告假第三天

為咗momo可以再復原好啲，今日都係請假冇番學。不過，兩母子兩日都冇出過街...點都要去買餸補給，咁就順便同囝囝去平台遊樂場玩一陣，起碼運動吓都快啲好。只係今日都冇乜太陽，見有風都閃，唔係又吹親就大件事...

又告假一天

斷斷續續發燒至今午終於都退晒，朝早係咁扭計，到夜晚都終於有番啲胃口。見佢退咗燒，就連其他藥都停埋。不過，個人狀態都唔好，當然要請多一日假休息。
觀乎今次係咁燒兩三日，又有咳又鼻水，應該唔係普通感冒，而係中咗流感。至於係邊到惹番黎，就真係考究唔到啦...
總之肯食番嘢就唔駛再擔心喇！

告假一天

今日都仍有燒，所以一定要向學校請假，留家休息。亦都因為仲發燒，我都唔敢帶佢落街買餸，都係煲粥俾囝囝食。其實momo都仲冇咩胃口，所以都食得唔多，再加上食咗藥，個人又攰，同埋好嗲，冇心機玩，仲瞓咗兩次晏覺。
由於冇買餸o既關係，變相夜晚要靠hubby買外賣番黎吃…

28 months old

發燒中的第28個月。
朝早雖然momo退咗燒，但之前佢發燒，都係食一次退燒藥都ok，同埋都冇上到39度。所以，今次穩陣啲，要去睇醫生。
番咗學四個月，第一次要病到睇醫生食藥，其實佢都好叻仔㗎啦。雖然我知道囝囝真係好唔鍾意食藥，但點都要拎定好啲。
結果醫生診斷為感冒，開咗兩支退燒藥同四支咳水鼻水藥。呢次真大獲！簡直係食藥大作戰！
誰知今次發燒真係唔同平時，係斷斷續續咁退完又燒，但又唔見啲鼻水出黎…估計momo自己免疫系統都好努力咁打緊仗。
不過係咁燒個人冇晒精神，仲要唔係點食嘢，真係陰公豬囉！對唔住丫，momo，昨天真係唔應該帶你出去，而家要你咁辛苦，一定唔會有下次，mami都好後悔＞＜

2014第一燒

弊！估唔到2014過咗幾日，momo就發燒啦！朝早係屋企玩都好正常，正當諗住同佢出街時，就摸到佢好熱，量體溫已經38.5度，就俾咗次退燒藥佢食啦。到瞓醒晏覺見佢退咗燒，就去大帽山搵hubby正在bbq的朋友仔，只不過，番到屋企又再燒過，又要再食退燒藥，仲冇乜胃口，夜晚又瞓得唔好，到半夜仲度過成39度！都唯有再食退燒藥，到明天再去睇醫生啦。

表表弟百日宴

今日係hubby表妹個囝囝(咁應該係表表弟啦)o既百日宴，momo放學食完飯即刻瞓陣，等hubby放工揸車入黃金海岸出席個宴。momo去到食咗蛋糕，到最後又食咗水果。well...明明放學已食過飯，仲可以食到咁多嘢嘅？

長假後開學

一連九天的假期完結，momo今日要番學啦。小朋友通常長假期完咗都唔想番學，momo佢就無論係唔係長假，佢出門口都係話唔想番學，唔捨得媽咪。都番咗四個月學，坐校車都三個月，都係克服唔到同mama分離嗰刻，上到校車都係喊住口叫媽咪，都冇咩可以做到...其實佢都係喊一陣，番到學校就好開心o既，只係要同我分開佢就唔想啫...希望佢可以再大個仔啲，唔會喊到學期尾啦！

青蛙車

1314呢個重要交接，當然繼續要同最重要o既人一齊啦。仲搵搵momo喜歡的玩伴Issac一起玩。哈！呢個仔一見到人哋架bubble青蛙車就愛不釋手，係咁推住黎玩，最後dr. Philip仲送埋俾佢玩添！真係好唔客氣嘅呢~~~

1314除夕倒數

2013完結，迎接2014。1314喻意一生一世，倒數過後，亦是我們相愛14年的日子。除夕夜留守家中吃大餐，再加一個momo至愛的生日蛋糕(hubby買咗kitty呀~)，滿足矣！

與囝囝分開活動

今日有三場活動，但因為時間關係，我只可出席TeacherZ的午餐聚與中同Ellen的婚禮，而momo同hubby就去咗莊聚。其實我都好想去莊聚o架，但係中同結婚一生人一次，都要去祝賀吓o既，惟有少去一年莊聚啦...
婚禮地點係大圍o既神學院，TeacherZ成員都就我係沙田食lunch，我先趕得到見埋佢哋先去婚禮。今日見番舊校部分學生，佢哋miss結婚，又點會錯過機會見吓婚禮場面呀，哈哈~
影咗大合照之後，hubby就同momo揸車黎接我，順便車埋舊同事彬family走。
似乎今日momo唔跟我係啱o既，佢去大食會，又有蛋糕吃，仲有小朋友同佢玩！

絲婚紀念日

結婚四週年，慶祝節目當然唔少得momo份啦！下午出發到黃金海岸到行吓，仲去埋酒店個遊樂場到玩咗陣添。滿足咗momo之後，就去尖沙咀東海食大餐 (實情係我指定今日要有雪糕火鍋環節，所以要搵個有haagen-dazs嘅商場吃晚飯)，我哋第二次黎呢到食結婚週年餐呀，哈哈~
重點節目係之後嘅雪糕火鍋，momo都唔執輸，連吃了四個雪糕球。如果唔係佢仲有啲鼻水咁，可能半盤落咗佢肚啦！食飽飽仲可以去同kuma熊影相先回家添！

文化聖誕

聖誕節唔想去迫，聖誕大餐又貴，一於去個文化氣息嘅地方玩。而且，今日係星期三，博物館唔駛入場費，真係抵晒！
文化博物館裏面個兒童展館都唔錯，雖然唔算多適合囝囝個年紀玩嘅嘢，但地方細細，都幾多唔同主題，可以再大個仔啲再黎過。

因為囝囝眼瞓關係，行咗一個鐘就唔夠，就去咗大圍食tea兼買材料，今晚自家聖誕邊爐大餐，yeah~~ Daddy特准提早將tomica開光，momo快樂玩車過聖誕！其他禮物就待明天才拆吧!

平安夜蠔聚

今晚主場招待朋友，海鮮已一早由朋友訂好，我們只需提供熱盤及飲品。momo今日收到㗎搖控車，仲即刻係咁玩添！原本以為Issac同Sophia會黎，囝囝期待咗好耐一齊玩，但Philip叔叔帶唔到佢哋嚟，所以又得囝囝一個小朋友同咁多大人玩。

聯歡健康有營小食

momo第一次o既聖誕聯歡會，又點少得mama親自炮製o既健康有營小食呢？除咗聖誕曲奇，囝囝嘅派對小食係南瓜粟米薯蓉。呢幾樣材料都係小朋友鍾意嘅，一定食得健康又開心。難得我可以用上午嘅時間幫囝囝預備，點都唔會就咁買啲現成嘅零食，或者菠蘿腸仔、啫喱糖咁就算。而且，呢啲都冇乜營養。所以，當知道每個小朋友都預備小食回校分享時，就已決定非薯蓉莫屬，工夫又唔多，簡簡單單，但夠晒營養。

將來如果都有時間，可以整壽司，造型三文治呢啲，菠蘿腸就no way啦，留番啲冇時間預備嘅媽咪整啦。我堅持自己為小朋友整嘅嘢係健康有營，平時囝囝都冇乜機會接觸零食，就算係餅乾都好少食，希望佢由細開始都唔會有食零食嘅習慣。呢啲多食冇益嘅嘢，係唔會係屋企搵到！朋友仔請嘅就另一件事。

聖誕曲奇工場

momo明天學校聖誕聯歡會，一於同佢一齊整啲曲奇送俾班上嘅同學仔同老師！上一次整曲奇，囝囝都係幫手印模部分。今次，佢就多咗部分可以參與：壓麵團、將曲奇放上焗盤、入袋等。咁幫得手，當然都要整多啲作獎勵用途啦！

9月bb bbq

約好近Christmas黎個bbq聚會，地點就係其中一個媽媽嘅會所到。呢到環境唔錯，隔離就係playground，小朋友們可以係到玩個夠本！
其實小朋友都唔會點參與bbq，而且呢到個爐係gas grill,跟本係放晒啲食物上去燒熟就食得。再加上有幾個工人姐姐係到坐陣，大人都唔駛點郁手就有得吃。momo今日係咁玩小朋友帶黎嘅三輪車，雖然佢未識踏，但都好努力咁自己用腳黎行前。去到最尾影完bb合照，囝囝仲扭晒計唔想走！(咪又係到眼瞓時間嘅原故囉~~)

正手用匙

momo一向用匙都係反手，佢公公曾經叫我要糾正囝囝，要教佢用番正手。其實，正手佢唔係唔識，不過通常一陣就會用番反手。而且，正手佢真係畢得慢好多，又冇咁乾淨，所以我都唔諗住刻意去改。我覺得係因為佢小肌肉未發展得好好，所以正手佢用得冇咁順心。既然係咁，唔需要急於一時，最終一日佢都會正手用匙o既。

老師送的聖誕禮物

學校老師有聖誕禮物送俾momo，我昅到有puzzle。不過，諗住叫佢到boxing day先拆~

第一次成功用小尿兜去vv

momo戒片一直未有突破性o既進展，買咗小尿兜佢試，都試咗好多耐唔肯去。次次問佢都話冇，企到前面都係唔得，有時仲好抗拒...間中坐廁板反而會去到。其實我都唔係要求佢識自己講去vv，只係希望帶佢去都會去到，但都仲係未得...今日突然成功去到一次，我即刻大讚佢，佢自己都拍手讚自己。如果可以繼續到就好啦，加油小朋友！

似模似樣砌積木

momo開始可以自己用積木砌啲有意思o既嘢，再唔係只會不斷疊高，或隨意擺放。

表兄弟妹的聖誕禮物

今晚娘家做節，趕得切整咗幾頂帽俾momo表哥，表弟同表妹做聖誕禮物。呢三頂用嘅都係同款冷，而鉤個款都係一樣㗎，只係女仔款個邊唔同，我自己都覺得幾靚，嘻嘻！

今年的面試結果

今日收到劍鳴o既信，waiting係意料之中，爭培正就出晒結果，不過要等到明年二月，況且，機會都好微o架啦，都唔預會有offer。

in咗咁多間，最後係第一輪結果取錄o既只有兩間。有四間係waiting，而其中兩間我諗就算等到明年都唔會收到call waiting。睇吓寫咗兩封求位信o既士德會唔會有位啦，唔係就疊埋心水讀顯現堂！

12/10 10:15am 荊冕堂士德 (pm waiting)

17/10 3:15pm 顯現堂 (am offer)

19/10 9:30am 綠楊 (rejected)

26/10 10:40am 荊冕堂葵涌 (waiting)

1/11 4:15pm St. Cat (pm waiting)

2/11 9:30am 海濱方方 (冇去in)

2/11 10:00am 荃灣迦南 (冇去in)

2/11 11:00am 嘉言 (冇去in)

2/11 11:00am 根德園 (rejected)

2/11 1:30pm 劍鳴 (waiting)

9/11 3:10pm 學之園 (rejected)

30/11 12:00pm 康傑 (pm offer)

30/11 5:00pm 培正

momo人生第一次台上表演

今日學校聖誕表演，全校小朋友分班別都有表演節目，仲要去到浸大會堂到舉行，真係好大型咁呀~

呢日係冇校車接送，而且小朋友要預早一個多小時去到彩排，所以都係揸車去快啲。送咗momo去彩排之後，我同！hubby就去canteen食個早餐消磨時間，眼見成個canteen都係幼稚園啲家長，真係墟冚。入場時，見啲小朋友已換晒服裝準備坐咗係前排，但我哋搵唔到momo，園長話小組班小朋友係化妝間到休息。

到表演節目開始，第一場聖景，講番耶穌基督誕生時嘅情況，高班啲小朋友真係表現唔錯！輪到momo嗰班表演時，我哋係到諗佢會唔會好驚會喊，但見到佢都跟住老師做動作，仲肯戴住帽子到完場，真係要俾個叻佢！畢竟只係得兩歲三個月嘛！

成個節目完晒後，hubby提議去赤柱食lunch，於是經由紅隧同香港仔隧道出發。我見一場嚟到，就試吓順便搵Ceci同小高見面。小高就好熱情咁邀請我哋到校園參觀，咁我哋食完lunch就去咗探班喇！

後來，小高知道momo好鍾意食蛋糕，仲請埋我哋去佢屋企到嘆，仲又食又拎添呀！真係多謝晒小高呀！

離開時，擔心塞車，於是取道柴灣方向，經東隧同獅隧去沙田食晚飯兼睇燈飾。最後經城隧返家，一日過五條隧道，破晒紀錄呀!

（momo啲頭髮真係好啡，拍埋我到影相好明顯。其實bb嗰陣，都有好多朋友仔話佢白雪雪又金毛，好似mix，唔知再大啲係咪仲係咁，咪俾訓導捉佢染髮～～）

近期的勞作

學校呢幾星期o既學習主題係食物，所以啲勞作都係食物黎o架~

今日收到青衣康傑o既信，收咗momo下午班。不過，呢間唔考慮啦，所以都唔會去交留位費。

12/10 10:15am 荊冕堂士德 (pm waiting)

17/10 3:15pm 顯現堂 (am offer)

19/10 9:30am 綠楊 (rejected)

26/10 10:40am 荊冕堂葵涌 (waiting)

1/11 4:15pm St. Cat (pm waiting)

2/11 9:30am 海濱方方 (冇去in)

2/11 10:00am 荃灣迦南 (冇去in)

2/11 11:00am 嘉言 (冇去in)

2/11 11:00am 根德園 (rejected)

2/11 1:30pm 劍鳴

9/11 3:10pm 學之園 (rejected)

30/11 12:00pm 康傑 (pm offer)

30/11 5:00pm 培正

海港城聖誕裝飾

每年海港城聖誕裝飾都好吸引，今年o既係disney人物，當然唔可以錯過啦！送咗Lewis佢哋番屋企之後，我哋就去海港城玩具反斗城買聖誕禮物，momo見到成車都係玩具非常開心~~~
大手筆咁買完啲禮物，即刻放晒上車，先去親親disney人物。momo對於o的卡通人物都好熟悉，雖然未至於全部都認得晒，但識o既都會即刻講晒出黎o架！影緊相o既時候，仲撞到dr. Simon添~

錦田鄉村俱樂部

上星期入到去有公司包場，掃興非常。今日約埋朋友仔Lewis一家去，雖然只逗留兩小時，但大家盡興而歸！
momo第一次摘士多啤梨，顯得相當興奮。但呢個季節o既士多啤梨唔知甜唔甜，我哋都係摘咗十粒就收工。momo即刻食晒，我試咗一啖都幾甜！
然後，我哋去睇兔仔同小羊。最後，俾我哋發現有電動車玩。momo自己騎咗架電動電單車，爽晒！
離開後往元朗吃午餐，然後送Lewis一家番屋企後，繼續下一個行程。

爸爸母校開放日

momo第一次去中學參觀，佢係球場到來回咁走來走去，特別鍾意家政室同地理室！家政室入面有曲奇餅吃，拎咗幾塊食，食唔停。地理室有河流同海岸模型o既學生作品，佢每個都睇咗幾次，不停問係咩黎，非常有興趣。講咗幾次之後，佢識得指住其中一個講waterfall，當值個老師即刻同啲學生講話囝囝仲學得快過佢哋...哈哈~ 唔通佢咁早就有geographical sense?

成身貼紙

我諗個個小朋友都鍾意貼紙，momo成日都拎啲貼紙玩，一見到就成張撕晒出黎貼先夠，通常都一個不漏。今日放學番黎，佢就拎咗之前interview送o既貼紙貼到成身都係...

27 months old

說話越來越多，啍歌也多了 (啍多過唱，可能啲歌詞仲未係好記得)，不過依然係嗲mo。片未戒到，但可以自己「休」褲同除褲，都算叻仔咗啦！希望快啲識得自己去到vv同poo poo啦！

自助吸塵

換咗個手提吸塵器回家之後，momo時不時拎起就話要吸塵，開關都難不到佢，好自然就拎上手吸。吸到咁上下或者冇乜電時，佢會自己關掉，又去拎其他玩具玩過。

配對恐龍

自從去咗科學館睇恐龍展後，momo對呢副恐龍圖卡非常有興趣，會自己係櫃拎出黎玩。同佢玩咗一兩次配對顏色，佢就上咗手，好快就會排好，仲會砌好啲恐龍黎玩添o架！

濕地公園遊

原本打算去錦田鄉村俱樂部玩，點知入到去先知今日包咗場，即刻轉戰濕地公園。momo似乎對遠距離觀鳥興趣不大，反而彈塗魚o既吸引力就大啲。不過，唔知點解，今日明明潮退，但都見唔到招潮蟹...

第十及第十一個K1 interview - 康傑及培正

最後兩個面試，呢個遊戲終於玩完！本來諗住兩場都係hubby陪momo去，但hubby都係唔肯陪入課堂，所以康傑都係我同囝囝見老師。

康傑大大話話去第六次 (計埋上年申請N班同交表)，我都熟晒路。momo係大堂到玩住等，佢真係架架都坐勻晒咁滯，再玩咗陣滑梯就入課室。

老師先叫問囝囝今日同邊個黎，佢答媽咪。然後囝囝就一路玩住手抓板，老師就問咗我幾條問題︰1. 點解揀我哋學校？ 2. 點教小朋友自理，如戒片... 3. 小朋友扭計點處理？ 4. 如上午班額滿，下午班會否考慮？
跟住老師就叫囝囝砌好份手抓板，然後俾個印仔佢，叫佢用吸係紙上啲空格。跟住又砌吓積木，同將積木由一個籃放去另一個個籃。最後問埋眼耳口鼻就完成！囝囝全部都做到晒，非常叻仔！

番到屋企，囝囝成三點幾先瞓晏覺，差啲就趕唔切去培正interview。
hubby抱住囝囝趕路，同佢一齊入學校上班房。我就係地下等佢哋落黎。培正o既面試係要小朋友自己跟老師入房的，家長都冇得陪入，所以問咗乜都唔知。五分鐘就搞掂，其實咁短時間都唔知點揀...不過，如果喊就肥梗。報名時，我都諗住囝囝一定會喊，但又想測試吓佢，所以即管俾個機會佢。點知佢今日好叻仔，hubby話佢全程都冇喊到，係出黎時好似想喊咁咋，真係出乎意料呀！好彩係hubby同佢上課室，如果係我帶佢去，好大機會分離恐懼又發作，未跟老師已經喊晒口。

兩個面試之外，今日都同時收到兩間結果，仲要都係reject。根德園同學之園未能安排學位俾囝囝，其實都好正常，只係冇諗過連waiting都冇。呢啲咁受歡迎o既學校，waiting都一大堆，而家我哋係reject，寫求位信都可以慳番！

12/10 10:15am 荊冕堂士德 (pm waiting)
17/10 3:15pm 顯現堂 (am offer)
19/10 9:30am 綠楊 (rejected)
26/10 10:40am 荊冕堂葵涌 (waiting)
1/11 4:15pm St. Cat (pm waiting)
2/11 9:30am 海濱方方 (冇去in)
2/11 10:00am 荃灣迦南 (冇去in)
2/11 11:00am 嘉言 (冇去in)
2/11 11:00am 根德園 (rejected)
2/11 1:30pm 劍鳴
9/11 3:10pm 學之園 (rejected)
30/11 12:00pm 康傑
30/11 5:00pm 培正

分離恐懼mo

呢個星期凍咗好多，校服都要全副武裝上陣。搭咗校車都兩個月，但momo依然都係送上車就喊住叫媽咪。我有問過佢係咪唔捨得mami，佢話係，唔捨得。我教佢上車前同mami講bye bye，放學見。每次出門口前係屋企我問佢番學要同mami講咩，佢都識講番。但係一去到等車，或見到校車黎，佢就即刻嗲住。呢個情況都唔知會唔會去到學期尾...

St. Cat有結果喇！

估唔到St. Cat 提早咗成個星期收到結果，不過momo只得pm waiting，咁我諗都係冇機會喇！waiting list咁多人，就算有位都未輪到囝囝啦~

12/10 10:15am 荊冕堂士德 (pm waiting)
17/10 3:15pm 顯現堂 (am offer)
19/10 9:30am 綠楊 (rejected)
26/10 10:40am 荊冕堂葵涌 (waiting)
1/11 4:15pm St. Cat (pm waiting)
2/11 9:30am 海濱方方 (冇去in)
2/11 10:00am 荃灣迦南 (冇去in)
2/11 11:00am 嘉言 (冇去in)
2/11 11:00am 根德園
2/11 1:30pm 劍鳴
9/11 3:10pm 學之園
30/11 12:00pm 康傑
30/11 5:00pm 培正