式番學o既時間...點好呢？如果唔瞓覺番學，就算頂到放學，都攰死啦。但囝囝自從只小睡一次之後，好多時就算朝早七、八點起身，都會一路到下午一、二、三點先瞓，一瞓就兩三個鐘...真係要諗諗，係番學前要佢瞓一陣。

去到課室，當然要點名同埋要同老師講午安啦，然後就去另一個課室到唱遊。老師今次叫家長企係課室外面，小朋友入去圍成半圈咁坐...之但係momo即刻死命咁拖住我唔肯自己入去，仲要喊晒口...老師見到咁，就俾我同另一個爸爸 (佢個囡囡又係喊)陪住入去。囝囝有我抱住坐，就梗係唔驚啦。最初老師一齊帶唱歌時，啲小朋友都ok，但過咗幾分鐘後，就開始有啲喊要搵媽媽，個場面都有啲混亂。不過都有幾個都完全冇事，可以自己坐定定。有啲真係安撫唔到o既，老師都有俾啲媽媽入黎。

呢個時候，我係到諗...真係辛苦晒啲老師，聽日所有小朋友都要自己番學，到時肯定哭聲大合奏，咁混亂可以點？！

唱遊完畢又係洗手間時間，點知momo唔肯拖住行，扭我抱，結果跟唔到條隊，冇入到洗手間...番到課室就係茶點時間，momo以為今日又係食蛋糕，點知係食三文治。最初佢唔要，話想食蛋糕，於是我話：「你唔要，咁請媽媽食。」我就扮放入口，佢即刻好緊張話要番，好乖咁食晒...走o既時候，每個小朋友都有汽球拎走。

明天momo兩歲，亦係正式自己上學，三小時。希望佢早日適應，喊少啲... (雖則我預咗佢爆喊...)

新生適應日第一天

正式上課前有兩天適應日是家長可以陪同，momo編咗第二節上，由三點半到四點半。出發時仲係精神奕奕，不過冇瞓晏覺o既佢，一上巴士就瞓著咗，結果入到課室都係瞓覺mode，全班得佢一個係咁...但老師都好好，話唔好叫醒佢，可以慢慢調節。小朋友玩咗一陣玩具之後，老師就叫小朋友排隊去另一個課室，咁我就緊係抱住佢去啦。老師請小朋友坐係第一排，家長坐後面。呢個時候，除咗三位班主任之外，課室仲有另外兩位老師幫手，講咗個小白兔送紅蘿蔔o既故事。momo就冇份聽啦，去到尾聲就醒咗。
然後老師請小朋友排隊去洗手間，再番課室食茶點。哈哈，囝囝冇錯過最重要o既茶點時間，仲要係佢鍾意食o既蛋糕添！佢真係醒得合時！

First day of school in life

今天又是每年莘莘學子的開學日，而momo今年都加入呢個行列。雖然今日唔係佢正式上學，但都要穿整齊校服回校，所以都係佢生命裏面o既首天在學。

其實今日只係番去拎編班證同開學通告、見吓班主任、參觀班房、了解一啲注意事項咁，不過，因為momo是下午班，hubby要工作就不能同行啦...

下午有兩組幼兒小組，momo嗰班有27個學生，佢被編做蘋果組，張枱係課室o既前右方，個位對正老師，都幾好喎！
係個hall到聽到一半注意事項時，momo頂唔順瞓咗，如是者我要抱佢番屋企了...時間係兩點半左右...咁佢點番下午班呀？！早起早睡的孩子，有考驗了！

首幅有意思的畫

估唔到23個月o既momo，可以用線條型狀畫到架車出黎...真係有車身同車輪o架！其實佢仲可以係個車頂再畫多個頂做的士。我覺得囝囝係呢方面係發展得幾好，好多同佢月齡o既小朋友，只係識用筆不停打圈畫，但囝囝竟然見我哋畫得多 (實情係成日叫我同hubby畫車車...)，就畫到出黎，真係可以考慮吓係呢方面栽培佢！

3位處女座之星的首個生日派對

momo、臻臻表弟同子澄表妹都係處女座，大家o既生日日期都好近，所以由今年開始，可以年年一齊搞生日派對。場地都係揀番會所，不過book咗另一個房。娘家齊集就必然啦，仲有邀請埋momo爺爺嫲嫲同埋表弟o既公公婆婆。大家影吓相，食吓蛋糕同小食，短短兩小時就咁完啦~

祝三位小朋友快高長大、健康快樂、幸福常滿~~~

TeacherZ聚

暑假完結前，真係特別多同啲現職老師o既聚會。雖然席上得番一個老師，但都冇損我哋呢班當年一齊實習o既student teacher o既感情。

歡迎Ivy離開教學生涯，加入全職媽媽o既行列！又要恭喜Abby快將榮升第二任媽媽！希望下次聚又聽到更多好消息~~~

Linda ee的新居

終於o係暑假完結前約到探訪Linda ee的新居啦~ 雖然只係兩房，但都夠兩個囡囡活動呀。咁當然同佢哋間‘渡假屋’係冇得比o架啦，但至少兩姊妹可以一齊生活，唔駛再成日分開嘛！

ee仲請momo食生日蛋糕添，真係開心死佢~~~

家事小幫手之畢米

家事小幫手又出動啦，今日幫mama畢米煮飯，真係一試愛上，仲會識自己講︰一次 - 即係要求再畢多一次落飯煲到。然後又會自己放番好個量杯同合蓋，非常有手尾！我諗唔駛幾耐，佢學識埋洗米之後，煲飯呢個item就可以交俾囝囝負責啦~~~

今日收到卓思結果︰waiting，咁要努力幫momo報多幾間學校先得...

咀嚼食物

momo越來越鍾意啲飯餸可以咬同o趙，尤其係肉類，佢好鍾意咬粒粒肉。有時剪到啲餸太碎，佢返而唔多肯食，要食大人碗入面啲餸 (其實係一模一樣o既餸)...其實真係件好事，起碼唔駛剪得咁辛苦，而且出街食會方便好多。

食方面已經可以自己搞掂，只要學識埋揸筷子，咁就連粉麵都可以唔駛再剪啦~

開學前聚

momo今日好遲先瞓晏覺，差啲就join唔到舊同事姊妹o既開學前聚啦~ 其實我哋去到佢哋都食完飯啦，我同囝囝真係坐咗陣咋。momo開始每次都係提示下會叫人，雖然有時唔會咁順灘咁講，但係都開始變得肯多說話啦~

希望大家同囝囝都開學順利！

首次吃紅火龍果

 火龍果試過，但紅色火龍果，momo都係第一次食。睇囝囝個樣就知佢鍾唔鍾意食啦~~~

好久不見的中同

舊年年尾諗住聚吓，點知我出席唔到，所以一拖，就拖到今日先有機會見面...足足兩年冇見...上次見已經係Kevin同Clarice o既婚宴，連momo出咗世，佢哋都未見過...

終於全部都已婚人仕，其中三對已有小朋友，仲有一對就快榮升爸媽喇，真係越黎越熱鬧丫~ 希望keep住每年都會見到起碼一次就好啦~~~

第一個K1 interview - 卓思

上午第一次一家三口入戲院睇戲，比起之前套怪獸大學，momo明顯鍾意睇呢套多啲！一開始就不斷講飛機，嘩，好興奮咁。當然，到散場時，佢又係好唔捨得咁，喊晒口係咁話要睇...而我呢，就短短一個月之內入咗三次戲院，哈哈，一係就兩年都冇睇，一睇就咁多次~

下午就同momo去首次K1 interview，呢間係上年報咗N班，但係waiting可以係今年優先面試o既。去到學校登記後，等咗一陣就入課堂。momo一見到枱面有玩具車，已經二話不說咁拎上手玩。呢個時候，我見momo手到仲有自己帶去o既玩具車，就叫佢放番入我個袋先繼續玩。然後老師指住我，問momo係邊個黎。囝囝玩緊車，所以我都出口問佢，咁佢都答咗老師係媽咪。老師再指住hubby問，囝囝就即刻話係daddy。我叫囝囝要排番好啲車車先再玩其他玩具，老師就順勢拎起個漢堡包問佢係乜，囝囝就話係包包，仲即席示範點食...老師再拎匙羮問佢，囝囝就答係羮。跟住囝囝繼續玩車車，老師就問我哋如果上午班額滿，下午班考唔考慮。到最後就俾咗支益力多momo，momo應該唔知係乜，但都接咗，然後我叫佢講thank you同bye bye老師。

離開學校後，hubby就話今日囝囝表現都幾好。我就覺得佢唔驚又答晒老師問題已收貨，只係作為前教師，其實囝囝唔係咁突出，可能好多小朋友都做到，所以最後收唔收都係未知之數...

摸貓貓

下午約咗大學師兄聚舊，佢居企養咗兩隻貓、一隻龜同一條魚。鍾意小動物o既momo有福啦，可以一次過睇到咁多動物。最初佢一見到貓貓就話驚驚唔敢摸，但又好想同貓貓玩。佢好慷慨咁將自己啲車車俾貓貓玩，佢見到貓貓係到撥吓撥吓，即刻好開心咁笑晒。當然，熟習咗之後，佢成功咁摸貓貓，又同貓貓握握手添！

自己玩泡泡槍

今日等到好天可以去平台遊樂場玩一陣，見咁耐冇玩bubbles，就同momo拎支泡泡槍一齊玩。一如以往，囝囝一知道有得玩bubbles就好開心，今日仲好主動咁自己囉住玩。不過，佢仲唔係好夠力控制個板機，所以好多時都係叫我幫手按住。

短暫分離成功

今日要去覆診，所以帶咗momo去6299到，順便就當一次短暫分離o既訓練。道別時，囝囝有想跟住我的意欲，我蹲低同佢講︰「你喺爺爺嫲嫲到玩車車，mama要出去一陣，大約三個鐘就番黎接你。」然後99就拖住佢入番客廳，我就順勢步出大門。而我行至電梯大堂直到步入電梯都冇聽到佢喊聲，應該都算成功！

覆診報告正常，抽血後六星期又再覆診...番到6299到，momo原本正在午睡，我出現係客廳時，佢已睜開雙眼，時間剛好，起碼唔會瞓醒又搵唔到mama。

久違bb車

其實我一向好少用bb車，momo未識行o既時候，都係用揹帶同hip seat多，bb車最多係落樓下超巿買餸時先用。囝囝識行之後，更加係一個月都坐唔到一次咁滯...今日試吓俾佢坐吓出街，又好似好有新鮮感咁，好彩冇扭話唔坐啫...

買melon，等daddy

每次去到超級巿場，momo總係想買西瓜，不過大大個西瓜，我哋兩母子點食到？所以我同囝囝講要等daddy先買，於是佢一提西瓜，都會講等daddy。今日買咗西瓜番黎，但hubby唔係香港，所以momo要再等吓先有得吃啦~