TeacherZ聚

暑假完結前，真係特別多同啲現職老師o既聚會。雖然席上得番一個老師，但都冇損我哋呢班當年一齊實習o既student teacher o既感情。

歡迎Ivy離開教學生涯，加入全職媽媽o既行列！又要恭喜Abby快將榮升第二任媽媽！希望下次聚又聽到更多好消息~~~

Linda ee的新居

終於o係暑假完結前約到探訪Linda ee的新居啦~ 雖然只係兩房，但都夠兩個囡囡活動呀。咁當然同佢哋間‘渡假屋’係冇得比o架啦，但至少兩姊妹可以一齊生活，唔駛再成日分開嘛！

ee仲請momo食生日蛋糕添，真係開心死佢~~~

家事小幫手之畢米

家事小幫手又出動啦，今日幫mama畢米煮飯，真係一試愛上，仲會識自己講︰一次 - 即係要求再畢多一次落飯煲到。然後又會自己放番好個量杯同合蓋，非常有手尾！我諗唔駛幾耐，佢學識埋洗米之後，煲飯呢個item就可以交俾囝囝負責啦~~~

今日收到卓思結果︰waiting，咁要努力幫momo報多幾間學校先得...

咀嚼食物

momo越來越鍾意啲飯餸可以咬同o趙，尤其係肉類，佢好鍾意咬粒粒肉。有時剪到啲餸太碎，佢返而唔多肯食，要食大人碗入面啲餸 (其實係一模一樣o既餸)...其實真係件好事，起碼唔駛剪得咁辛苦，而且出街食會方便好多。

食方面已經可以自己搞掂，只要學識埋揸筷子，咁就連粉麵都可以唔駛再剪啦~

開學前聚

momo今日好遲先瞓晏覺，差啲就join唔到舊同事姊妹o既開學前聚啦~ 其實我哋去到佢哋都食完飯啦，我同囝囝真係坐咗陣咋。momo開始每次都係提示下會叫人，雖然有時唔會咁順灘咁講，但係都開始變得肯多說話啦~

希望大家同囝囝都開學順利！

首次吃紅火龍果

 火龍果試過，但紅色火龍果，momo都係第一次食。睇囝囝個樣就知佢鍾唔鍾意食啦~~~

好久不見的中同

舊年年尾諗住聚吓，點知我出席唔到，所以一拖，就拖到今日先有機會見面...足足兩年冇見...上次見已經係Kevin同Clarice o既婚宴，連momo出咗世，佢哋都未見過...

終於全部都已婚人仕，其中三對已有小朋友，仲有一對就快榮升爸媽喇，真係越黎越熱鬧丫~ 希望keep住每年都會見到起碼一次就好啦~~~

第一個K1 interview - 卓思

上午第一次一家三口入戲院睇戲，比起之前套怪獸大學，momo明顯鍾意睇呢套多啲！一開始就不斷講飛機，嘩，好興奮咁。當然，到散場時，佢又係好唔捨得咁，喊晒口係咁話要睇...而我呢，就短短一個月之內入咗三次戲院，哈哈，一係就兩年都冇睇，一睇就咁多次~

下午就同momo去首次K1 interview，呢間係上年報咗N班，但係waiting可以係今年優先面試o既。去到學校登記後，等咗一陣就入課堂。momo一見到枱面有玩具車，已經二話不說咁拎上手玩。呢個時候，我見momo手到仲有自己帶去o既玩具車，就叫佢放番入我個袋先繼續玩。然後老師指住我，問momo係邊個黎。囝囝玩緊車，所以我都出口問佢，咁佢都答咗老師係媽咪。老師再指住hubby問，囝囝就即刻話係daddy。我叫囝囝要排番好啲車車先再玩其他玩具，老師就順勢拎起個漢堡包問佢係乜，囝囝就話係包包，仲即席示範點食...老師再拎匙羮問佢，囝囝就答係羮。跟住囝囝繼續玩車車，老師就問我哋如果上午班額滿，下午班考唔考慮。到最後就俾咗支益力多momo，momo應該唔知係乜，但都接咗，然後我叫佢講thank you同bye bye老師。

離開學校後，hubby就話今日囝囝表現都幾好。我就覺得佢唔驚又答晒老師問題已收貨，只係作為前教師，其實囝囝唔係咁突出，可能好多小朋友都做到，所以最後收唔收都係未知之數...

摸貓貓

下午約咗大學師兄聚舊，佢居企養咗兩隻貓、一隻龜同一條魚。鍾意小動物o既momo有福啦，可以一次過睇到咁多動物。最初佢一見到貓貓就話驚驚唔敢摸，但又好想同貓貓玩。佢好慷慨咁將自己啲車車俾貓貓玩，佢見到貓貓係到撥吓撥吓，即刻好開心咁笑晒。當然，熟習咗之後，佢成功咁摸貓貓，又同貓貓握握手添！

自己玩泡泡槍

今日等到好天可以去平台遊樂場玩一陣，見咁耐冇玩bubbles，就同momo拎支泡泡槍一齊玩。一如以往，囝囝一知道有得玩bubbles就好開心，今日仲好主動咁自己囉住玩。不過，佢仲唔係好夠力控制個板機，所以好多時都係叫我幫手按住。

短暫分離成功

今日要去覆診，所以帶咗momo去6299到，順便就當一次短暫分離o既訓練。道別時，囝囝有想跟住我的意欲，我蹲低同佢講︰「你喺爺爺嫲嫲到玩車車，mama要出去一陣，大約三個鐘就番黎接你。」然後99就拖住佢入番客廳，我就順勢步出大門。而我行至電梯大堂直到步入電梯都冇聽到佢喊聲，應該都算成功！

覆診報告正常，抽血後六星期又再覆診...番到6299到，momo原本正在午睡，我出現係客廳時，佢已睜開雙眼，時間剛好，起碼唔會瞓醒又搵唔到mama。

久違bb車

其實我一向好少用bb車，momo未識行o既時候，都係用揹帶同hip seat多，bb車最多係落樓下超巿買餸時先用。囝囝識行之後，更加係一個月都坐唔到一次咁滯...今日試吓俾佢坐吓出街，又好似好有新鮮感咁，好彩冇扭話唔坐啫...

買melon，等daddy

每次去到超級巿場，momo總係想買西瓜，不過大大個西瓜，我哋兩母子點食到？所以我同囝囝講要等daddy先買，於是佢一提西瓜，都會講等daddy。今日買咗西瓜番黎，但hubby唔係香港，所以momo要再等吓先有得吃啦~

產後首次與hubby到戲院

朝早momo食完早餐就出發去沙田大購物，買左囝囝番學用o既白襪、2歲生日禮物同99飲o既奶粉，然後我哋就放低momo係6299屋企。原意係想係佢番學之前試吓短暫分離，但囝囝一上車就瞓咗，體驗唔到同佢揮手講再見o既情況...

終於肯捨得放低囝囝，兩夫婦去拍拖。揸車入東涌睇戲，揀咗張家輝主演o既《激戰》。呢套戲真係近年香港少有拍得好o既港產片。最初諗住睇家輝為套片鍛鍊o既身型，以為得打拳o既劇情，但原來入面仲有搞笑同溫情o既場面，而且節奏緊湊冇悶場，真係值得一讚！

睇完戲就去6299到食埋飯，再接momo回家。(結果呢個仔瞓醒都係搵mami，唔知番學點算...)

熱情的表弟

買蛋撻去表弟屋企做下午茶，表弟見到momo即刻好熱情咁想摸佢，但囝囝怕咗佢，仲要喊晒搵mami，都唔知點解我呢個仔真係咁細膽，連細過佢o既bb佢都驚...
momo玩咗陣就瞓咗，直至hubby係屋企休息足夠，就揸車接我哋去銅鑼灣食飯，順便去睇Gundam，唔知囝囝大個咗鍾唔鍾意呢啲機械人呢？

戒片褲

雖然momo戒片冇乜新進展，但都間中俾佢著戒片褲，睇吓佢識唔識去咗vv會講。從來唔嫌pat pat污糟o既囝囝，真係瀨咗尿都唔出聲，瀨咗要抹地真係怕怕...其實佢係咪仲未ready呢？

試穿黑鞋

仲有半個月，momo就正式開始讀書生涯啦，睇吓佢已經急不及待試穿黑鞋，唔知係咪好期待番學呢？希望佢好快可以適應校園生活，每天都愉快上學啦~

八號風球在家貼貼

八號風球中午除下，好多人要趕番公司番埋個下晝。momo冇得出街玩，所以係屋企貼貼。之前媽媽會一齊團購番黎o既eva貼畫，囝囝都好鍾意，已經貼咗好幾幅，不過好多時貼完佢又再搣番出黎，所以幅幅都唔完整...

打風前夕

人人都諗住今晚打風明天唔駛番工，所以夜晚個個出街吃飯，樓下間間都餐廳都勁多人食飯。原本可以同埋睿睿一家人吃，但因為momo要係屋企食咗飯先落去，所以睿睿佢哋吃飽飽我哋先到...兩個小朋友只可以見一見面咋...

與Lewis的交流

兩歲之內o既小朋友，仲係比較自我中心，但今日momo都有同Lewis有交流o架！囝囝呢個暑假見睿睿同Lewis最多，所以好多時係屋企佢都會提佢哋兩個個名。

1226之友聚

約咗好耐，re-schedule又再re-schedule，終於都見到面，不過都係唔齊人...大家啲bb都大個咗好多啦，下次齊人o既話，應該要一張大枱先夠坐啦，哈哈~

參加生日派對ss

momo今日有兩場生日蛋糕吃，中午仲又有嘢俾小朋友玩添，不過佢都係唔多同小朋友玩...希望佢兩歲之後開始會結交朋友啦~

其實身邊朋友啲bb大部分都細過囝囝，佢冇乜大過佢o既小朋友一齊玩，唔知番學之後，細b o既佢跟住啲大b會唔會可以學快啲呢？

9月b未識一齊玩...

約咗博博同睿睿相聚，只係呢幾個小朋友都仲未好識一齊玩，或者佢哋本身鍾意o既嘢都唔一樣，所以好難先影到晒三個係同一地點做o既活動...
momo一去到博博屋企，都好唔客氣咁即刻話要玩車車，玩到成地都係車真係好平常。好彩呢個仔都好乖，一般玩完佢都會執玩具。唔係我多數之後都唔俾佢去其他小朋友屋企...

收拾書本

momo自己懂得將小書本放回原來的書套中，好多時一睇完呢啲書仔，就好自然咁擺好，手眼協調都唔錯。

水袖

因為phuket之旅momo用過水袖幾好，所以買咗個mcqueen水袖俾佢游水用。今日係會所游水都用得幾好，希望再過一兩個夏天，連水袖就可以退役，momo可以自由暢泳！

首次到戲院

今日約咗睿睿一齊去戲院睇戲，即係momo人生第一次，亦係我產後第一次...真係兩年都冇入過戲院睇戲...

小朋友啱睇o既梗係卡通片啦，而今年暑假最hit o既一定係怪獸大學，所以即管睇吓呢兩個小朋友有咩反應。

雖然戲院黑漆漆，但momo都唔驚，全程都好留心咁睇，只係去到散場時就出事...唔知係佢覺得好好睇，定唔捨得做完，一抱佢話走，佢即刻大喊話要睇，步出咗戲院仲要不斷指住話要去。一路喊到入番商場，坐低食飯就仲喊。沿途我已經解釋咗俾佢聽，但佢完全唔入耳。反而睿睿佢就好正常咁離開，冇好似囝囝咁...睿睿媽媽話睇戲時又唔覺momo特別鍾意，冇諗過完場時反應係咁...

其實連我自己都唔明，平時一向乖巧o既momo點解會有咁o既情緒反應...係屋企播迪士尼卡通片又唔會咁o架喎...

23 months old

23個月大o既momo去樓下接daddy放工丫！

仲有一個月就兩歲，明顯少咗好多bb話，雖然仲未係可以講到好多句子，但可以表達自己喜惡同意願。

依然鍾意講媽媽抱，但一抱起佢都會講好重，冇力，有時仲會講扭抱抱，真係俾佢笑死...

戒片未有突破進展，似乎要靠番nursery幫手，都冇得迫...

下個月兩歲大就正式要獨自上課啦，希望囝囝好快適應，開心上學去~~~

寶寶歌劇

momo的首次歌劇欣賞︰話說hubby見到藝術節有呢個節目，好快就訂咗飛。最初我以為真係好似opera咁坐觀眾席欣賞，但原來個setting係圍圈坐，表演者係中心到演出。睇完覺得似平時playgroup咁，值唔值就見人見智啦~
之後去咗上環食lunch，餐廳有個corner俾小朋友玩，又有得decorate曲奇餅，所以momo好開心！

與臻臻表弟打邊爐

原本細佬話帶臻臻表弟過黎游水，最後冇黎到，但約埋一齊食晚飯。於是，我哋就揸車去九龍城打邊爐。臻臻今日好乖，成程都冇扭計，仲抱佢都得，反而momo就唔肯俾人抱，一抱佢影相就話要去mama到...

摸肚子

momo今晚係到掀起自己件衫摸自己肚仔，來來回回好幾次，仲覺得好好玩咁，一拉起就係到不斷笑，小朋友真係咁容易就開心，哈！

齊齊整曲奇

今日約好兩個朋友仔黎整曲奇食。momo上次同mami一齊整咗一次之後就好有印象，今次同佢一齊印模時，佢竟然同我講「自己」，唔駛我幫手，仲要有板有眼。雖然有時會有姿勢冇實際，但佢o既自主我好欣賞。
其他兩個朋友仔都玩得好開心，而且大家有得食又有得拎，momo一見有新鮮焗出黎o既曲奇，仲係咁一手一口咁食添，唔知係咪佢覺得自己有份整，所以狂拎~~~