最近的學校手工

最近幾星期的主題是寶寶的生活，介紹交通工具，連手工都是車、船、地鐵、飛機，真係啱晒我家小兒，哈哈哈~

麗都灣玩沙

中午學完游水，食過lunch，momo就係車上午睡，遊咗陣車河，打算待他睡醒就去沙灘玩。我哋沿青山公路探索吓啲人少o既沙灘，好快就搵到多樹蔭o既麗都灣，咁啱停好車後，momo就瞓醒，於是係呢到玩咗個下午。momo仲因為想玩小朋友o既沙灘玩具車，叫mami陪佢一齊去問小朋友可唔可以一齊玩。於是，佢係咁堆啲沙去架車到，想埋咗架車咁滯...

茶木check in

終於有機會黎茶木嘆雪糕吐司，睇吓momo個開心樣！而家一有雪糕食，就咩都唔理，要同我哋爭住畢，我諗佢個肚仔可以裝得兩球或以上...

雞蛋模

momo每次食烚蛋都係自己搣殼，今日搞搞新意，用年前購入o既雞蛋模黎整個卡通雞蛋造型俾佢食。雖然冇得自己搣，但佢一見係車仔，就即刻好興奮，睇佢食得幾滿足！

搣花生

momo鍾意食花生，有時一圍枱食中餐，枱面有碟nuts，佢就會自動要求話想食。咁我都會俾佢淺嚐一下，始終啲nuts帶有鹽份，多食無益。如果係整粒帶殼o既花生，就可以俾多幾粒佢自己學吓搣。因為自己想食，所以佢都好用心咁學，但都仲要啲時間先可以懂得運力。要mami開咗第一吓，佢先容易啲自己取出花生吃。

開水龍頭洗頭？！

呢個小朋友自從上完游水堂後，好似突然唔驚洗頭，仲要學daddy朝早自己開水龍頭係到沖頭...真係冇佢收...

家事小幫手篇之換床單

今日momo尿濕床，夜晚佢見我換床單，係咁話要幫手。當然極之歡迎啦，唔係你，mami都唔駛換...但估唔到囝囝都做得有板有眼，抵讚！

monkey上身

唔知係咪昨天睇過monkey，今日即刻monkey上身，係到起勢咁爬上梳化頂到坐，然後當滑梯咁滑番落黎...

到城門睇猴子

momo今日正式上咗一堂游水堂喇！只係喊住叫媽咪十分鐘，其餘時間都有聽教練講，應該都算係好開始喇~
游完水接埋細佬食飯，就入屯門佛堂與大細妹會合，與爸媽在佛堂小聚後，我會便離開到城門水塘睇monkey！估唔到俾我哋近距離見到monkey食雪條！？仲要食得好乾淨，連跌落地同身o既部分，佢都會lam番。我哋係車入面睇，momo見到勁興奮，爭啲一落車就想行埋去咁滯...我同hubby都係第一次見monkey咁樣食雪條法，真係笑到我哋唔停，哈哈哈~~~

屋邨遊樂設施

其實屋邨啲遊樂場設施，有時仲好過啲大公園或私人屋苑。遇著啲人口老化o既屋邨，啲遊樂場仲唔係太多小朋友玩，唔駛迫又唔駛爭。momo今日黎到南山邨，玩完仲去埋茶餐

廳嘆個下午茶先上車瞓，超爽！

學校兒童節慶祝之服飾選擇

momo學校月尾有慶祝國際兒童節活動，早前出通告話要為小朋友設計造型回校。我問momo想扮咩，佢話獅子、恐龍、elephant。不過，mami就諗，momo咁鍾意車，不如就扮賽車手或者汽車維修員啦，加埋佢最鍾意o既cars，一定好開心！於是，就淘寶咗頂cap帽同兩件衫番黎。因為唔想佢只著得一次咁浪費，就買咗3-4歲size，搞到超大件，真係4,5歲都應該仲啱著。尤其係右面嗰件，momo著到成個太空人咁，而且應該好熱，到時都係著左面嗰件番去玩喇！

家事小幫手篇之拖地

momo喜愛做家務的程度已達到不能沒他份兒了，就連拖地都要參與埋...而且，佢見mami戴手套工作，又嚷著要戴埋一份！不過，佢都好認真做，不是全當嬉戲玩樂，又會提mami小心跣 (學我講...哈哈)，連擰地拖都要一齊做！

第時真係可以做清潔保長 XD

塗鴉︰笑臉

momo喜歡車，好多時塗鴉都係以車為主，但原來佢都識得畫眼口鼻，而且位置同比例都合適o架喎！不過，耳仔就未啱位住...但都可以畫到笑臉呢~~~

自理篇之穿衣服

momo︰我會自己穿衣服！衫褲鞋襪都難我唔到喇~~~
mami︰咁以後出街，我哋可以各自換衫加快速度啦！

未夠三歲的momo，自理能力應該超晒標。mami應該好快可以繑埋雙手o架啦，yeah~

團購mo物

早前團購咗好幾樣用品俾momo，部分空運到港就即刻去拎。momo見到cars底褲仔超開心，仲即刻話想著添呀！剪刀佢都好想用，但就未識用住...期待其他o既物品到貨，暑假時可以同momo齊齊玩！

親親MaMa Cupcake 甜蜜工房

母親節正日，天氣極度惡劣，不宜外出玩樂。幸好日前報名參加cupcake工作坊，正正在家樓下，讓我們母子二人，開心渡過愉快的下午！

大會提供材料作親子手袋曲奇和高根鞋cupcake，momo和mami一起裝飾得很開心，而且整個過程都沒有偷吃丫！

媽媽咪咪嘉年華

因為上網報名參加咗兩項活動，而且仲有免費入場券，所以順利成章帶momo黎到博覽館到玩。上午入場時人少，啲充氣滑梯同其他活動都唔需要排隊。如是者，係天氣惡劣o既周末，都可以好好玩樂一番。中午離開會場，到機場酒店吃日本菜。momo因為病的原故，只吃了mami預備的肉碎粥便睡了...(他昨晚有點發燒，慶幸今早已自己退燒了)
在機場T2逛了一會，到disney店時，momo也睡醒，興奮的看他喜歡的mcqueen。回家稍作休息後，便到6299家吃母親節飯。

學校的母親節手工

嘩！有花收有花收！momo今個星期o既小手工係一紮花同手環，接放學時我問佢送俾邊個，佢話係送俾mami o架~~~ 第一次收到囝囝親自整o既禮物，真係好開心呀！

家事小幫手篇之齊齊吸塵

吸塵係momo最愛的家事之一，經常隨手就拎起手提吸塵機用，好多時見我用大機，佢就自己去拎個手提一齊吸，而且一啲都唔馬虎！誰說小小的孩子不能做好家事呢？

自理篇之擠牙膏

早晚自行刷牙，已加添擠牙膏一項，少不免力度掌握不佳，導致太多牙膏擠出，但這是自理學習的過程。擰開/關牙膏蓋及開關水龍頭表現不俗，而且更會幫mami的漱口杯注水！

家事小幫手篇之落材料煲湯

煲湯落材料對momo黎講係好好玩o既事，尤其係最後注水的部分。經常出入廚房後，momo的安全意識增加不少，知道爐邊不可靠近，利刀和熱的爐具不可碰。而且，他更對多樣食物的認識和處理都頗為了解，看來活動教學對這個文靜的孩子也不錯！

32 months old

新look第一日番學，唔知啲老師點睇呢？
兩歲半之後，越來越自主，但好多時又變番bb好嗲mami。強項依然係主動幫手做家務，其他一切發展正常，特別喜歡音樂，經常高歌幾曲叫你估歌仔~~~

人生第一堂游泳課+剃頭記

游水是求生技能之一，當然越早學越好。既然有親友介紹私人教練，唔駛盲中中去搵，就好好把握呢個機會，睇吓momo三歲前可唔可以學到浮身。

爸媽陪佢一齊上第一課，原本好興奮入場。但天氣凍加上見到陌生人，而且mami冇換衫落水，所以基本上都冇上過堂...諗住佢肯跟daddy，可惜呢個想法錯晒，只係攬住我唔放手...結果教練冇收學費住，話當觀察，下一次先計。可能今年第一次下水，所以momo未warm up，我哋決定下一次早啲同佢入場玩住先，等佢可以容易啲接受。

天氣不佳，留在家幫momo換個新髮型。囝囝啲頭髮長得慢，接近一年冇剪過，原定要剃光頭的，最後daddy整咗個潮look。估唔到都好多人讚喎！

香港仔健身徑

天氣晴朗，當然去郊遊啦！今次揀咗香港仔水塘為目的地，相比momo之前行過嘅新娘潭同南丫島，呢到更為舒適。健身徑沿途達八成以上都有樹蔭，亦有十多個健身點。momo好願意行，幾乎對每個健身點都好有興趣，最後成功行畢全程2.1km都冇抱過。見佢咁叻仔，就獎個甜筒佢食啦！

在校車主動揮手說再見

話說momo搭校車以來，都係喊住離開，仲擔心佢會唔會直到N班最後一日都仲係咁。好彩，呢個星期開始，佢不但冇喊，仲同mami揮手bye bye，終於都大個仔咗喇！

同場加映︰自行穿衣look！其實我拍低咗video，自己著到咁係到狂笑~~~
其實囝囝已經識得自己著，搵日拍番個正經版先得！

撈魚仔

是日重點活動為撈金魚！momo雖然一條都撈唔到，但佢好熱衷呢項活動。不過mami都唔比momo好好多，都係撈得兩條，冇玩咁耐，唔記得咗技巧添~ 計埋hubby撈到四條，都未合條件帶魚回家...哈哈...開心吓就好，都唔預要拎魚啦！

青衣戲棚

青衣一年兩次開戲棚，是夜帶momo買嘢食，見有大雪糕球賣，就破例俾佢自己食人生第一個甜筒啦~~~

棋子初體驗

呢份棋係上年去啟思開放日送o既，今日拆開黎同momo玩。佢當然唔識數步啦，但擲吓骰仔，由起點行到終點都已經好開心喇~ 好快就可以一齊玩盡各類board game o架啦！

親子繽紛世界

學校舉行咗個親子藝術活動，mami又可以去學校同momo一齊玩。
老師首先安排家長到另一課室作N班學校片段分享，從相片同影片裏面所見，momo好投入學校o既生活，音樂同體能活動都好有反應，真係感動到我都有啲眼濕濕。依個小朋友，雖然番到屋企唔多講係學校做咗咩，但見佢適應晒環境又開心，咁已經好足夠喇！

完咗分享會，家長就分兩組，一組先進入課室，另一組在課室外的角落活動。momo一見課室開門，又係第一時間彈咗起身去望我，仲要走埋出位叫mami，睇黎佢真係好興奮。又即刻係咁望實我，亦好主動俾mami畫花面。我即刻諗，hubby黎唔到，實在冇咗個機會了解在校園裏的兒子。我見有小朋友雙親皆未能出席，雖然冇見到小朋友唔開心，但我可以想像到momo見唔到mami黎o既失望樣子，所以我欣慰自己離開教育界，唔係我都一定錯失晒呢啲機會，要知道老師係冇al可請o架嘛！

與爺嫲同遊大埔海濱公園

朝早去m記食早餐，買咗momo人生第一個happy meal。佢見到有玩具，即刻話要拆，哈哈哈~
食完早餐就揸車接埋6299去公園玩。爺爺唔多可以行到遠路，要同佢哋去玩，地方都好有限制，遠足、樂園可以免問，咁要滿足囝囝o既話，去吓公園遊樂場草地呢啲就啱晒。
春夏來到，冬眠動物亦甦醒，要提醒囝囝唔好胡亂踏入草地，因為蛇出沒注意！上年蛇年，教識咗蛇，今日終於親眼見到真身喇！

接daddy放工

daddy少有要在週六回公司，見momo呢排成日送daddy出門口都話想去搵daddy，又話掛住daddy，於是就同佢一齊去接daddy放工。
咁樣一接，又多兩架新車玩...點解可以咁著數o架？

serve food

momo同我玩煮飯仔時，識得serve我，先將食物放在碟上，再端於枱上。然後放好櫈子，再叫我坐好吃。吃完後，會收拾，又再拿杯子裝水(當然是假的)給我飲。好專業喎！

家事小幫手篇之把衣服掛上衣架

洗衣機放/取衣服、掛衣服、摺衣服、將衣服放回衣櫃、將衣服掛上/脫下衣架，全部都難唔到momo啦~

衣服呢個範圍可以做到一條龍服務，放心交晒俾佢都得！

環保相架送媽媽

學校要爸爸同小朋友設計環保相架，hubby就同momo整咗呢個...
唉...hubby以前細個啲美術一定係D,E o架，mcqueen係呀仔鍾意，唔係我呀！仲有...張相同背後張咭，其實係momo上學期學校整o既相架o黎...well...真係夠晒環保 =_="

唔駛一分鐘就整好...都好彩...唔駛為咗囝囝有功課交而自己整番俾自己...

TY 小朋友聚

朝早hubby con call，好彩約咗TY小朋友聚，過咗個愉快bubble time！

復活節假最後一天，hubby夜晚要飛，momo下晝午睡，最終冇出外活動。呢排hubby個個星期都要飛，飛到連momo都話要搭飛機。等momo放暑假，一於飛去搵daddy！

娘家飯聚+拍拖日

momo好鍾意新買番黎o既骨牌車，而且都好鍾意砌，玩到唔捨得出門口。中午娘家飲茶，囝囝同表哥玩車玩得好開心，會主動搵表哥玩，已經唔駛點整佢哋。
飯後帶咗囝囝去6299到，兩老成兩個星期冇見粒孫，放低佢係到玩，我同hubby去拍拖睇戲。睇咩戲？梗係捧家輝場喇！不過，今次佢唔係主角丫~~~

南丫島遊

復活節第二擊︰與Harris進攻南丫島！
一早計劃好假期去離島，長洲、大澳，momo未夠一歲已經去過，而家見佢都可以自己走動，就挑戰一吓南丫島o既山徑...不過，今日momo冇上次去新娘潭咁叻，多咗要扭抱。可能因為天氣太熱，再加上佢跌低擦傷膝蓋，所以都未上山，就已經唔多肯行。結果唔駛兩個鐘o既路程，我哋足足黎個triple！咁當然，Harris都不比momo弱，佢全程都被四圍o既人與物吸引，步速都係緩慢移動。所以，我哋可以係天黑之前上到船番中環真係偷笑...
行到上風力發電站，momo好開心咁玩bubbles。我哋第一次買呢種長型管狀o既泡泡俾佢，估唔到佢已經完全掌握個玩法！的確利害！

與Harris遊西貢獅子會&郵輪碼頭

復活節假首天，約好同房一家一齊去西貢獅子會自然教育中心。成年冇見Harris，已經唔再係bb樣，而且佢身型同身高都直迫momo (阿仔，你大人哋 9個月，但差唔多高，真係細粒成咁？！)。
朝早開完con call o既hubby，到獅子會時又要con call，所以佢都冇乜點行過...而momo亦都主攻滑梯，對啲展館未有濃厚興趣住。呢到等佢大啲，可以再黎過！
參觀完畢，去咗郵輪碼頭玩咗陣。上次我同hubby黎探路，基本上都同啱啱開幕差唔多，冇乜特別設施，但momo對個水柱陣就完全投入，玩到極開心~~~
晚飯去megabox食，再行埋反斗城，搬咗個骨牌番屋企慢慢玩。