Leung Leung - 生活感興點滴印證

2014年4月30日星期三

青衣戲棚

青衣一年兩次開戲棚，是夜帶momo買嘢食，見有大雪糕球賣，就破例俾佢自己食人生第一個甜筒啦~~~

2014年4月29日星期二

棋子初體驗

呢份棋係上年去啟思開放日送o既，今日拆開黎同momo玩。佢當然唔識數步啦，但擲吓骰仔，由起點行到終點都已經好開心喇~ 好快就可以一齊玩盡各類board game o架啦！

2014年4月28日星期一

學校舉行咗個親子藝術活動，mami又可以去學校同momo一齊玩。
老師首先安排家長到另一課室作N班學校片段分享，從相片同影片裏面所見，momo好投入學校o既生活，音樂同體能活動都好有反應，真係感動到我都有啲眼濕濕。依個小朋友，雖然番到屋企唔多講係學校做咗咩，但見佢適應晒環境又開心，咁已經好足夠喇！

完咗分享會，家長就分兩組，一組先進入課室，另一組在課室外的角落活動。momo一見課室開門，又係第一時間彈咗起身去望我，仲要走埋出位叫mami，睇黎佢真係好興奮。又即刻係咁望實我，亦好主動俾mami畫花面。我即刻諗，hubby黎唔到，實在冇咗個機會了解在校園裏的兒子。我見有小朋友雙親皆未能出席，雖然冇見到小朋友唔開心，但我可以想像到momo見唔到mami黎o既失望樣子，所以我欣慰自己離開教育界，唔係我都一定錯失晒呢啲機會，要知道老師係冇al可請o架嘛！

2014年4月27日星期日

與爺嫲同遊大埔海濱公園

朝早去m記食早餐，買咗momo人生第一個happy meal。佢見到有玩具，即刻話要拆，哈哈哈~
食完早餐就揸車接埋6299去公園玩。爺爺唔多可以行到遠路，要同佢哋去玩，地方都好有限制，遠足、樂園可以免問，咁要滿足囝囝o既話，去吓公園遊樂場草地呢啲就啱晒。
春夏來到，冬眠動物亦甦醒，要提醒囝囝唔好胡亂踏入草地，因為蛇出沒注意！上年蛇年，教識咗蛇，今日終於親眼見到真身喇！

2014年4月26日星期六

接daddy放工

daddy少有要在週六回公司，見momo呢排成日送daddy出門口都話想去搵daddy，又話掛住daddy，於是就同佢一齊去接daddy放工。
咁樣一接，又多兩架新車玩...點解可以咁著數o架？

2014年4月25日星期五

serve food

momo同我玩煮飯仔時，識得serve我，先將食物放在碟上，再端於枱上。然後放好櫈子，再叫我坐好吃。吃完後，會收拾，又再拿杯子裝水(當然是假的)給我飲。好專業喎！

2014年4月24日星期四

家事小幫手篇之把衣服掛上衣架

洗衣機放/取衣服、掛衣服、摺衣服、將衣服放回衣櫃、將衣服掛上/脫下衣架，全部都難唔到momo啦~

衣服呢個範圍可以做到一條龍服務，放心交晒俾佢都得！

2014年4月22日星期二

環保相架送媽媽

學校要爸爸同小朋友設計環保相架，hubby就同momo整咗呢個...
唉...hubby以前細個啲美術一定係D,E o架，mcqueen係呀仔鍾意，唔係我呀！仲有...張相同背後張咭，其實係momo上學期學校整o既相架o黎...well...真係夠晒環保 =_="

唔駛一分鐘就整好...都好彩...唔駛為咗囝囝有功課交而自己整番俾自己...

2014年4月21日星期一

TY 小朋友聚

朝早hubby con call，好彩約咗TY小朋友聚，過咗個愉快bubble time！

復活節假最後一天，hubby夜晚要飛，momo下晝午睡，最終冇出外活動。呢排hubby個個星期都要飛，飛到連momo都話要搭飛機。等momo放暑假，一於飛去搵daddy！

2014年4月20日星期日

娘家飯聚+拍拖日

momo好鍾意新買番黎o既骨牌車，而且都好鍾意砌，玩到唔捨得出門口。中午娘家飲茶，囝囝同表哥玩車玩得好開心，會主動搵表哥玩，已經唔駛點整佢哋。
飯後帶咗囝囝去6299到，兩老成兩個星期冇見粒孫，放低佢係到玩，我同hubby去拍拖睇戲。睇咩戲？梗係捧家輝場喇！不過，今次佢唔係主角丫~~~

2014年4月19日星期六

南丫島遊

復活節第二擊︰與Harris進攻南丫島！
一早計劃好假期去離島，長洲、大澳，momo未夠一歲已經去過，而家見佢都可以自己走動，就挑戰一吓南丫島o既山徑...不過，今日momo冇上次去新娘潭咁叻，多咗要扭抱。可能因為天氣太熱，再加上佢跌低擦傷膝蓋，所以都未上山，就已經唔多肯行。結果唔駛兩個鐘o既路程，我哋足足黎個triple！咁當然，Harris都不比momo弱，佢全程都被四圍o既人與物吸引，步速都係緩慢移動。所以，我哋可以係天黑之前上到船番中環真係偷笑...
行到上風力發電站，momo好開心咁玩bubbles。我哋第一次買呢種長型管狀o既泡泡俾佢，估唔到佢已經完全掌握個玩法！的確利害！

2014年4月18日星期五

與Harris遊西貢獅子會&郵輪碼頭

復活節假首天，約好同房一家一齊去西貢獅子會自然教育中心。成年冇見Harris，已經唔再係bb樣，而且佢身型同身高都直迫momo (阿仔，你大人哋 9個月，但差唔多高，真係細粒成咁？！)。
朝早開完con call o既hubby，到獅子會時又要con call，所以佢都冇乜點行過...而momo亦都主攻滑梯，對啲展館未有濃厚興趣住。呢到等佢大啲，可以再黎過！
參觀完畢，去咗郵輪碼頭玩咗陣。上次我同hubby黎探路，基本上都同啱啱開幕差唔多，冇乜特別設施，但momo對個水柱陣就完全投入，玩到極開心~~~
晚飯去megabox食，再行埋反斗城，搬咗個骨牌番屋企慢慢玩。