整pancake

momo喜歡m記的pancake早餐，今天就一起弄來當茶點吃。

好吃檸檬批

早上下雨，又天陰陰，沒得去遊樂場玩，就去中大走走。momo在main lib前玩滑板車，剛好有另外兩三個孩子也在玩，momo就不斷在跟著轉。小朋友去到哪兒，他也歡樂地跟隨著，那爸媽可以坐在一旁看他玩。
除了滑板車，momo今次試了檸檬批。看他這個開心的樣子，就知道是多好吃啦~~~

太累的小朋友

早起早睡o既momo，再加冇午睡番下午班，當精神同體力透支o既情況下，好多時都會係放學番黎瞓咗，又或者食食吓飯釣魚釣到瞓著。即使學期將近完結，都難於調整。幸好，呢個小朋友可以一瞓到天光，好多時晚上7,8點入睡，都可以到早上7,8點起床，計落都有12-13小時睡眠，應該都好足夠。只係睡醒後要撐足10-12小時，係會攰啲o既...

33 months old

1000日之後，momo開始夜晚都冇濕片啦，睇黎就快可以戒晒片片喇，yeah~ 仲諗住佢可能三歲都未得，但原來只要ready好，就好快掂！
呢個月仲有另一樣進步o既，就係開始識得連線練習喇。當然未可以好順暢咁書寫，但見佢咁用心寫，仲要做完一頁，又想做一頁，真係好認真。希望將來都係咁積極做好功課啦~~~

又黎新車...

daddy又入咗兩架新tomica俾momo喇...囝囝嘅cars家族持續增加！
點解mami冇禮物㗎？買俾個仔又咁順灘...

大扭計

momo以往少有哭鬧的情況，即使有扭計時，都不是無理取鬧的。但最近他可以因為不順心的事，在一個早上，發脾氣次數多達三次，還要不斷講︰唔好！唔好！然後，當然是發癲說甚麼都聽不入耳...
其實大部分都係小事，例如早餐選擇、除褲去小便、要求他拾回跌在地上的東西...等等，總之他覺得不如意，就要撒野一番...那如何處置？
一般就叫他要停止，若不停止便讓他發難完畢，情緒安定後，才講道理，並要求他道歉，及重申下次應如何表現才是好孩子的行為。至於收唔收效，都視乎情況，但肯定他一定有記在心的。因為有時他平靜和我說話的時候，都會講︰我冇扭計呀，我乖呀。今日我......

說到底，momo還是最怕mami唔睬佢，或者冇回應佢，想要mami陪住身邊~

探馬b之二

端午節當然要吃粽子應節啦，momo一見到就好興奮，但都只象徵式吃了一口...然後，在出發探Baby Kaia之前，一家三口在家賞龍舟競渡！momo仲要坐定定睇，非常捧場，仲搞到遲咗去睇bb添...
Baby Kaia剛好小Baby Maris一個月，今日兩個小b拍埋一齊影相時，真係好可愛！momo去到9月小朋友家排訪，很快融入小朋友中一齊玩耍，雖然佢冇份做哥哥，但都同其他升任做哥哥姐姐o既小朋友們一樣，大個咗喇！

今次整咗玫瑰頭飾俾Kaia扮靚靚，嘻嘻~

盪鞦韆進級版

下午同咗99去探太婆，然後番6299到做節。食飯前，momo去樓下公園玩番夠本先！今日自己話要試坐平板鞦韆，第一次坐都算唔錯啦，仲想學隔離哥哥咁向前後fing腳仔，但又未識得平衡，哈哈~

誕生1000天

Day 1000要好好慶祝，先同表弟去沙灘玩，但momo都仲係好驚海浪，連走近啲都大喊大叫，大部分時間都係坐係到玩沙。表弟第一次落沙灘，反而四圍走，就算走近海水都冇有怕。
係咁大對比之下，hubby又話我overprotect momo，黎幾多次沙灘，佢都會驚。問題係，momo怕水嗎？不然，因為去泳池同沖涼洗頭都唔怕的。要明白囝囝性格慢熱、怕生、喜觀察、需要安全感，強迫佢走近海水，試圖要佢跨越恐懼，呢個方法對佢黎講係唔work，只會令佢有更大陰影、更抗拒接觸。(當然，性格外向o既小朋友，根本唔需要推佢，都已經自己四圍探索了！) 但這就代表放棄嗎？保護過度嗎？不不不！應該要從根本了解這個孩子怕的是甚麼？只要知道囝囝所懼怕的東西，就能幫他克服，而非強迫他去面對。
或者這是男女之間思維的不同，爸爸見兒子經常拈人，以強硬的方法欲令兒子成長，覺得兒子需要磨鍊，可是，要由 0 即變 100，在我們的兒子身上是行不通的，尤其他年幼，亦需要安全感和信心。欲速則不達，明解嗎？
而我則認為循序漸進，才有利兒子成長。讓他有空間去改善，欣賞他的進步，鼓勵他去嘗試，激發他的勇氣，肯定他的實踐，慢慢建立自信面對困難。
小小心靈一旦受創，需花時間修補的，何不先了解他內心的想法才行動呢？

然後...
我︰momo你好驚浪係咪？
momo︰係丫。
我︰做咩咁驚浪呀？
momo︰....(唔知如何回應)
我︰係咪驚啲浪沖走咗momo呀？
momo︰係丫。
我︰啊！唔駛驚，浪好好玩o架嘛，有daddy, mami陪你o架嘛，咁下次再黎玩，momo唔駛咁驚o架！你今日都叻仔喎，自己行咗出沙灘同mami畢水喎，咁momo係咪都有畢到水呀？
momo︰有呀。
我︰係囉，你都做到o架嘛，下次黎，我哋又再叻啲！

momo其實係驚啲水會郁，會沖走自己，那向這方面著手，好快就可以開心玩水了！(Daddy強調，上年到布吉時，momo每次都肯落水，冇驚水，點解大咗會驚？well...一個人大咗，對事情有認知能力時，都會產生恐懼o架嘛，唔係點解人會越大越細膽喎...而且...momo上年都係怕浪的...完)

晚上到regal食大餐，momo因為太盡興，是日沒有午睡的情況下，終於在吃雪糕中途釣魚瞓著咗...

話時話，囝囝1000日大，都代表住我做咗1000日FTM啦，真係唔覺唔覺打咗份無薪工咁耐日子喇~

泥膠切切切

記得啱啱買泥膠番黎o既時候，momo都唔多感興趣，好多時都係我開俾佢先玩一陣。但佢最近玩泥膠叻咗，會自己拎個蓋，開啲盒出黎自己玩，而且搓揉能力提升，仲識得將一條泥膠切細粒，玩法開始有多啲變化啦~

新機試吃

換咗新麵包機，梗係要搵momo黎做試食專員啦！以後pizza、餃子、麵食都靠晒P仔啦，yeah~

背心mo跑步去

呢幾日momo放咗學食完飯，都仲好精神冇乜睡意，又見天氣晴朗，於是去跑番個圈做運動出一身汗先。不過，應該大熱天跑，真係未夠一圈已經濕晒件衫咁滯，連momo都話好濕，唔想再跑...

學校兒童節慶祝活動造型

車手mo，真係好型仔！唔知老師會唔會鍾意囝囝呢個look呢？

最近的學校手工

最近幾星期的主題是寶寶的生活，介紹交通工具，連手工都是車、船、地鐵、飛機，真係啱晒我家小兒，哈哈哈~

麗都灣玩沙

中午學完游水，食過lunch，momo就係車上午睡，遊咗陣車河，打算待他睡醒就去沙灘玩。我哋沿青山公路探索吓啲人少o既沙灘，好快就搵到多樹蔭o既麗都灣，咁啱停好車後，momo就瞓醒，於是係呢到玩咗個下午。momo仲因為想玩小朋友o既沙灘玩具車，叫mami陪佢一齊去問小朋友可唔可以一齊玩。於是，佢係咁堆啲沙去架車到，想埋咗架車咁滯...

茶木check in

終於有機會黎茶木嘆雪糕吐司，睇吓momo個開心樣！而家一有雪糕食，就咩都唔理，要同我哋爭住畢，我諗佢個肚仔可以裝得兩球或以上...

雞蛋模

momo每次食烚蛋都係自己搣殼，今日搞搞新意，用年前購入o既雞蛋模黎整個卡通雞蛋造型俾佢食。雖然冇得自己搣，但佢一見係車仔，就即刻好興奮，睇佢食得幾滿足！

搣花生

momo鍾意食花生，有時一圍枱食中餐，枱面有碟nuts，佢就會自動要求話想食。咁我都會俾佢淺嚐一下，始終啲nuts帶有鹽份，多食無益。如果係整粒帶殼o既花生，就可以俾多幾粒佢自己學吓搣。因為自己想食，所以佢都好用心咁學，但都仲要啲時間先可以懂得運力。要mami開咗第一吓，佢先容易啲自己取出花生吃。

開水龍頭洗頭？！

呢個小朋友自從上完游水堂後，好似突然唔驚洗頭，仲要學daddy朝早自己開水龍頭係到沖頭...真係冇佢收...

家事小幫手篇之換床單

今日momo尿濕床，夜晚佢見我換床單，係咁話要幫手。當然極之歡迎啦，唔係你，mami都唔駛換...但估唔到囝囝都做得有板有眼，抵讚！

monkey上身

唔知係咪昨天睇過monkey，今日即刻monkey上身，係到起勢咁爬上梳化頂到坐，然後當滑梯咁滑番落黎...

到城門睇猴子

momo今日正式上咗一堂游水堂喇！只係喊住叫媽咪十分鐘，其餘時間都有聽教練講，應該都算係好開始喇~
游完水接埋細佬食飯，就入屯門佛堂與大細妹會合，與爸媽在佛堂小聚後，我會便離開到城門水塘睇monkey！估唔到俾我哋近距離見到monkey食雪條！？仲要食得好乾淨，連跌落地同身o既部分，佢都會lam番。我哋係車入面睇，momo見到勁興奮，爭啲一落車就想行埋去咁滯...我同hubby都係第一次見monkey咁樣食雪條法，真係笑到我哋唔停，哈哈哈~~~

屋邨遊樂設施

其實屋邨啲遊樂場設施，有時仲好過啲大公園或私人屋苑。遇著啲人口老化o既屋邨，啲遊樂場仲唔係太多小朋友玩，唔駛迫又唔駛爭。momo今日黎到南山邨，玩完仲去埋茶餐

廳嘆個下午茶先上車瞓，超爽！

學校兒童節慶祝之服飾選擇

momo學校月尾有慶祝國際兒童節活動，早前出通告話要為小朋友設計造型回校。我問momo想扮咩，佢話獅子、恐龍、elephant。不過，mami就諗，momo咁鍾意車，不如就扮賽車手或者汽車維修員啦，加埋佢最鍾意o既cars，一定好開心！於是，就淘寶咗頂cap帽同兩件衫番黎。因為唔想佢只著得一次咁浪費，就買咗3-4歲size，搞到超大件，真係4,5歲都應該仲啱著。尤其係右面嗰件，momo著到成個太空人咁，而且應該好熱，到時都係著左面嗰件番去玩喇！

家事小幫手篇之拖地

momo喜愛做家務的程度已達到不能沒他份兒了，就連拖地都要參與埋...而且，佢見mami戴手套工作，又嚷著要戴埋一份！不過，佢都好認真做，不是全當嬉戲玩樂，又會提mami小心跣 (學我講...哈哈)，連擰地拖都要一齊做！

第時真係可以做清潔保長 XD

塗鴉︰笑臉

momo喜歡車，好多時塗鴉都係以車為主，但原來佢都識得畫眼口鼻，而且位置同比例都合適o架喎！不過，耳仔就未啱位住...但都可以畫到笑臉呢~~~

自理篇之穿衣服

momo︰我會自己穿衣服！衫褲鞋襪都難我唔到喇~~~
mami︰咁以後出街，我哋可以各自換衫加快速度啦！

未夠三歲的momo，自理能力應該超晒標。mami應該好快可以繑埋雙手o架啦，yeah~

團購mo物

早前團購咗好幾樣用品俾momo，部分空運到港就即刻去拎。momo見到cars底褲仔超開心，仲即刻話想著添呀！剪刀佢都好想用，但就未識用住...期待其他o既物品到貨，暑假時可以同momo齊齊玩！

親親MaMa Cupcake 甜蜜工房

母親節正日，天氣極度惡劣，不宜外出玩樂。幸好日前報名參加cupcake工作坊，正正在家樓下，讓我們母子二人，開心渡過愉快的下午！

大會提供材料作親子手袋曲奇和高根鞋cupcake，momo和mami一起裝飾得很開心，而且整個過程都沒有偷吃丫！

媽媽咪咪嘉年華

因為上網報名參加咗兩項活動，而且仲有免費入場券，所以順利成章帶momo黎到博覽館到玩。上午入場時人少，啲充氣滑梯同其他活動都唔需要排隊。如是者，係天氣惡劣o既周末，都可以好好玩樂一番。中午離開會場，到機場酒店吃日本菜。momo因為病的原故，只吃了mami預備的肉碎粥便睡了...(他昨晚有點發燒，慶幸今早已自己退燒了)
在機場T2逛了一會，到disney店時，momo也睡醒，興奮的看他喜歡的mcqueen。回家稍作休息後，便到6299家吃母親節飯。

學校的母親節手工

嘩！有花收有花收！momo今個星期o既小手工係一紮花同手環，接放學時我問佢送俾邊個，佢話係送俾mami o架~~~ 第一次收到囝囝親自整o既禮物，真係好開心呀！

家事小幫手篇之齊齊吸塵

吸塵係momo最愛的家事之一，經常隨手就拎起手提吸塵機用，好多時見我用大機，佢就自己去拎個手提一齊吸，而且一啲都唔馬虎！誰說小小的孩子不能做好家事呢？

自理篇之擠牙膏

早晚自行刷牙，已加添擠牙膏一項，少不免力度掌握不佳，導致太多牙膏擠出，但這是自理學習的過程。擰開/關牙膏蓋及開關水龍頭表現不俗，而且更會幫mami的漱口杯注水！

家事小幫手篇之落材料煲湯

煲湯落材料對momo黎講係好好玩o既事，尤其係最後注水的部分。經常出入廚房後，momo的安全意識增加不少，知道爐邊不可靠近，利刀和熱的爐具不可碰。而且，他更對多樣食物的認識和處理都頗為了解，看來活動教學對這個文靜的孩子也不錯！

32 months old

新look第一日番學，唔知啲老師點睇呢？
兩歲半之後，越來越自主，但好多時又變番bb好嗲mami。強項依然係主動幫手做家務，其他一切發展正常，特別喜歡音樂，經常高歌幾曲叫你估歌仔~~~

人生第一堂游泳課+剃頭記

游水是求生技能之一，當然越早學越好。既然有親友介紹私人教練，唔駛盲中中去搵，就好好把握呢個機會，睇吓momo三歲前可唔可以學到浮身。

爸媽陪佢一齊上第一課，原本好興奮入場。但天氣凍加上見到陌生人，而且mami冇換衫落水，所以基本上都冇上過堂...諗住佢肯跟daddy，可惜呢個想法錯晒，只係攬住我唔放手...結果教練冇收學費住，話當觀察，下一次先計。可能今年第一次下水，所以momo未warm up，我哋決定下一次早啲同佢入場玩住先，等佢可以容易啲接受。

天氣不佳，留在家幫momo換個新髮型。囝囝啲頭髮長得慢，接近一年冇剪過，原定要剃光頭的，最後daddy整咗個潮look。估唔到都好多人讚喎！

香港仔健身徑

天氣晴朗，當然去郊遊啦！今次揀咗香港仔水塘為目的地，相比momo之前行過嘅新娘潭同南丫島，呢到更為舒適。健身徑沿途達八成以上都有樹蔭，亦有十多個健身點。momo好願意行，幾乎對每個健身點都好有興趣，最後成功行畢全程2.1km都冇抱過。見佢咁叻仔，就獎個甜筒佢食啦！

在校車主動揮手說再見

話說momo搭校車以來，都係喊住離開，仲擔心佢會唔會直到N班最後一日都仲係咁。好彩，呢個星期開始，佢不但冇喊，仲同mami揮手bye bye，終於都大個仔咗喇！

同場加映︰自行穿衣look！其實我拍低咗video，自己著到咁係到狂笑~~~
其實囝囝已經識得自己著，搵日拍番個正經版先得！

撈魚仔

是日重點活動為撈金魚！momo雖然一條都撈唔到，但佢好熱衷呢項活動。不過mami都唔比momo好好多，都係撈得兩條，冇玩咁耐，唔記得咗技巧添~ 計埋hubby撈到四條，都未合條件帶魚回家...哈哈...開心吓就好，都唔預要拎魚啦！