排車仔

朝早係附近玩咗陣，lunch係樓下食烏冬，momo自己橫直橫直咁排車 (冇人教過佢咁排...)
天氣唔好又落過雨，留守家中三個齊齊午睡，哈哈哈~ 終於瞓到黃昏時分，餸都冇得買，又落樓下食飯...同momo一齊玩車疊車...
其實車仔都唔係只係推來推去咁玩o既~~~

31 months old

31個月大自己步行教育徑挑戰成功！
上星期行雷閃電又落雹，然後成個星期都唔多好天，終於今日天氣晴朗，可以享受大自然美景。難得momo上山落山路面凹凸不平都冇扭抱，好努力咁自己行晒整段路，大讚！

重要o既係，momo終於唔抗拒街外o既廁所啦，帶佢去都一定去到，同時亦都會表示如廁需要，出街唔駛再帶片喇！如果番學都去到vv o既話，就真真正正戒日片啦~~~

於是乎...daddy買咗三架tomica車俾佢，睇吓佢開心到...

兒童節快樂

唔知momo係咪知道今日佢都係主角，所以又晨咁早六點幾起咗身...見朝早有少少陽光，就同佢去海旁踩吓滑板車，順便食個pancake。momo好主動咁話要自己搽牛油，手勢都唔差，而且完成又好有滿足感咁...哈哈...其實我都唔明兩歲幾都做到o既嘢，可以有港童上小學都唔識要靠人做？！
今日最後一天著冬季校服，拍個照留意一吓啦。放學momo食完飯同咗佢一齊去議員到拎兒童節禮物，男仔啲禮物唔太吸引，又冇momo至愛o既玩具車，再加上佢已經好眼瞓，所以個樣好無奈咁...

外出成功vv

今日上oxford path playgroup，成功係上堂前後帶momo去vv。上星期帶佢去廁所時，我話呢個好似學校嗰個廁所黎喎，佢自己都話好似學校咁，於是順利咁去咗一次。今日一入廁所時，兩次都即去，完全咁扭拎，如果佢連大人廁所都肯企上廁板到vv，咁就真係成功戒日片喇！

睇黎mcqueen貼紙獎勵真係有啲用，定係其實因為大個仔咗呢？

親子復活作品

學校要做親子復活節作品，本來諗住整復活蛋最簡單，但momo又唔多識畫畫，所以就整隻復活兔交功課啦。所有部分都係用環保物料，momo只係需要拼貼兔仔個樣就完成o架啦。呢個小手工絕對符合呢個年紀o既小朋友做，good!

跳舞mo

momo睇住電視做flamingo dance，自己都跳埋一份，勁好笑！其實佢記舞步應該都唔錯o既，睇佢聖誕表演就知...唔知大個啲想唔想學呢？

剝蛋mo

朝早烚咗雞蛋，試吓俾momo自己剝。第一次親手剝，佢做得好好，剝完即刻自己好乖咁食晒，好有成功感，仲話想要添多隻...哈哈~

新買的貼紙簿

樓下商場有兒童書展，早幾日已經買咗幾本新書。今日行過見到有貼紙簿，於是買咗兩本。分別係momo喜歡o既交通工具，同埋動物，預備暑假時去動物園時預習之用。

阿信mo

有人整濕咗地下要做阿信...

陌生廁所的抗拒

其實momo歲半後，在家可以不用片，大部分時間都懂得自行如廁。他知道怎樣穿脫褲子，更會在小便後，自行把小便器的尿液倒掉。既然他知道，亦懂表達如廁的需要，外出時我便不幫他穿片。可是，問題來了！他對陌生的廁所很抗拒，基本上即使尿急帶他去，他都拒絕，有好幾次更立即自行穿回褲子。最後，擔心他忍尿不健康，幫他穿回尿片。
我估計他應該是害怕站在廁板上小便，所以我帶他上廁所，沒一次成功。如果daddy帶他，因為在他面前示範小便，所以都有三數次的成功。
well...應該怎樣做才接受陌生廁所呢？

可唔可以運埋我？

hubby今日又要飛，睇吓momo係到做乜？哈哈哈~~~ 佢一定好想同daddy一齊搭飛機，坐咗係個行李喼入面...

開飯地點新發現

今日陽光普照，打算同momo去行山。計劃到新娘潭一遊，便先到沙田吃午飯。原來regal有好幾間餐廳選擇，人流又不多，真是來對了地方。哈！就這樣，我們join了regal card，以後可以在regal旗下的餐廳大吃特吃了！

吃飽飽想叫momo去洗手間才出發，誰知他又不肯去，最終daddy和他在洗手間大鬥了半個多小時才罷休。離開時momo已開始有睡意，所以最後改去大埔海濱公園玩。momo踩住scooter來回有好幾百米，越來越利害啦！

耗盡能量，在小食店吃過燒賣魚旦後便離開。囝囝一上車即睡，為咗佢瞓耐少少才吃晚飯，去咗青馬觀景台睇日落，哈~

一人一花開花啦

好開心丫！開花啦開花啦！仲要係mami最鍾意o既粉紅色添呀~~~

之前報章報道提過今年o既一人一花好多都唔成功，係最凍嗰幾日都撐唔住凍死，我諗我同momo好好彩，種得大仲要開到花！雖然過咗學校交報告先開到花，但已經非常開心啦！

啟思開放日

momo學校開放日，之前報咗名親子表演，同囝囝一齊唱快樂笑笑。事前都冇乜同佢練習，仲估佢可能到時抱住mami唔放手，唔夠膽上台。諗都冇諗過，音樂一起，佢就拎住咪唱，仲唱得好大聲添o架~ 嘩！真係忍唔住大讚佢叻叻丫！
今日佢仲有daddy爺爺嫲嫲捧場添o架，一啲都冇失禮呀！
班主任都讚囝囝好勇敢，又話佢已經好適應學校生活，越來越識得表達自己，mami我聽到梗係開心啦~~~

食大餐

之前hubby團購咗mira自助餐，趁momo今日學校放假，就即刻黎食。而家momo仲未要俾錢，所以帶埋佢一齊食buffet真係抵晒。一定要係收小童價之前，食多幾次先得丫！

種豆豆

今日接momo放學，見佢手上拎住一杯咁高嘅豆豆。本來我都諗住同囝囝玩種豆，但原來學校已經開始咗，仲已經種得咁高大。要諗諗點樣繼續栽培先得，唔知種唔種到豆豆呢？

自行開關花灑浴

而家同momo沖涼，我都會叫佢試吓自己開關水龍頭。由開始唔知點做，到最近已經充分掌握。好多時我幫佢拎毛巾時，都會將花灑交俾佢，然後叫佢數十就關水龍頭，佢都非常熟練，仲唔會四圍玩水添！

煮飯仔之分享

momo玩煮飯仔，識得將啲食物上碟，然後分派俾啲公仔。整好晒之後，仲好開心咁講咗一句：一人一份。哈哈！佢嘅分享概念都幾好喎！

真的出大牙

今日同momo用杯飲水玩cheers時，佢好開心咁學我飲完一啖，呀~~~ 趁佢心情好，就順勢檢查吓佢啲牙齒，原來上面真係出緊兩隻大牙，用手摸到啲牙肉係腫o既，有少少白色牙齒出咗。下面就未有動靜，如果最後呢四隻大牙出齊，咁momo的乳齒就出晒啦~

山頂遊+道望號

朝早上咗山頂行咗一個圈，momo用scooter都踩咗差唔多一公里。沿路啲途人見到佢玩，都讚佢咁細個踩得好叻！
散完步之後，就同Issac一家一齊去上環食lunch，再去道望號參觀。最初以為好多地方行，但原來今日真係超多人，淨係排隊俾錢都打晒蛇餅。入面又熱又焗，真係暈暈地...好彩hubby負責排隊，我哋就負責選購，唔係都唔知幾時走得...

表弟來訪

表弟傍晚黎咗玩，順便一齊係屋企打邊爐。昨天學校派咗聖誕節表演隻DVD番黎，梗係要俾momo舅父舅母睇吓佢o既表演啦！眼望momo啲同學仔有啲得個企字，有啲望來望去，佢就差唔多跟住老師做到晒啲動作，好認真咁表演，囝囝其實都算叻！

兩老表暫時未算識得一齊玩，但momo就好願意同表弟分享，有時佢見到表弟四圍搞，佢仲會出聲話表弟添，哈哈哈~

白色情人節嘆cake

情人節整咗大餐，白色情人節都買件蛋糕黎應吓節啦！有蛋糕食，最開心嗰個當然係momo！

親子小小運動會

今日學校舉行親子小小運動會，咁難得o既機會可以去學校同momo玩，mami又點可以錯過呢？個個小朋友o既家長都係約定時間報到，隨住園長步向活動位置。小朋友們見到爸媽都非常興奮，當中有啲即喊。而momo呢，我一眼就見到佢企咗起身，望向家長呢邊，係到搵我...一見到我就即刻好開心咁講mami，哈哈哈~

呢一小時o既小小運動會，其實有三個親子比賽。老師將全班分開四組作賽，家長陪同小朋友完成比賽項目。比賽開始前，小朋友排成一行做熱身，嘩~~~ momo好細粒！全班成三十個小朋友，囝囝係最矮嗰幾個...真係好搞笑！

完咗熱身，momo番埋位時開始唔想坐，係咁想去後排家長座到搵我，仲要喊出黎...最後同學仔媽咪讓俾我坐係momo後面，佢即刻要我攬實，well...園長經過都話︰「真係要痴住媽咪...所以小組班我哋唔搞觀課。」

不過，momo都好投入參與比賽，雖然最後我哋嗰組只係包尾得優異獎，但大家都好開心！最緊要見到momo同小朋友相處都好好，我指住啲同學仔問佢叫咩名，佢都差唔多個個答到。呢個仔其實只係平時鍾意嗲住mami，但冇我在場o既時候，都唔會有適應問題。

莫非又出牙？！

呢幾日momo成日食淨嘢，而且又食得慢。好多時食幾啖就開始唔多再‘畢’，就算有佢鍾音嘅餸，食量都比之前少咗一半咁滯。再加上個人容易忟，又多咗扭計，甚至要我‘畢’先肯食，唔通出大牙？

但我問佢有冇痛，佢又話冇。又唔覺佢啲牙有腫，刷牙都冇異樣，真係奇怪……不過，排除病呢個原因，活動正常但冇胃口，最大機會都係出牙仔，再觀察吓啦!

學生與momo

麒麒正式上班後，都未曾碰面。結果是因為他受傷，在休假時順道來探我，還一起接momo放學添！
聽到他工作的點滴和展望，心裡甚是欣慰！

唔驚投幣車啦

momo之前一直都驚會動嘅投幣車，所以佢多數都係坐吓玩，唔會要我哋入錢。有次試過一入錢就驚到攬住落番地。今日有hubby係到，就試吓再俾佢試吓，結果佢好開心，坐完仲想試多次添！

廸士尼酒店遊

今日全日同Issac一齊玩，中午先去廸士尼酒店食飯。唔止momo，其實我都第一次黎酒店，有紀念品店同playroom，又有戶外遊樂場，都幾啱小朋友玩。

去遊樂場放晒電後，小朋友都係車到休息覺覺豬。然後，就去Issac屋企玩tomica停車場兼晚飯。三個小朋友都玩得好開心，Issac同Sophia同momo都幾夾，momo都好肯同佢哋分享玩具！

自己嘆個撻

昨天放學回家已睡，今日補番個兩歲半蛋糕(紫薯栗子撻)俾momo開心吓。果然，佢急不及待咁自己食晒咁滯，哈哈~

30 months old

momo兩歲半啦，番學呢半年真係大個咗好多。雖然上校車仲係喊住叫mami，又成日扭mami抱，但佢自理同家事能力真係相當唔錯，大家見到佢都係讚口不絕，我真係好安慰！(當然佢暗地裏扭計鬧情緒係我自己受晒...哈哈)

身邊好多朋友都懷上第二胎，快要三年抱倆，就今年我已識得多過一打馬B。同hubby傾過，為自己身體打算，都冇意為momo添個弟妹，就讓他當個獨生子。雖然家中冇伴，不過佢有表哥弟妹，將來番學又會識好多朋友仔，都唔會太悶o既~

自砌圓型火車軌

momo鍾意砌呢個tomy車軌，但之前多數一味識得駁長。今日佢同我講要整個circle，俾佢砌吓砌吓得咗，仲即刻擺Thomas去行，拍手讚自己，非常滿足。

Audi車展

話說屋苑信箱收到Audi車展資訊，咁啱近近地係荃灣，於是一早同momo講定帶佢去睇。呢兩日佢朝早起身就會提我哋去睇Audi，果然佢到步見到Audi簡直極其興奮，仲架架都要坐過先肯走。
呢個仔真係有車萬事足o架啦~

被年紀小的小朋友蝦

今日momo係遊樂場玩滑板車的時候，有個歲幾小朋友行過黎搶車，推開momo，仲要撥開佢放係手柄位對手，自己企上車到。囝囝即刻想喊咁撲向我，話想要番架車。個小朋友媽媽見狀，都即刻抱起自己個仔。一抱就即大喊，仲要扭來扭去坐係地，然後又再衝過黎拎。
我同momo講︰小朋友好想玩車，借一陣俾小朋友玩。我哋坐係到食咗茶點先，食完再要番架滑板車。佢最初都唔肯，但同佢解釋小朋友只係玩一陣，然後會還番俾佢。咁momo都聽話，冇再堅持。

momo識禮讓，都會扞衛自己o既物品，但遇著呢啲強搶行為，好多時都唔知點反應。對方唔郁手的話，佢就呆住咁俾人搶咗啲玩具。如果對方動手，就多數會喊啦。佢唔還手，實在係乖仔，不過都要教佢點保護自己先得...

愛護牙齒獎狀

之前完成咗愛牙行動，學校出咗三張獎狀俾momo，仲有牙刷牙膏做獎品添呀~

scooter接放學

今日拎埋滑板車接momo放學，連我自己都覺得好型！最緊要係唔駛再成程抱住！！

顏色分類

好幾個月前教momo顏色，真係教極都係答錯，真係以為佢色盲...到最近佢對顏色o既認知開始有進步，問佢顏色o既問題，都有9成答對。而家用積木做顏色分類已經完成冇問題，哈哈~

自行穿褲

momo已經可以自行穿脫褲子，唔需要mami睇住都可以完成，叻！

熟習scooter運作

入咗天水圍探太婆。連續第二日玩滑板車，momo亦越來越純熟操作，仲可以自己轉彎添！

滑板車到步

hubby昨晚由上海人肉速遞滑板車番黎，今日就即刻帶出去玩。momo係屋企一見到，已經相當興奮，不斷係屋內來來回回。出街帶埋去遊樂場，佢都玩滑板車多過滑梯咁滯。不過，佢一上手真係玩得都幾好，好多人見到佢咁細個識玩，覺得佢叻！

playgroup有新同學

今日天氣都凍，但playgroup啲同學番齊，仲多咗一個新同學。不過，呢個新同學喊咗成半個鐘咁滯，仲要課室屢傳出尖叫聲，唔知會唔會嚇親momo，唔想再番...
好彩佢放學出黎時又笑晒口咁，問佢好唔好玩，佢答好玩。

用學習筷子啦

見momo可以做到勝利手勢，應該小肌肉又靈活咗，就再俾佢試用學習筷子。果然今次可以一用即上手，好開心咁夾晒啲餸黎食 (之前俾佢試過，跟本唔識開合)。我諗用慣咗，懂得手勢後，就可以用普通筷子進食喇！

一人一花第三期報告

今日要交最後一期報告，亦要拎盆栽回校作比賽展覽。係咁凍o既天氣之下，竟然可以生出花蕾啦，雖然係好小的一個，但對第一次種花o既momo黎講，真係好成功呀！

哈哈，可以同囝囝一齊估吓會開咩色o既花，yeah~

Thomas train track

終於開晒所有路軌俾momo玩，真係地方細啲都玩唔到。

第十五個情人節

離不開小情人，所以情人節留在家中預備大餐吃。

其實咁多年我哋都好少會外出用餐，而情人節禮物都好像很久沒有互送了。不過，點都要趁呢個日子煮吓西餐再加個甜品，sweet吓o既~

唔捨得daddy

呢排hubby番工出門口時，momo都會好自覺咁同daddy揮手講bye bye，但當hubby離開之後，就即刻話好唔捨得daddy，想搵daddy。可能hubby放咗成個星期假陪佢，所以想同佢一齊玩。呢個依依不捨嘅口吻，同平時知道要番學，要同mami分別時係一樣的，嗲到成個女仔咁款，所以我拍低咗片，留番呢時回味吓，哈哈~~~

一對一oxford path playgroup

唔知係咪今日天氣太凍，momo兩個同學仔都冇番，即係話老師一對一咁上playgroup。嘩！即刻賺晒！入去課室當然又唔捨得mami，不過佢進步咗好多，warm up一陣我行開就投入咗喇！其實佢都係唔捨得分別嗰吓啫~

寒冬校服look

呢個星期進入嚴冬狀態，momo番下午班都好少少，但風大到咁，出入戴番頂冷帽最好。不過佢唔太鍾意戴，所以冇要佢戴住番學。

又多兩架...

hubby放工帶咗兩架tomica番黎，well...上星期五先買完又買俾momo,睇黎佢已泥足深陷了...

培正結果

收到培正信啦，冇期望之下係rejected。所有結果都出晒lu，最終momo會唔會入讀顯現堂，就要睇之後收唔收到call waiting啦~

12/10 10:15am 荊冕堂士德 (pm waiting)

17/10 3:15pm 顯現堂 (am offer)

19/10 9:30am 綠楊 (rejected)

26/10 10:40am 荊冕堂葵涌 (waiting)

1/11 4:15pm St. Cat (pm waiting)

2/11 9:30am 海濱方方 (冇去in)

2/11 10:00am 荃灣迦南 (冇去in)

2/11 11:00am 嘉言 (冇去in)

2/11 11:00am 根德園 (rejected)

2/11 1:30pm 劍鳴 (waiting)

9/11 3:10pm 學之園 (rejected)

30/11 12:00pm 康傑 (pm offer)

30/11 5:00pm 培正 (rejected)

momo新年假的最後一天

最後一日冇出街，留守家中同幾個舊同事聚吓。Lewis又黎同momo玩，仲帶埋港鐵車軌套裝黎，佢即刻同Lewis爸爸好friend，哈哈！

搬屋買樓的考慮

今日天氣唔多好，就放低momo去6299到玩，我同hubby就去咗睇樓同睇戲拍拖。雖然momo未升上K，但我哋都開始諗定升小問題，所以係時候要考慮居住地區同埋樓宇實用程度。現在的居住地應該會遷出，希望係momo K2時搵到新居所啦!

接daddy放工

hubby見今日好日，就揀今日先番工。咁啱momo仲放緊假，於帶momo去接daddy放工，俾佢睇吓daddy工作嘅地方。出到黎太源街，順便拜訪吓專賣Tomica車嘅鋪頭啦，點知一入去，hubby又買咗兩架cars嘅車仔。兩個月買咗成7架咁多喇！睇黎hubby都中埋tomica毒囉~