CU alumni library card

中午約咗舊同事食飯，momo可以同幾個小朋友玩。同事帶咗架搖控車黎，momo即刻望實晒，但又唔敢去玩，點都要痴實我哋。後來經過一輪觀察，hubby陪佢一齊去追，佢就融入咗同啲小朋友到玩喇！
hubby申請咗中大校友圖書証一段時間都未拎，趁今日仲未番工就入去，順便食個tea。因為校友圖書証可以有4小時免費泊車，一於食完tea去聯合苑玩埋遊樂設施先離開。
以後可以多啲入黎玩啦，yeah!

29 months old

第一次上oxford path playgroup，daddy mami同佢一齊去。當然分離恐懼又嚟料，喊住入課室。另外兩個同學仔都係喊，真係合唱團咁，哈哈！

接放學就冇事，老師話佢都聽得明所有老師講o既嘢，其實momo全英都ok o架~

29個月，可以在家自行如廁，白天除了午睡已不用片，希望外出也盡快戒片啦！加油！

baby headband

初生時冇時間整到baby set俾可柔，終於都搵到機會送番個靚靚髮飾俾佢啦！

兩場團拜

今日分別去探中同o既初生b女同舊同事o既囡囡，但兩個bb太細，所以momo都係自己玩車，哈哈~~~

中同住o既村屋真係唔錯，期待秋天可以再去BBQ！

First time scooter

過海拜年，順便約數月未見o既悅悅玩。momo見悅悅有架滑板車，已眼定定望咗好耐。叫佢用青蛙車黎交換，就即刻二話不說換完即上去試。估唔到佢第一次玩，學咗唔係好耐就識，仲全程玩得好開心！真係多謝悅悅爸爸咁好心機教佢！我哋決定淘架番黎俾佢，第時番學放學就用呢架車，咁就唔會扭我抱喇，yeah~

夜晚為咗等Issac同Sophia黎一齊玩，最終留係朋友仔屋企到食埋晚飯先走，囝囝係回程時在車已睡...

初二四處遊

年初二，屋苑有舞獅表演，同momo一齊睇咗一陣，就出發去大埔，諗住去林村一趟。經荃錦公路出時，hubby提議到大帽山頂看看，於是就上咗車可駛到的最高點，落車行咗一陣。
上番車冇幾耐，囝囝就瞓咗...駛到林村時，遠看遊人多到插針都唔入咁滯，再加上囝囝仲瞓緊，所以過村不入，直接去大美督玩泡泡，同吃下午茶。
食飽飽，又去埋大埔海濱公園玩咗陣，就去細佬屋企團拜。四個小朋友又大個咗好多，期待之後的新年，佢哋一齊鋤D開枱...哈哈哈~~~

馬年大吉

momo呢個新年識講好多祝賀說話︰新年快樂、身體健康、龍馬精神、萬事如意、心想事成、恭喜發財！

一口黑糖年糕

為momo特別炮製的一口黑糖年糕，希望他吃得開心！

N班上學期學期報告

上學期最後一天，收到學期報告。估唔到都有兩個A，諗極都唔明，唔太識數數o既囝囝，數理邏輯點解係A呢？

一人一花第二期報告

momo依時每天澆水，現在枝葉茂盛，只尚待開花。希望快啲有花蕾，等momo可以見到自己種嘅花啦！

yeah,勝利

多番嘗試後，momo做到勝利手勢啦！佢自己好開心，一做到就不停自己yeah~~

娘家團年

今次我哋東道主，不過唔駛自己煮！妹妹早已購買盆菜作團年之用，我只煲了紅菜頭紅蘿蔔粟米湯作大家享用。
四個小朋友開始多咗啲交流啦，表弟表妹仲爭嘢玩添，哈哈！

家事小幫手之洗菜

momo又一熱衷家事：洗菜。可能見得我洗多，估唔到佢識洗完後，將盆水倒去，仲會將盆放一邊添！

學校華服日

由今日開始至下星期二，為學校之農曆新年活動。momo今天的指定服飾為華服。不過，今年我哋都冇打算囝囝新年會著華服，於是向表哥表弟相借。咁啱表弟舊年嗰套都合身(表弟已和momo的體重相約...)，因利成便，唔駛特意去買，又有得著番學喇！

添馬公園遊

今日黎到政總，去添馬公園個大草地玩吓，望住維港野餐的確係唔錯㗎！不過，今日風大，我哋去咗幫襯cafe，等天氣再和暖啲先黎過野餐樂！

拍拖辦年貨

午飯前送咗momo去6299家，就同hubby出發去辦年貨。首先去佐敦拎hsbc換的禮品，然後再去上環買海味。誰知今天的路面極不暢通，去佐敦時塞車，去上環時又塞車，再加上hubby去拎禮品時又大排長龍，我足足坐在車內的時間，比我在街上的時間還要多！名副其實的坐到pat pat痛...
見過咗海，就去太古城行吓，晚飯完後接埋囝囝便回家。

N班上學期發展觀察記錄

學校派咗上學期o既發展觀察評量檔案，看來momo的學習生活真的不錯，與其他小朋友相處亦融洽。媽媽不在身旁，果真是可以再獨立些！

自行背上書包

原來momo不用他人協助下，已可自行背上書包。而家番學前出門口真係舒服好多，幫佢著好襪子後，我去換衫。佢就可以自己著好鞋，然後再背好書包，等我一齊出發。so happy~

在家不用片了

自行上廁所有突破性的進展，估唔到準備好就真係會一夜間就長大咁。momo呢兩日在家不用尿片可以自己去vv，仲要係識得講俾mami聽。最緊要係佢識自己玩緊時講之餘，自己行去廁所，自己除褲，去完再自己休褲。嘩！我都不得不大讚佢︰很捧喲！
戒日片的日子終於都不遠矣！希望到兩歲半時，出街同番學都唔駛再用片啦。加油，momo！

家事小幫手篇之摺衫

momo可以自己摺衫啦，仲好落力咁一次過摺晒自己o既衣物，然後疊好，再放回衣櫃。雖然只有兩歲四個月，但囝囝已經可以參與各大小家務，並且做得乾淨俐落。相信這些訓練已培養好他做事有條理、整潔、負責任等的好素質了。
我不是誇說，他的自理能力可是超班的！

今天囝囝亦可以自己去vv啦，帶佢去都係小尿兜到去到，仲要成功咗兩次添，朝早已沒再尿濕褲子lu！進步神速呀~~~

番學太累了

momo番下午班，但佢慣性早起。好多時朝早七八點起身自己玩陣，然後食完早餐，會繼續玩同幫手做家務，到午餐後就番學。一直到放學四點幾，就提早食飯。成日冇午睡，再加上學校嘅活動，好多時放學個人都攰，好多次食下食下都烚眼瞓，有時仲會瞓著咗。試過五點幾就瞓到第二朝。
平日番學冇咗午睡，通常都係七點前瞓覺，一覺天光。連hubby放工都冇得同佢玩，只可以趁每朝番工前見下囝囝㗎咋！

表哥表妹@荔枝角公園

約咗momo表哥表弟表妹去荔枝角公園玩，但最後表弟瞓咗覺，所以得表哥同表妹黎同囝囝玩。今次我挑戰自己極限，一個帶住momo，加一大袋食物，再帶埋加青蛙車出發。出發時就一定冇問題，只係回家路上佢瞓著咗，所有東西都要我一個扛，真係大力士上身先得！但為咗阿仔玩得開心，辛苦吓都好值得！

hubby不在港的weekend，單拖momo也有不錯的節目。

砌立體恐龍

momo可以不用協助下，自己動手砌立體模型。估唔到佢之前睇住我砌，就跟到個手勢自己去做，仲幾快上手添！
今日屋企附近有間小學開放日，同momo黎緊K1間幼稚園同屬教會，就帶佢一齊去睇下。
學校都準備咗唔同活動同遊戲俾參觀者，不過囝囝太細，大部分都未啱玩，只係去咗填色同試食，唔夠一個鐘就離開啦。

叻

momo小肌肉協調進步咗少少，今日可以自己豎起手指公，做到「叻」呢個手勢啦！不過勝利，yeah就未做到，但佢都好肯學，好想快啲自己整到，哈哈~

唔係講笑的trouble two

momo trouble two起上黎，真係唔可以睇少佢。平時佢有唔想做o既嘢，已識得會講︰我覺覺，黎做藉口。
好似唔想番學，會嗲住咁講︰我要係床到覺覺。有時做唔到嘢發脾氣，佢個語氣係︰我覺覺囉。仲要故意掉啲嘢落地。
然後，佢今日發脾氣，竟然識自己撞個頭去個櫃到，然後喊住口(都唔會唔痛啦)，要我錫番佢！因為平時佢唔小心撞親，我都會錫番佢的。佢竟然學識咁做！

有時佢發脾氣，都會尖叫，瞓地。我當然唔理佢，再嚴重就要佢罰企。momo罰企完，我要佢講sorry，可以死口唔講，仲要係咁要我攬住佢，要我呵番為止。我梗係唔俾佢得逞，跟住佢又再喊激動啲，話佢好驚(估佢係驚我係咁鬧佢)。

其實佢呢啲小把戲，最終都係鬥唔過我，最後點都要講sorry。冷靜過後，就同佢講道理。佢都知道自己曳，要做番乖小朋友先得。

一人一花的第一期報告︰
momo每天都會幫忙澆水，雖未見開花，但生長良好。

告假第三天

為咗momo可以再復原好啲，今日都係請假冇番學。不過，兩母子兩日都冇出過街...點都要去買餸補給，咁就順便同囝囝去平台遊樂場玩一陣，起碼運動吓都快啲好。只係今日都冇乜太陽，見有風都閃，唔係又吹親就大件事...

又告假一天

斷斷續續發燒至今午終於都退晒，朝早係咁扭計，到夜晚都終於有番啲胃口。見佢退咗燒，就連其他藥都停埋。不過，個人狀態都唔好，當然要請多一日假休息。
觀乎今次係咁燒兩三日，又有咳又鼻水，應該唔係普通感冒，而係中咗流感。至於係邊到惹番黎，就真係考究唔到啦...
總之肯食番嘢就唔駛再擔心喇！

告假一天

今日都仍有燒，所以一定要向學校請假，留家休息。亦都因為仲發燒，我都唔敢帶佢落街買餸，都係煲粥俾囝囝食。其實momo都仲冇咩胃口，所以都食得唔多，再加上食咗藥，個人又攰，同埋好嗲，冇心機玩，仲瞓咗兩次晏覺。
由於冇買餸o既關係，變相夜晚要靠hubby買外賣番黎吃…

28 months old

發燒中的第28個月。
朝早雖然momo退咗燒，但之前佢發燒，都係食一次退燒藥都ok，同埋都冇上到39度。所以，今次穩陣啲，要去睇醫生。
番咗學四個月，第一次要病到睇醫生食藥，其實佢都好叻仔㗎啦。雖然我知道囝囝真係好唔鍾意食藥，但點都要拎定好啲。
結果醫生診斷為感冒，開咗兩支退燒藥同四支咳水鼻水藥。呢次真大獲！簡直係食藥大作戰！
誰知今次發燒真係唔同平時，係斷斷續續咁退完又燒，但又唔見啲鼻水出黎…估計momo自己免疫系統都好努力咁打緊仗。
不過係咁燒個人冇晒精神，仲要唔係點食嘢，真係陰公豬囉！對唔住丫，momo，昨天真係唔應該帶你出去，而家要你咁辛苦，一定唔會有下次，mami都好後悔＞＜

2014第一燒

弊！估唔到2014過咗幾日，momo就發燒啦！朝早係屋企玩都好正常，正當諗住同佢出街時，就摸到佢好熱，量體溫已經38.5度，就俾咗次退燒藥佢食啦。到瞓醒晏覺見佢退咗燒，就去大帽山搵hubby正在bbq的朋友仔，只不過，番到屋企又再燒過，又要再食退燒藥，仲冇乜胃口，夜晚又瞓得唔好，到半夜仲度過成39度！都唯有再食退燒藥，到明天再去睇醫生啦。

表表弟百日宴

今日係hubby表妹個囝囝(咁應該係表表弟啦)o既百日宴，momo放學食完飯即刻瞓陣，等hubby放工揸車入黃金海岸出席個宴。momo去到食咗蛋糕，到最後又食咗水果。well...明明放學已食過飯，仲可以食到咁多嘢嘅？

長假後開學

一連九天的假期完結，momo今日要番學啦。小朋友通常長假期完咗都唔想番學，momo佢就無論係唔係長假，佢出門口都係話唔想番學，唔捨得媽咪。都番咗四個月學，坐校車都三個月，都係克服唔到同mama分離嗰刻，上到校車都係喊住口叫媽咪，都冇咩可以做到...其實佢都係喊一陣，番到學校就好開心o既，只係要同我分開佢就唔想啫...希望佢可以再大個仔啲，唔會喊到學期尾啦！

青蛙車

1314呢個重要交接，當然繼續要同最重要o既人一齊啦。仲搵搵momo喜歡的玩伴Issac一起玩。哈！呢個仔一見到人哋架bubble青蛙車就愛不釋手，係咁推住黎玩，最後dr. Philip仲送埋俾佢玩添！真係好唔客氣嘅呢~~~

1314除夕倒數

2013完結，迎接2014。1314喻意一生一世，倒數過後，亦是我們相愛14年的日子。除夕夜留守家中吃大餐，再加一個momo至愛的生日蛋糕(hubby買咗kitty呀~)，滿足矣！

與囝囝分開活動

今日有三場活動，但因為時間關係，我只可出席TeacherZ的午餐聚與中同Ellen的婚禮，而momo同hubby就去咗莊聚。其實我都好想去莊聚o架，但係中同結婚一生人一次，都要去祝賀吓o既，惟有少去一年莊聚啦...
婚禮地點係大圍o既神學院，TeacherZ成員都就我係沙田食lunch，我先趕得到見埋佢哋先去婚禮。今日見番舊校部分學生，佢哋miss結婚，又點會錯過機會見吓婚禮場面呀，哈哈~
影咗大合照之後，hubby就同momo揸車黎接我，順便車埋舊同事彬family走。
似乎今日momo唔跟我係啱o既，佢去大食會，又有蛋糕吃，仲有小朋友同佢玩！

絲婚紀念日

結婚四週年，慶祝節目當然唔少得momo份啦！下午出發到黃金海岸到行吓，仲去埋酒店個遊樂場到玩咗陣添。滿足咗momo之後，就去尖沙咀東海食大餐 (實情係我指定今日要有雪糕火鍋環節，所以要搵個有haagen-dazs嘅商場吃晚飯)，我哋第二次黎呢到食結婚週年餐呀，哈哈~
重點節目係之後嘅雪糕火鍋，momo都唔執輸，連吃了四個雪糕球。如果唔係佢仲有啲鼻水咁，可能半盤落咗佢肚啦！食飽飽仲可以去同kuma熊影相先回家添！

文化聖誕

聖誕節唔想去迫，聖誕大餐又貴，一於去個文化氣息嘅地方玩。而且，今日係星期三，博物館唔駛入場費，真係抵晒！
文化博物館裏面個兒童展館都唔錯，雖然唔算多適合囝囝個年紀玩嘅嘢，但地方細細，都幾多唔同主題，可以再大個仔啲再黎過。

因為囝囝眼瞓關係，行咗一個鐘就唔夠，就去咗大圍食tea兼買材料，今晚自家聖誕邊爐大餐，yeah~~ Daddy特准提早將tomica開光，momo快樂玩車過聖誕！其他禮物就待明天才拆吧!

平安夜蠔聚

今晚主場招待朋友，海鮮已一早由朋友訂好，我們只需提供熱盤及飲品。momo今日收到㗎搖控車，仲即刻係咁玩添！原本以為Issac同Sophia會黎，囝囝期待咗好耐一齊玩，但Philip叔叔帶唔到佢哋嚟，所以又得囝囝一個小朋友同咁多大人玩。

聯歡健康有營小食

momo第一次o既聖誕聯歡會，又點少得mama親自炮製o既健康有營小食呢？除咗聖誕曲奇，囝囝嘅派對小食係南瓜粟米薯蓉。呢幾樣材料都係小朋友鍾意嘅，一定食得健康又開心。難得我可以用上午嘅時間幫囝囝預備，點都唔會就咁買啲現成嘅零食，或者菠蘿腸仔、啫喱糖咁就算。而且，呢啲都冇乜營養。所以，當知道每個小朋友都預備小食回校分享時，就已決定非薯蓉莫屬，工夫又唔多，簡簡單單，但夠晒營養。

將來如果都有時間，可以整壽司，造型三文治呢啲，菠蘿腸就no way啦，留番啲冇時間預備嘅媽咪整啦。我堅持自己為小朋友整嘅嘢係健康有營，平時囝囝都冇乜機會接觸零食，就算係餅乾都好少食，希望佢由細開始都唔會有食零食嘅習慣。呢啲多食冇益嘅嘢，係唔會係屋企搵到！朋友仔請嘅就另一件事。

聖誕曲奇工場

momo明天學校聖誕聯歡會，一於同佢一齊整啲曲奇送俾班上嘅同學仔同老師！上一次整曲奇，囝囝都係幫手印模部分。今次，佢就多咗部分可以參與：壓麵團、將曲奇放上焗盤、入袋等。咁幫得手，當然都要整多啲作獎勵用途啦！

9月bb bbq

約好近Christmas黎個bbq聚會，地點就係其中一個媽媽嘅會所到。呢到環境唔錯，隔離就係playground，小朋友們可以係到玩個夠本！
其實小朋友都唔會點參與bbq，而且呢到個爐係gas grill,跟本係放晒啲食物上去燒熟就食得。再加上有幾個工人姐姐係到坐陣，大人都唔駛點郁手就有得吃。momo今日係咁玩小朋友帶黎嘅三輪車，雖然佢未識踏，但都好努力咁自己用腳黎行前。去到最尾影完bb合照，囝囝仲扭晒計唔想走！(咪又係到眼瞓時間嘅原故囉~~)

正手用匙

momo一向用匙都係反手，佢公公曾經叫我要糾正囝囝，要教佢用番正手。其實，正手佢唔係唔識，不過通常一陣就會用番反手。而且，正手佢真係畢得慢好多，又冇咁乾淨，所以我都唔諗住刻意去改。我覺得係因為佢小肌肉未發展得好好，所以正手佢用得冇咁順心。既然係咁，唔需要急於一時，最終一日佢都會正手用匙o既。