完成一百塊砌圖

momo已經可以不用太多協助下，自行完成一百塊o既砌圖啦！真係冇諗過佢未夠三歲都有呢個能力，仲可以一邊砌，一邊話俾我知某一塊係屬於邊一個部分，叻仔！

處女之星生日buffet

今日momo玩足全日，幾乎冇瞓過覺！
先係到訪Sky100, 天氣晴朗加上空氣質素佳，視野廣闊，早上人流較少，感覺舒適！離開Sky100,就在入口那間Holly Brown吃午餐，momo有得飲奶昔特別開心！
午餐後去接埋6299到中大，momo玩滑板，又玩波。明明已經好攰，但上車去尖東都仲未肯瞓，結果落車前只係瞓到半個鐘左右。
今年三個處女之星嘅生日會係食buffet大餐，仲要係表弟正日，有個蛋糕仔送添！用餐途中有小丑扭波波，大人小朋友都好開心！呢個年度家庭聚會，一定起碼keep住到佢哋讀完小學~~~

K1新生適應遊戲日第二天

第二日嘅新生遊戲日，流程同昨日差唔多，只係英文部分轉咗普通話。因為今日有daddy一齊，所以momo特別開心，warm up都快咗少少。
手工部分係設計書仔封面，momo好鍾意用顏色點點點！

K1新生適應遊戲日第一天

早上起來，穿上新校服的momo精神抖擻的和mami上學去！K1新學校不用搭(校)車，mami可以每天都和momo步行回校/家，而daddy也可間中一同送囝囝番學才去上班，我諗momo應該更快樂~~~
班主任前天致電聯絡過，momo編入喜樂班，mami很喜歡班名，希望囝囝的幼稚園生活充滿喜樂！一小時的遊戲日分幾部分︰先是同唱早晨歌，然後是大圍遊戲，再來是英語唱遊，以及匙扣勞作。momo一如以往的慢熱，前三部分都不大願意參與，直至進入課室的勞作部分，才開心的投入畫畫設計。
對比N班和K1的首天上學照，momo的確大個仔咗，從照片睇好似長高咗好多，但其實真人仲係好細粒，仲好bb樣咁，哈哈~

暑假最後一天

明天雖然唔係正式開課日，不過學校準備咗兩天o既新生遊戲日，所以暑假今天要結束了！
親子廚房玩得多，今天決定帶momo出走吃好東西~ momo和mami都愛蛋糕甜點，就帶他遠征PMQ的古生古太甜品啦！
吃過飯搭地鐵出發，到香港站下車步行到PMQ。其實一點兒也不近，mami仲要兜了個大圈，想必囝囝也行得有點累。幸好到達後，吃到他最愛的栗子蛋糕，應該可以把之前的辛苦一掃而空吧！
本來一場黎到，好應該帶他參觀這幢歷史建築物，但接近放工時間，再加上momo過了午睡時間，精神開始透支了，便趕快回家好好休息，準備迎接明天的上學日。
約好momo下次帶daddy一齊來，到時再慢慢感受歷史氣息吧~~~

與momo全日分別

朝早要去廣華覆診，所以晨早送咗momo過去6299到。係專科等候o既時間比預期快，半個鐘就搞掂走得，所以去咗尖沙咀行咗陣，順便食埋午餐，先番荃灣整頭髮。估唔到一整就搞到天黑先走咁滯，接番囝囝番屋企，就已經到瞓覺時間lu...所以全日都冇同momo玩過~

暑期親子廚房之蝴蝶酥

蝴蝶酥~~~ 媽媽至愛之一，原來係超易整！第時想食唔駛一定出街買喇~~~

又到麗都灣

趁暑假去多次沙灘玩！有車去麗都灣真係唔錯，唔算多人風景又好，只係辛苦少少要上落幾十級樓梯，好似momo呢啲年紀以下o既，就多數要抱住先得...

momo今日痴住daddy玩沙，跟足daddy指示，連執拾都非常願意幫忙，似乎地方熟絡咗，佢o既安全感係會提升！

吉卜力工作室展覽

momo鍾情cars, planes, 都係pixar, disney o既卡通片，宮崎駿o既卡通片其實都冇接觸過。其實mami同daddy都好喜歡宮崎駿o既卡通，尤其係早期o既天空之城、龍貓。呢次展覽所展出o既手稿真係非常珍貴，十分佩服宮崎駿先生o既創意以及工作室團隊o既畫功！momo雖然未接觸過展覽入面o既卡通，但大部分都好感興趣，daddy話係時候唔好只睇disney卡通啦~~~

暑期親子廚房之糖不甩

糖不甩係mami至愛之一，所以我都希望momo喜歡吃。呢個小食，天係簡單易做，只需搓好糯米粉成小粒，以糖水煮熟，然後灑上花生碎便成！不過，要趁熱才好吃。如果想凍食，咁以同一方法，搓大粒，再加餡料煮熟，灑上椰絲再雪凍，便成好吃糯米糍！

momo 發惡夢

成晚都好無助，momo半夜兩點幾係到大叫大喊，問佢咩都話唔好，問佢想點又話唔知想點。我直頭開咗燈，一路平靜同佢講嘢，但佢都好似不受控制咁係到發忟憎，搞咗都有大半個鐘，先瞓番，但仲係瞓住咁係到發開口夢講唔係，唔好。
我覺得佢發惡夢，昨晚係6299到食飯時扭計，又係大喊，俾mami罰企。
唉！但都唔駛咁對我呀，半夜黎㗎，得我一個好驚㗎，個人醒晒，成晚瞓唔番，諗住瞓唔番打blog, momo keep住間唔中係到叫，除咗病，第一次反應咁大。
然後6點幾，又陷入神志不清衰喊狀態，我講咩都聽唔入，聲都沙埋。
最後，俾咗啲水佢飲，趴咗係我個身到瞓。我都唔敢郁到佢，好驚又黎過...朝早瞓醒，好似完全冇發生過咁精神爽利，難為我驚咗成晚...

由於今日有師傅上黎搭棚換冷氣，都冇帶momo去玩。但呢個小朋友對搭棚同裝冷氣機都好感興趣，係咁走入房睇發生咩事，哈哈！yeah! 主人房冇咗冷氣用兩個月，終於都換到個新冷氣啦...真係等業主跟進咗好耐啦！

momo有手錶啦

見6299 weekend冇見過momo, 而個孫又就快開學，於是今朝上完oxford path, 食完午餐，就上咗6299到。我就乘機去salon，諗住做perm同highlight換個新髮型。點知細舖老闆今日好多booking，唔夠時間做，就只好剪咗頭先，再約下星期電。
番上去6299到食晚飯前，經過啲扭蛋機到見到有cars手錶，就扭咗一隻俾momo做獎勵，雖然未識睇數字時間，但希望有隻鍾意嘅公仔手錶會容易上手學習喇！

暑期親子廚房之鮮果乳酪脆脆

momo係冇用藥嘅情況下自己退燒，真係叻仔！見佢冇其他病徵，應該問題不太，可能真係星期六玩得太癲啫。今日黎個超簡單嘅茶點，用水果，格格脆，粟米片，水果同乳酪，好似啲新地咁分層整咗個鮮果乳酪脆脆，最後momo食唔晒，哈哈！

發燒中的美食節

朝早起床時發現momo的手腳有點熱，量體溫有點偏高，但沒有發燒，於是照常出發去最後一天的美食節。雖然有點扭抱，但momo一路上都十分興奮。到達會場時已接近中午時間，當然就在這裡吃午餐啦，momo吃得不多，只對哈密瓜和香腸有興趣，烏冬亦吃了幾口便算。
來美食節最想買的是益力多的玩具和一丁購物車，益力多找到了，但一丁車已售罄，好可惜喲...見囝囝眼皮垂下，抱上手更覺得身體很熱，有發燒的徵象，而且很快便睡著，於是趕緊回家安頓。回家一量體溫已多達38度，立即沖溫水涼，並叫momo多飲水，然後在床上再睡。晚上起來吃粥時，雖然未退燒，但見仍有胃口，又沒有其他病徵，人亦精神，便即管不用藥，只給了維他命c和elderberry，繼續觀察情況。睡前再多沖一次涼，又大量飲水，以助降溫。希望自己退燒啦，如果半夜瞓得唔好，又唔退燒，先考慮用藥啦~~~

開學前剪髮

自5月剪髮後，momo前額啲頭髮已經長到過晒眼眉，拮到眼睛咁滯。終於hubby搵到時間幫momo修一修佢...點知一修就搞到變咗薯頭，前額啲頭髮又短又齊，但我哋都要話剪得靚，免得佢唔開心。不過，囝囝真係好乖好合作，坐定定俾daddy剃頭髮！

番禺探親去

以前每年嫲嫲生日，爸媽總會帶著我們四個仔女回鄉慶祝，但我們漸漸長大，尤其踏出社會工作後，就差不多只剩細佬和三妹跟隨。上一次回鄉，應是弟弟婚後在這裡設宴款待，舉家到來。今天見momo都差不多三歲，便提議約同老表齊齊回鄉，當家族旅行。最初諗住順道去番禺長隆玩，但是暑假費用比平常貴接近一倍，兩日一夜，一家三口要花費四千以上，便打消念頭。最終出發這天，弟婦、細妹夫、臻臻表弟和子澄表妹都缺席這個即日來回之旅。好彩momo仲有表哥梓烯一起玩，亦因為有呢一日o既相處，佢同表哥勁friend。整日都問住表哥係邊到，追隨住表哥，就連爸媽都接近不理，拖住表哥，和大e、表e走到表舅的家。如果唔係我同四妹在後跟著，都唔敢相信呢個總係黏住mami唔放o既momo，可以大膽到咁 XD
不過，佢鍾意同表哥玩，真係一個好開始，希望佢同老表相親相愛，將來有困難都可以互相支持！

暑期親子廚房之栗子瑞士卷

momo最鍾意嘅茶點之一係瑞士卷，有時放學嘅時候經過餅店，就會買一件或整盒回家，所以mami點都要同momo一齊整一次。睇落唔算難，但整得唔算成功，最尾卷時爛咗，不過囝囝佢依然好捧場，連吃幾件！mami一定會再努力嘗試，因為瑞士卷都係mami至愛黎㗎...哈哈~~~

暑期好友廚房之紫薯餐包

餐包仔encore，今次用紫色蕃薯做餡，momo大愛，但Bernice就唔多食。咁多次好友廚房裏面，最能夠體驗o既係唔好食o既小朋友真係俾咩佢都唔食咁滯，亦唔會一見食物就主動走過來要。的確，對負責煮食o既人o黎講，真係會煮到冇咁動力...慶幸我兒喜歡吃，亦喜歡煮來吃。

暑期好友廚房之pizza

pizza enore，Matthew又黎同momo整嘢食，材料有吞拿魚、粟米、菠蘿。momo今日好叻，食咗半個pizza咁多。Matthew都係唔多食，反而拎咗昨日整o既fruit tart，佢就好快咁食咗一個！

多謝舊同事又買咗禮物黎俾囝囝，真係太客氣！

暑期好友廚房之鮮果撻

鮮果撻encore，預早焗好撻皮同準備好忌廉吱袋，再等小朋友帶水果黎，好快就食得喇！鍾意cream o既momo係咁吱，搞到啲cream滿到瀉咁滯...哈哈哈~~~

吃切橙

momo食橙多數係手搣，然後再切粒，用叉子食嘅，免得啲橙汁會滴到成枱成衫都係。今日mami試吓懶啲，就咁用刀切開8塊，即管測試吓食得乾唔乾淨。睇呢張相都滿意嘛？

新書

中午上完游水課，去咗沙田食飯，然後諗住去睇兒童單車，打算買黎做momo 3歲生日禮物。但一田冇單車賣，反斗城又冇啱款，反而入咗商務書店就買咗幾百蚊新書俾momo。呢套cars佢係最鍾意嘅，仲有立體書，幼稚園練習，飛機總動員2故事書等等，收穫豐富！

畫畫細緻了

momo而家畫畫開始有details，唔係只得外型。以前畫車，只有車身同兩個車輪，而家可以畫到窗，門，位置大小比例都恰當，都幾有驚喜！

暑期好友廚房之水餃

好友廚房請到睿睿黎一齊整水餃做午餐。朝早請momo幫水做餡料，有粟米，鮮冬菇，白菜，豬肉。兩個小朋友都好積極包，奈何小肌肉未發展到可以處理封口成形，所以只能負責畢餡料在餃子皮。
飯後再一齊整曲奇餅，用新買回來嘅cars曲奇模，momo搶住唔捨得俾人用...

暑期圖書館之三

隔咗一星期冇去圖書館，今日又借到本thomas番屋企睇喇，即晚故事時間就梗係借回家嘅書喇~~~

momo走失了！

今日momo係樓下走失咗，驚到我喊...
事發時剛從超巿出來，我剛接完電話，momo開始自己向前跑，我沒有刻意去追，諗住佢都好似平時咁唔會行得遠就停落黎等，但點知沿路行到扶手電梯口都唔見，即刻去咗電器店門前滙合親戚先，再分頭搵吓。沿路我入去文具店同玩具店都唔見，望扶手電梯下層又唔覺，入番超巿，直至行到cashier都唔覺，正打算離開時，諗住問吓啲staff見唔見momo (啲收銀員好多都認得囝囝)，就俾我見到momo同兩個ee一齊。兩個ee原來都係同屋苑嘅，話問過囝囝知唔知mami電話，佢又唔識答，佢哋都驚有人帶走佢，所以企咗係到等。原先我以前呢個小朋友唔見咗mami會喊，點知我見到佢完全冇喊。唔該兩位ee再抱番momo走時，我忍唔住喊住同佢講嚇死媽咪，但momo都冇乜反應，仲係咁問：媽咪你去咗邊？好明顯佢只係覺得我行開咗...

呢排momo變咗另一個人咁，成日衝衝衝，唔係以前咁坐定定。今日就係唔想追佢，一追以為我同佢玩，點知就咁。我諗連daddy都估唔到囝囝會咁，而家一定一定要叫佢拖實！


今日搞到hubby表姐都擔心埋一份，仲爭啲叫咪搵㗎啦，真係唔好意思。同表姐&表表弟林bebe食個lunch，再番上樓玩咗個下晝，分享吓育兒同全職媽媽嘅生活，都幾唔錯！

暑期好友廚房之pizza

HM又黎好友廚房喇！今次一齊整pizza做午餐，材料有三文魚，紅椒，粟米，菠蘿同埋芝士。兩個小朋友都開心享受呢個新嘗試，估唔到momo都喜歡吃pizza呢！

35 months old

仲有一個月就3歲喇，到時升K1又大個仔啲！呢個月嘅momo真係「口水」不停，隨咗講嘢多之外，最緊要連帶mami都講到口水乾咁滯...事關momo已開始咗每事問階段，咩都要問點解，仲要由一個點解問到底。
例如落大雨，平台電梯大堂有部吹風機放係到，就會引發以下對話：
mo: 點解有部機嘅？
mami: 因為地下濕，要吹乾
mo: 點解地下濕嘅？
mami: 因為落雨囉
mo: 點解會落雨嘅？
mami: 因為有黑雲囉
mo: 點解有黑雲嘅？
mami: 因為熱，有水蒸氣升高，到天空變成雲囉
mo: 點解熱嘅？
mami: 因為有太陽公公囉
momo:點解有太陽公公就熱嘅？(爭啲想問埋點解有太陽公公嘅？)
mami: 因為太陽公公釋放能量囉

momo仲想繼續問，但到咗屋企樓下大堂要按電梯制而打斷，冇再追問。
就係咁，每日都可以由一個點解，再根據答案衍生若干個點解出黎，有時問到你都唔知點答(可能要解釋好長篇或深奧)，又或者唔識答。最好笑我話「mami都唔識喎」，佢話「你識嘅」，嗰刻真係哭笑不得。有時唔想佢再追問，我就重覆佢問過嘅問題問佢一次，順便睇吓佢係咪接收到，哈哈哈~~~

呢個人仔平時都仲係鍾意車，睇書主要係車有關。相對冇以前坐得咁定，食飯亦冇以前咁合作，啲trouble two嘢反而接近3歲先出現？！希望呢個階段快啲過，等mami好教啲啦！

上海之旅Day 4

朝早hubby先番公司工作，我同momo食完早餐，就係附近行一陣，小區裏面有遊樂場，但高溫令囝囝玩樂的意欲都不大。其實離開這天的天氣，正是上海炎夏的狀況，前幾天因為颱風下雨關係，才不至滿汗淋漓。由於師傅接載o既時間，剛好正是午飯，但momo又不太肚餓，於是直接與公司的hubby會合，到機場才吃一個麵食，便準備登機回家去。有daddy陪伴乘搭飛機，momo果然更興奮，最終是於landing前半小時才入睡，連過關時都是熟睡狀態呢！

上海之旅Day 3

經過昨日中國人流威力o既體驗，我哋決定朝早就出發去豫園逛逛，吃個地道小籠包同湯圓，然後再搭地鐵番浦東。考慮momo體力同興趣，浦西o既其他景點如黃埔江邊、南京路等都係可免則免。
中午到Ritz Carlton食semi buffet lunch set，環境舒適，食物質素佳，一家三口食到飽飽，再番家休息。誰知momo一睡到接近黃昏，便在附近杭州菜館吃晚飯，結束第三天旅程。

上海之旅Day 2

朝早在家食cereal早餐，就出發去上海科技館。未入場已經見到相當多人出入，入到館內差唔多個個展館都要排隊咁滯...參觀指南有幾條推薦路線，但我哋時間唔算多，所以只係揀咗兩三個展區睇。最啱momo o既係彩虹兒童樂園，有滑梯玩，可惜我哋最後先去到，又差唔多食午飯，只好擋住唔俾momo見到。唔係玩一次都要排十幾個小朋友先玩到，咁到時就午餐同下午茶一齊食喇...
中午去食小輝哥火鍋，我哋食到最尾，momo已經瞓著咗lu...打的番屋企到瞓個晏覺，就準備去東方明珠塔啦！hubby同事黎接我哋一齊去，佢哋有世叔伯係明珠塔辦公，所以我哋先可以避過外面o既超長龍，經特別通道入到塔底排隊搭升降機。(講真，呢啲咁熱o既天氣，帶住一個咁細o既小朋友，要排一條可能三小時先入到場上到個塔o既隊，真係可免則免。唔係識人可以咁入場，我哋真係唔會去呢個景點！)大約15分鐘左右，就到咗267米o既旋轉餐廳，開始享受日落下o既自助餐喇！
由天光食到天黑，再到263米同259米o既觀光層同遊人迫，跟住要惡夢地排上一個小時，先返回地面，真係諗都冇諗過咁離開都咁難...
週末o既上海，到處都係人，啲主要觀光點被各地o既遊人攻陷，明天都係hea遊好啦~

上海之旅Day 1

自從過年後，hubby就接近個個星期都飛，飛到連momo都話要搭飛機。終於momo都恨到喇，可以同mami出發去搵daddy喇！朝早仲要mami叫醒佢，先知自己搭飛機，哈哈~
當然，佢一知道有得搭，就即刻好興奮，第一句就話：我有證件可以搭飛機！
離開屋企開始，佢就幫手推行李箱，直至去到櫃位check in，點知呢一推，竟然唔捨得個箱？！佢見到個箱去咗行李帶到要寄艙，就即刻喊住話要...佢應該以為會冇咗個箱，所以先咁反應，真係儍豬！
上到飛機，有自己位坐就梗係開心啦，全程係到講嘢，問嘢。問得最多係：(飛)得未？好彩班機唔算要delay得耐，比預期時間都係多十分鐘到。起飛時，momo都冇乜特別，因為佢開始睇佢最鍾意嘅cars，但有時一宣佈，佢就好唔耐煩咁話：我想睇 (因為一宣佈，PA就要暫定畫面)。
除咗有自己住之外，都有自己嘅兒童餐，但佢對主食冇興趣...成個機程，基本上起飛升降嗰刻都冇問題，但中間坐唔定咁，又起身，又想坐我大脾，尤其有時有氣流出現要帶番安全帶時，就唔太合作。
到上海後，daddy公司司機嘅接我哋去公司到。呢到天氣唔太好，落雨又起風。天氣預告話會持續兩三天。去到daddy公司，雖然佢話今日會早走，但要開埋個會先，放是兩母子係daddy房到等。一等都成個鐘，我哋只係食咗飛機餐，冇食lunch，好彩momo又唔覺肚餓咋。
終於等到daddy開完會走，先番咗住處到放低行李，就出發去ifc食晚飯。俾樂天皇朝嘅八色小籠包吸引咗，入去仲有窗口位坐，可以順便睇吓景色，哈哈！飯後，獎momo食個雪糕，見雨停咗，就漫步回家。
momo沿路不斷問：個頂呢？(興建中嘅上海中心仲未封頂，有時又俾雲遮蓋，momo就不斷向上望發問，真係好搞笑！)