學認字

momo學校除咗每日一張簡單功課之外，每星期都會學認字，仲會中英對照。唔知係咪momo慣咗記圖畫，所以問佢係咁咩字，通常都會講啱，咁當然我又未試過就咁俾個字佢認啦！學得開心最緊要嘛！

Daddy bedtime story

自從hubby買咗好幾本新書番黎，連續好幾晚都係佢負責同momo講故事。好多時臨瞓我問佢，都指定話要daddy講，可能嗰幾本書佢知道係daddy買，所以叫daddy陪佢一齊睇，兩父子一路睇，一路有講有笑，相當溫馨。

游水小進步

momo由五月開始學游水到而家都上咗成11次，教練亦開始教新動作︰扶池邊踢水。一開始唔適應大叫大喊，唔肯俾教練捉腳幫，反而頭落水呼吸佢肯自己做。連教練都話冇人好似佢咁踢水先黎喊，哈哈哈~
今日得mami病住帶momo去上堂，所以我都冇落水陪佢，只可以坐係池邊一陣睇吓，但佢都好乖咁冇扭肯落水，又好順暢咁聽教練話做動作，咁細個都真係算好合作啦。雖然一直俾我哋迫住咁去，但每次都有少少進步，只要佢唔扭，其實我見佢係好肯聽教練講o既。

表表弟1歲生日party

表表弟係daddy表姐個仔，雖然今日daddy趕唔到番黎出席birthday party，但momo一樣玩得咁開心！到會佢就食得唔多，但生日蛋糕好快就塞晒落肚，仲只係請咗我食一啖咁大把！
成個下晝佢冇乜同其他小朋友交流，反而最開心係同個氫氣球玩，實在大搞笑~~~

Rani姐姐

momo獨生，好多時有小朋友黎屋企同佢一齊玩，都特別開心。今晚有大姐姐同佢一齊玩，姐姐會讓佢，又同佢分享，所以囝囝好鍾意呢個姐姐。其實mami都唔介意幫人湊啲同momo差唔多年紀或者大過佢o既小朋友，當momo有個伴一齊玩都幾好！

繪影繪聲玩車車

momo而家玩車，會一邊玩一邊滔滔不絕咁形容。佢對每架車o既名都非常熟悉，有時會將之前聽到o既故事內容，演繹一番，然後再同你分享自己玩車o既成果。

mcqueen沖涼液

同momo一齊買咗mcqueen沖涼液，訓練佢自己搽沖涼液係身上面，咁自理又可以再好啲，唔駛好耐就可以一take過自己沖涼喇！

mami自己發燒兩日都燒吓退吓，都知道係喉嚨痛所引起，連接送momo番學同煮飯都wing wing吓，終於今日都係睇醫生食藥快啲好。其實醫生都話喉嚨好乾，藥可以幫到，但最重要多飲水去小便、做運動、有溫差地方要加衣。我諗我應該起碼有十幾年冇試過發燒咁多日唔退，諗住唔駛靠藥，休息多啲就可以啦，但都係考慮要照顧個仔，唔可以咁死頂住。

呢兩日momo好乖咁話︰mami，你快啲好番，我好擔心你o架！

壞習慣

呢個小朋友壞習慣唔算多，但坐唔好食嘢到弊...睇睇~ 係都要棟起隻腳，唔係叫一次就即刻放番低，真係醜死怪！

Daddy接放學

hubby下午又飛，留在家home office，所以中午可以一齊去接momo放學。我特意叫hubby先出現，我在後觀察囝囝o既反應。果然momo見到daddy黎接佢好開心，我諗佢估唔到daddy會放學時間出現！
要daddy接放學o既機會真係唔多，下次hubby home office又冇con call，我實會再叫佢去接囝囝，最好係佢單獨去添啦~~~

電車遊

momo話想坐電車，於是今日過咗海由灣仔去北角來回咗一次，車頭同車尾都一次過坐晒。夜晚去咗荃灣食飯，daddy俾momo坐咗兩次Thomas投幣車，開心到暈啦~

係都要一齊吸塵

每次吸塵，momo都會自動去拎個手提吸塵機一齊同我做家務，仲會講︰我幫你呀！有時甚至會放低做緊或玩緊o既嘢衝過黎，慌死會冇佢份咁，真係好好笑~~~

聽從mami教導

momo終於習慣在商場不許玩滑板車嘅規律，唔需要提醒，自動會係商場門口就落車推車。不枉mami堅持教導佢要明白並非想玩就玩，要考慮自身及他人安全的重要性。

六舅婆送玩具

嘩~ 好多大玩具，momo真幸福，六舅婆不定期送咁多禮物。我同佢講分享俾表哥表弟，佢二話不說揀出黎，真乖仔！

首次參加填色比賽

學校派咗填色比賽表格，即管同momo發揮創意，將顏色填滿交表。三歲傑作，都唔錯呀！

K1(人生正式)第一份功課

經過兩星期嘅適應週，momo開始每日都有功課喇！好簡單一張紙，兩分鐘唔駛就可以做哂！另外仲有認字簿，學啲同教學主題嘅生字。
momo番學都䦕始揮手拜拜，冇再喊住入課室，比預期適應得快。

三老表齊齊玩

三缺一，但一樣咁好玩！最初諗住出去玩，但又想去游吓水，最後表弟表妹黎會所泳池一齊玩咗一個鐘，再由hubby下廚，大家食埋晚飯盡慶而歸！

新界東遊

今日連遊新界東o既西貢同將軍澳，momo全日應該最記得係自己差唔多飲晒支橙汁，哈哈哈~
週末去西貢食lunch真係好舒服，唔駛係巿區同人迫，又可以係碼頭睇吓海鮮。食完lunch，經清水灣路去將軍澳，momo上車冇幾耐就瞓著，點知去到將軍澳公園又醒咗冇瞓番，仲同daddy係運動場跑咗個圈，再踩滑板車去遊樂場玩咗成個鐘有多。
由於mami夜晚有飲宴，所以到咗宴會地點附近，兩父子就番6299到食飯lu。

骨牌新玩法

好無聊咁將骨牌放係momo手臂到排隊，點知佢覺得好好玩，又要係我手臂到試，小朋友係咪都鍾意啲另類玩法呢？

黃金海岸遊

中秋後假期，去黃金海岸玩咗個上午，momo對遊樂場個搖搖獨木橋好有興趣。最初因為高唔敢玩，但我同佢玩過一次之後，就不斷要我同佢玩，來來回回行咗十幾次，哈哈！跟住佢又發現另一好玩遊戲，就係喺張櫈跳落地，又係不斷重覆咁玩，自己係到狂笑~~~
中午係酒店間東南亞餐廳食飯，飯後甜品係雪糕刨冰，momo第一次食，佢唔驚啲冰凍，係咁畢，但係一見有雪糕，就唔再食啲冰喇。
夜晚係屋企玩新停車場，連合已有嘅賽道，玩到唔願瞓咁滯…

中秋快樂

中秋節，momo學校都有中秋慶祝會，唔駛著校服番學玩，放學仲拎咗上星期整o既中秋月餅番黎添！mami整咗好多雪糕月餅，所以分派咗俾同屋苑o既朋友仔，又請咗朋友仔上黎同momo玩咗陣，再同囝囝落去海濱公園到玩燈籠賞月。momo最滿足，因為有新tomica停車場收，作為佢三歲生日禮物，於是成晚痴住daddy，哈哈~

與爺爺嫲嫲到郵輪碼頭

momo上完游水堂，就去6299到食午飯，然後出發去郵輪碼頭玩。雖然呢到冇乜兒童遊樂設施，但近今晚做節食飯o既mega box，兩老又有風景睇吓，又可以坐係到睇住個孫玩水柱陣，悠閒地過下午。

夜晚兩圍食中秋飯，姑媽姑丈送咗mcqueen同怪獸大學walkies俾囝囝做生日禮物，即刻又拆咗個mcqueen出黎。太婆對momo用學習筷子反感，係咁話用完唔識揸筷子，又話以前daddy好細個就識，係咁教太孫用...well...其實學習筷子都係幫小朋友學，我自己揸筷子又唔啱，都唔敢教佢啦，細個啲小肌肉都未協調到，都唔駛咁心急啦。99仲係咁話老公細個好似歲幾就識...我真係唔多信，歲幾隻匙都未揸得好啦，何況係筷子？！

港島東南中遊

一排冇同Issac、Sophia玩，momo都提過幾次想搵佢哋，所以今日就過海玩咗一天！
先去Soho東食西班牙菜，呢到唔駛同人迫，又有唔少好味o既餐廳，如果過海去開東區，呢到食嘢真係唔錯o既選擇。
食完飯momo上車冇耐就瞓著咗，所以沿柴灣道經大潭道兜去南區，係南灣停咗車俾囝囝瞓覺。瞓醒係南灣食個tea，先再去Issac屋企玩同食晚飯，momo仲收到生日禮物添呀~~~

I'm three!

momo三歲生日快樂！mami親自整咗個momo至愛o既車仔栗子蛋糕慶祝，雖然啲車仔係拎佢啲玩具放上蛋糕面，不過好過整啲糖膠公仔有得睇冇得食嘛~
呢個小朋友前排真係‘曳’咗好多，好多時要有自己主見，要求人幫助一定要即時回應，但我o既指令就未必立即做到。最煩惱係食正餐，經常唔合作、發呆、食食吓做其他嘢、進食速度慢、最衰係"ai"人餵！唔知點解呢方面會退晒步，反而佢歲幾會自己畢晒成碗、食得快又食得多，well~~~
講野發音準確，而且鍾意學人口吻，好多時我同佢講過o既嘢，佢可以之後學我講番，尤其係我讚佢或者話佢o既說話，會識得倒轉話番我，每次我聽到都覺得好好笑。呢個仔其實學嘢記性都有番咁上下，哈哈哈~~~

囝囝3歲，在受到各方友好祝福的同時，可能大家都沒想過，我這個媽媽原來也當了3年的FTM。曾經有不少人向我媽咪說過，覺得讀了這麼多年書，全職湊小孩很浪費，倒不如去工作，每月花數千數工人照顧家庭。的確，那個年代，家庭主婦可能是沒什麼學歷的女性才會當上，而且常有人認為家庭主婦都沒事幹似的，在家帶小孩也很悶，又會與社會脫節之類......

畢竟自己沒多大的事業心，亦覺得自己不是同時兼顧教學工作和打理家庭的料子。縱使坐月後，沒有他人，沒有長老協助，又經常假性單親，十足母子相依為命一樣，但回想兒子成長的每一個點滴也能親身見證，飲食習慣生活自理亦可親自打理，所有的種種，都是作為FTM帶來的滿足。照顧家庭還真是要邊學邊做，到目前為此也尚算可以吧。感謝丈夫在外努力打拼，不久將來或許要很久才回家一次，我一定會好好照料這個家！

停不了的親子廚房

快到中秋節，想同momo整月餅，但要考慮份量和囝囝的年紀，而hubby公司亦有冰皮月餅送贈，於是揀咗整一口朱古力雪糕月餅，貪佢容易食又好味，momo又可以全程幫到手，正！

暑假累積咗多過二十次o既入廚經驗，momo的確係好幫手，我相信佢係升小之前，應該可以獨立自己整到最少一樣食物。比起上好多興趣班、拎好多獎項o既小朋友，我覺得懂得烹飪更為重要！

學校要小朋友設計生日會服裝，以作壁報佈置之用。簡單啲叫momo用貼紙裝飾件車手裝，突然發現momo最愛mcqueen o既號碼，正正係佢生日日期！唔怪之得你咁like啦，哈哈哈~~~

滑板車接送上學

正式要自己上課啦，有兩星期o既適應期，直至下星期五都係番兩小時，希望momo快啲投入校園生活，唔駛再咁記掛住daddy mami啦~ 呢個仔太鍾意爸爸媽媽，所以要揮手道別係一定會喊。但我知道佢唔會喊得耐，到學校有玩具有活動o既時候，就一定開心笑！

由於momo o既步速實在太慢，所以滑板車成為K1接送上學的重要工具！時間起碼快一倍，又唔駛驚佢行行吓扭抱，我自己都冇咁辛苦。

開學遊戲日第二天

全校遊戲日第二天，流程相約。手工部分momo同mami都特別鍾意，因為小朋友可以親自為自己課室o既窗簾布加添色彩！呢個仔當然又係話要畫車啦，呢啲車會陪住佢整年上課，實好有親切感，哈哈~

開學遊戲日第一天

全校遊戲日，K1至K3小朋友都番去玩，非常墟冚。流程同之前相約，最後o既手工係為生日會個袋仔填色繪畫，momo當然又係要畫唔同種類o既車啦~~~

完成一百塊砌圖

momo已經可以不用太多協助下，自行完成一百塊o既砌圖啦！真係冇諗過佢未夠三歲都有呢個能力，仲可以一邊砌，一邊話俾我知某一塊係屬於邊一個部分，叻仔！

處女之星生日buffet

今日momo玩足全日，幾乎冇瞓過覺！
先係到訪Sky100, 天氣晴朗加上空氣質素佳，視野廣闊，早上人流較少，感覺舒適！離開Sky100,就在入口那間Holly Brown吃午餐，momo有得飲奶昔特別開心！
午餐後去接埋6299到中大，momo玩滑板，又玩波。明明已經好攰，但上車去尖東都仲未肯瞓，結果落車前只係瞓到半個鐘左右。
今年三個處女之星嘅生日會係食buffet大餐，仲要係表弟正日，有個蛋糕仔送添！用餐途中有小丑扭波波，大人小朋友都好開心！呢個年度家庭聚會，一定起碼keep住到佢哋讀完小學~~~

K1新生適應遊戲日第二天

第二日嘅新生遊戲日，流程同昨日差唔多，只係英文部分轉咗普通話。因為今日有daddy一齊，所以momo特別開心，warm up都快咗少少。
手工部分係設計書仔封面，momo好鍾意用顏色點點點！

K1新生適應遊戲日第一天

早上起來，穿上新校服的momo精神抖擻的和mami上學去！K1新學校不用搭(校)車，mami可以每天都和momo步行回校/家，而daddy也可間中一同送囝囝番學才去上班，我諗momo應該更快樂~~~
班主任前天致電聯絡過，momo編入喜樂班，mami很喜歡班名，希望囝囝的幼稚園生活充滿喜樂！一小時的遊戲日分幾部分︰先是同唱早晨歌，然後是大圍遊戲，再來是英語唱遊，以及匙扣勞作。momo一如以往的慢熱，前三部分都不大願意參與，直至進入課室的勞作部分，才開心的投入畫畫設計。
對比N班和K1的首天上學照，momo的確大個仔咗，從照片睇好似長高咗好多，但其實真人仲係好細粒，仲好bb樣咁，哈哈~

暑假最後一天

明天雖然唔係正式開課日，不過學校準備咗兩天o既新生遊戲日，所以暑假今天要結束了！
親子廚房玩得多，今天決定帶momo出走吃好東西~ momo和mami都愛蛋糕甜點，就帶他遠征PMQ的古生古太甜品啦！
吃過飯搭地鐵出發，到香港站下車步行到PMQ。其實一點兒也不近，mami仲要兜了個大圈，想必囝囝也行得有點累。幸好到達後，吃到他最愛的栗子蛋糕，應該可以把之前的辛苦一掃而空吧！
本來一場黎到，好應該帶他參觀這幢歷史建築物，但接近放工時間，再加上momo過了午睡時間，精神開始透支了，便趕快回家好好休息，準備迎接明天的上學日。
約好momo下次帶daddy一齊來，到時再慢慢感受歷史氣息吧~~~

與momo全日分別

朝早要去廣華覆診，所以晨早送咗momo過去6299到。係專科等候o既時間比預期快，半個鐘就搞掂走得，所以去咗尖沙咀行咗陣，順便食埋午餐，先番荃灣整頭髮。估唔到一整就搞到天黑先走咁滯，接番囝囝番屋企，就已經到瞓覺時間lu...所以全日都冇同momo玩過~

暑期親子廚房之蝴蝶酥

蝴蝶酥~~~ 媽媽至愛之一，原來係超易整！第時想食唔駛一定出街買喇~~~

又到麗都灣

趁暑假去多次沙灘玩！有車去麗都灣真係唔錯，唔算多人風景又好，只係辛苦少少要上落幾十級樓梯，好似momo呢啲年紀以下o既，就多數要抱住先得...

momo今日痴住daddy玩沙，跟足daddy指示，連執拾都非常願意幫忙，似乎地方熟絡咗，佢o既安全感係會提升！

吉卜力工作室展覽

momo鍾情cars, planes, 都係pixar, disney o既卡通片，宮崎駿o既卡通片其實都冇接觸過。其實mami同daddy都好喜歡宮崎駿o既卡通，尤其係早期o既天空之城、龍貓。呢次展覽所展出o既手稿真係非常珍貴，十分佩服宮崎駿先生o既創意以及工作室團隊o既畫功！momo雖然未接觸過展覽入面o既卡通，但大部分都好感興趣，daddy話係時候唔好只睇disney卡通啦~~~

暑期親子廚房之糖不甩

糖不甩係mami至愛之一，所以我都希望momo喜歡吃。呢個小食，天係簡單易做，只需搓好糯米粉成小粒，以糖水煮熟，然後灑上花生碎便成！不過，要趁熱才好吃。如果想凍食，咁以同一方法，搓大粒，再加餡料煮熟，灑上椰絲再雪凍，便成好吃糯米糍！

momo 發惡夢

成晚都好無助，momo半夜兩點幾係到大叫大喊，問佢咩都話唔好，問佢想點又話唔知想點。我直頭開咗燈，一路平靜同佢講嘢，但佢都好似不受控制咁係到發忟憎，搞咗都有大半個鐘，先瞓番，但仲係瞓住咁係到發開口夢講唔係，唔好。
我覺得佢發惡夢，昨晚係6299到食飯時扭計，又係大喊，俾mami罰企。
唉！但都唔駛咁對我呀，半夜黎㗎，得我一個好驚㗎，個人醒晒，成晚瞓唔番，諗住瞓唔番打blog, momo keep住間唔中係到叫，除咗病，第一次反應咁大。
然後6點幾，又陷入神志不清衰喊狀態，我講咩都聽唔入，聲都沙埋。
最後，俾咗啲水佢飲，趴咗係我個身到瞓。我都唔敢郁到佢，好驚又黎過...朝早瞓醒，好似完全冇發生過咁精神爽利，難為我驚咗成晚...

由於今日有師傅上黎搭棚換冷氣，都冇帶momo去玩。但呢個小朋友對搭棚同裝冷氣機都好感興趣，係咁走入房睇發生咩事，哈哈！yeah! 主人房冇咗冷氣用兩個月，終於都換到個新冷氣啦...真係等業主跟進咗好耐啦！

momo有手錶啦

見6299 weekend冇見過momo, 而個孫又就快開學，於是今朝上完oxford path, 食完午餐，就上咗6299到。我就乘機去salon，諗住做perm同highlight換個新髮型。點知細舖老闆今日好多booking，唔夠時間做，就只好剪咗頭先，再約下星期電。
番上去6299到食晚飯前，經過啲扭蛋機到見到有cars手錶，就扭咗一隻俾momo做獎勵，雖然未識睇數字時間，但希望有隻鍾意嘅公仔手錶會容易上手學習喇！

暑期親子廚房之鮮果乳酪脆脆

momo係冇用藥嘅情況下自己退燒，真係叻仔！見佢冇其他病徵，應該問題不太，可能真係星期六玩得太癲啫。今日黎個超簡單嘅茶點，用水果，格格脆，粟米片，水果同乳酪，好似啲新地咁分層整咗個鮮果乳酪脆脆，最後momo食唔晒，哈哈！

發燒中的美食節

朝早起床時發現momo的手腳有點熱，量體溫有點偏高，但沒有發燒，於是照常出發去最後一天的美食節。雖然有點扭抱，但momo一路上都十分興奮。到達會場時已接近中午時間，當然就在這裡吃午餐啦，momo吃得不多，只對哈密瓜和香腸有興趣，烏冬亦吃了幾口便算。
來美食節最想買的是益力多的玩具和一丁購物車，益力多找到了，但一丁車已售罄，好可惜喲...見囝囝眼皮垂下，抱上手更覺得身體很熱，有發燒的徵象，而且很快便睡著，於是趕緊回家安頓。回家一量體溫已多達38度，立即沖溫水涼，並叫momo多飲水，然後在床上再睡。晚上起來吃粥時，雖然未退燒，但見仍有胃口，又沒有其他病徵，人亦精神，便即管不用藥，只給了維他命c和elderberry，繼續觀察情況。睡前再多沖一次涼，又大量飲水，以助降溫。希望自己退燒啦，如果半夜瞓得唔好，又唔退燒，先考慮用藥啦~~~