全日玩

momo是日因高班旅行，放假一天，於是與mami連走三場，由朝玩到晚。先是朝早到訪Lewis家玩車仔，中午就到表表弟家探訪，下午到黃昏再到婆婆家，和臻臻表弟玩樂。
晚飯時間時，終於不敵周公呼喚，在mami懷裏入睡，好彩食飽飽個肚先咋...回程時借咗表弟架車仔黎瞓咗大半程，最終抱住呢個小朋友到家門前醒咗，仲話要搵表弟，係咁話唔捨得佢...哈哈哈~

遊樂場新相識

momo而家去遊樂場已經唔會係咁搵mami陪佢玩，佢會嘗試同其他小朋友玩，但都唔係個個都一定一齊玩o架喎。不過，如果佢同個小朋友玩開，就係咁會搵/跟住人哋。見到佢同小朋友相處融洽，mami真係好開心。呢日佢仲搵番昨天一齊玩過o既小朋友玩添！

爸媽婚照

屋企牆上有幅爸媽婚照，momo好多時都會指住講︰daddy mami。今日晚飯時，突然同我講︰momo呢？momo係邊到？
到咗小朋友階段，開始識問相入面點解冇自己。我同佢講嗰時未有momo，momo未出世。佢當然繼續問︰點解未出世？我話︰係呀，momo未生出黎，daddy mami結婚後，momo先係mami肚到出世o架。以為佢會繼續問點解，點知佢問︰momo咁可唔可以一齊影呀？我話︰好呀！我哋問daddy，睇吓daddy同唔同我哋一齊影，好冇？

如果佢問自己係邊到黎，可能就要開始性教育啦~

固定遊樂場時間

momo每日放學番黎食完午餐都唔願瞓覺，見天氣秋涼，於是就去平台遊樂場玩個多小時，舒展一吓。有得玩點會唔開心，只係每到晚飯時間會釣魚，好多時未能自行用餐，惟有要mami代勞，然後再回早點入睡，一般八至九時便已進入夢鄉lu。

Daddy birthday之昂坪360

生日除咗去海洋公園有免費入場之外，昂坪360都有免費來回乘坐普通車廂o既優惠，所以朝早食完birthday cake，就出發去坐纜車啦~
momo當然開心啦，仲要一到昂坪巿集，就係禮品店買咗個cable car加入佢o既車仔collection喇！三歲o既momo都好利害，成功挑戰上大佛條長命梯，反而落先要daddy抱，哈哈~~~

momo影相而家好多表情，爸媽反而冇乜特別，都唔知學邊個...

Daddy, happy birthday! We love you so much!!!

參觀屯門消防局開放日

事前播放救火演習片段俾momo睇，已經日日話想去睇消防車，終於等到開放日喇！momo去到已相當興奮，但未到入場時間，已大排長龍，momo顯得十分心急，常問︰得未？不過，一入到去就見到多部消防車停泊任影，即刻冇晒煩躁，哈哈~~~
消防局開放重頭節目係救火演習，momo恨咗幾日想親身睇，可惜不敵周公急call，係演習前數分鐘瞓著咗，唯有...唯有...再等下次開放日先有機會喇！

觀察昆蟲

momo對昆蟲興趣唔算大，有時有蟲有蜜蜂飛過，仲係咁話驚...但如果mami先走近觀察，佢又會減低對昆蟲o既恐懼，願意一同近距離觀賞昆蟲o既活動。

濕疹來襲

momo手腕最近起咗好多點點，有時紅晒，佢又成日R，見到佢都辛苦。最初諗住可能普通敏感，兩三日應該退啦，點知範圍越來越大。whatsapp請教Almen醫生話係濕疹，今日即刻買AI cream搽，希望快啲退，momo冇咁慘慘 ><

親子廚房：奶油脆豬

早前係網上見到奶油豬o既食譜，已經想試整好耐，今日整咗同momo當下午茶一齊食，佢食晒成個都仲想添。可想而知，脆豬包o既魅力真係沒法擋！

好想睇消防車

momo睇乜睇到咁入神？咪就係消防演習示範囉！我同佢講黎緊星期六可以帶佢去參觀消防局，仲有救火演習睇，佢即刻就好開心，不斷重複播放片段，又係whatsapp錄音俾daddy話同佢一齊去，可想而之，佢有幾期待呢！

舞蹈課

第一堂舞蹈課開始啦，因為學校安排係下午班同全日班放學後上課，所以可以同momo係上課前去遊樂場玩一陣先，仲玩到唔捨得去上堂添~
一小時好快過，接momo落堂時問佢開唔開心，佢話開心，再問佢有咩玩，佢就答唔到...究竟係唔識講，定唔想答我？

四老表集合

今日playright係荃灣公園有個遊戲日，諗住四老表一齊去玩。點知我哋先到步見到超級多人，加上太陽勁猛，不宜排長龍去玩一兩個遊戲，真係大人辛苦，小朋友又未必有咁好耐性...於是我哋join埋表哥表妹一齊去表弟屋企玩。momo一見表哥又爸媽都唔駛要咁滯喇，影相仲學晒啲post添~~~

秋遊之塔門

為咗預習一吓年尾旅行o既遠足活動，開始要定期去郊外遊走一吓。今日出征西貢黃石碼頭同塔門，momo o既表現明顯比春夏遠足更佳，已接近全程自己步行。睇黎狀態好o既話，一般少斜上落應該冇問題！

夜晚係葵芳食完飯，去咗臻臻表弟經常幫襯o既甜品店。momo一見啲甜品上枱即刻急不及待係咁狂食，好有潛質可以自己食一份咁滯，哈哈哈~

魚仔都識hide and seek?

momo放學喜愛活動之一係去睇魚缸，最鍾意睇條魚仔有冇'呢埋'。今日俾我哋發現唔止一條個洞入面o架，原來仲有條細啲o既會入去，所以今日momo睇得特別興奮！我諗唔係好多人會留意到呢兩條魚仔識hide and seek，因為魚缸入面有其他比較大條顏色又靚o既魚，但我同囝囝好早就發現咗藍色有一條會經常出入個洞，咁啱今日仲錄咗係電話，momo可以不斷重溫片段！

換呔？！

momo倒吊㗎車做咩？佢話Guido幫手換呔喎...哈哈哈，換呔都唔駛咁高難度㗎？！
事實上，momo玩車又經常睇有關車嘅車，對於車嘅知識，已經不限於類型，就連品牌，結構，生產過程等，都有一定嘅了解。男孩子的世界，就是如此建立的...

幫mami提袋

今日話幫mami拎袋...去到屋企樓下大堂咁多啦...你有呢份孝敬嘅心意，mami已經好感動啦~~~

拿著相機的momo

momo拎住相機就開始不斷按快門，仲會走過黎叫我笑咁影我。暫時相機容易拎過電話，啲相都正常少少，遲啲daddy mami合照靠你喇！

游泳實況

momo上游泳課已經有十三次，每一次都有少少進步。一個咁細個o既小朋友，可以做到水裏呼吸，已經算係叻仔。畢竟都只係三歲，好多時有長者泳客一見囝囝個樣咁細，都讚佢唔驚水，肯聽教練講。

與Lewis共進午餐

食完早餐即刻番屋企幫momo沖一沖個身，然後就去樓下同Lewis弟弟一齊食午餐。今日兩個小男孩好多互動，互相模仿，超搞笑呢~

夜晚去機場接Daddy機，momo終於親眼睇到daddy係閘口出黎，仲即刻衝過去daddy到添~

又在娘家過夜

今日帶momo番婆婆到玩，食埋下午茶先出發，坐momo至愛o既巴士上層第一排睇風景。因為早到咗，就順便去到接婆婆放工，momo仲好乖咁幫婆婆推車。o係婆婆屋企玩車車，又去探小學同學個囝囝，最後momo食緊晚飯時不敵周公急call，釣魚到瞓著...於是mami都冇得走，霸咗公公婆婆張床留宿一晚喇~

momo攝影作

雖然唔識對焦，但momo開始識得拎住電話影相。今日主動叫我俾個電話佢影魚缸啲魚，都算唔錯呀！好啦，俾多啲機會囝囝揸機，等年尾旅行幫爸媽影合照，嘻嘻~~~

提出在校玩

整整一個月過去後，放學接完momo係課室出黎，佢開始提出在學校嘅大肌肉設施玩一陣才離開校園，一玩仲要老師話收拾先肯走。計埋佢行過琴行要彈吓琴，經過魚缸要睇吓魚，每次放學要半小時以上先番到屋企。玩已經成為佢最重要嘅事情，會玩到唔想食飯，等陣食飯，食飯中走去玩...mami又要辛苦說教了，係咪個個小朋友到呢個階段都會為咗玩而廢寢忘食嘅呢？！

momo在學校

學校張貼咗momo最近嘅學習主題，呢個小朋友都幾高曝光率，哈哈！睇相都覺得佢好投入校園生活，要繼續努力丫！

報學校興趣班

momo而家課餘活動係學游水同cambridge english，呢兩樣一定會keep住上。至於其他興趣班，我哋冇乜同佢留意，諗住佢真係有興趣先上。學校上星期尾出咗張興趣班通告，問咗momo想唔想玩，於是幫佢報咗呢樣：

書記首字寫到咁仲估唔估到...

首次牙齒檢查

Mami約咗洗牙，順便帶埋momo檢查牙齒，估唔到囝囝好合作俾牙醫睇，到mami洗牙時又乖。姑娘姐姐俾咗張櫈momo坐低，佢望住mami係張椅到洗牙，只係最初問我係到做乜，當聽到我話：mami講唔到嘢住... 佢就冇再出聲，全程坐定定好安靜咁等到我洗完牙為止。雖然我冇預備玩具俾佢打發時間，但係一個陌生環境，momo表現咁懂事令我好感動！抵獎件蛋糕俾佢做下午茶！

37 months old

3歲後學mami講嘢嘅口吻多咗好多，好多時會對我講番我講過嘅說話...每次聽到，我都覺得呢個小朋友計仔多多，略舉兩三個例子等大家笑吓：
1. 當我哋唔俾momo飲或食嘅飲品或食物，我哋會同佢講呢啲辣嘅，momo唔食。而家遇到佢鍾意嘅嘢食，我哋叫佢分享，佢會話呢啲辣㗎，你哋唔食㗎，我先食㗎。
2. 有時我同佢傾計問佢問題，例如講到佢啲玩具車，我問邊架？佢話咪呢架囉，仲問我…事實我要知道係邊架，所以要問佢名，但佢學咗我講嗰句「仲問我」。
3. 一遇上佢鍾意嘅嘢食有多，佢會食埋爸媽嗰份，仲要話：我試吓味咋嘛！（但係食晒都算試味？）

你話好嬲定好笑呢？

人生第一次的義工︰賣旗去

報名時只係輕輕問咗momo去唔去賣旗，結果佢好鍾意呢個活動！賣旗前一晚我教佢要同路人講：早晨！幫手買支旗呀！結果佢真係自己主動講，而且好積極咁幫手搣啲貼紙旗俾人，爸媽淨係企係身邊陪住佢就得，表現出乎意料之外丫~~~
做完呢次義工，momo話佢好鍾意賣旗，咁等有親子賣旗又報名啦！
完晒活動去咗科學園食飯同玩滑板車，睇吓呢個小朋友幾古靈精怪...

學校生日會

昨天才enjoy完生日會，今日又有得再慶祝！學校每兩個月一次，第一次生日會嘅主角係9月同10月小朋友，momo當然有份啦。唔駛著校服番去，只係食同玩，真係超級開心！

11年9月小朋友三歲生日會

9月小朋友連續第二年一齊慶祝生日啦，因為今次好多mama榮升第二任媽媽，所以冇乜搞手參與，場地食物蛋糕都近乎最後先confirm，好彩大家都玩得開心，只係唔太影到將大合照啫...

雨傘革命下的旺角

一家三口黎到爭取普選運動嘅其中一個場地，親身了解現場環境同氣氛。momo都問咗好多問題，希望你長大後仍能暢所欲言！