攰到咁瞓？！

呢個小朋友唔瞓晏覺，每次到夜晚食飯就會釣魚，今晚仲咁都瞓著咗，well~

Frozen Christmas

WoW Frozen個場景整好晒，momo放學即刻話唔等daddy，要入去影咗相先！乜真係咁鍾意Elsa同Anna？呢個女皇唔止風靡所有女孩，連男孩momo都話靚，唔怪之得咁受歡迎啦~
其實momo未睇過Frozen，但因為我播過let it go俾佢睇，所以佢對Elsa好有印象，又會成日let it go let it go咁唱。快啲學識唱多啲唔同歌，到時同mami一齊去唱K啦，yeah~

車呔game

上星期係深水埗買咗個車呔遊戲俾momo，放咗係6299屋企，等佢係爺嫲到有多樣選擇可以玩。今日我哋去完街去接佢番屋企，就已經學識點玩，仲教我哋玩添呀~

父子二人的早上

朝早mami要去監考，又係難得o既父子二人時光。今次hubby終於帶咗momo玩咗成朝，仲整咗個museum pass添！呢個小朋友，一跟daddy，又有腸仔食，又有新車，點會唔開心~~~

親子廚房︰甜甜圈黑豆漿包

可愛o既麵包造型，小朋友一定鍾意啦，所以今次同momo一齊整個甜甜圈麵包。剛出爐o既麵包香氣撲鼻，momo竟然逐粒逐粒搣出黎食，真係搞笑~~~

Elsa城堡

momo成日用積木砌城堡，咁啱商場今年係frozen主題，有Elsa個城堡做場景。囝囝每日放學都話要去睇一次，今日仲指住個台話要係入面唱let it go添呀，哈哈哈~

38 months old

最近momo識得嬲人，尤其是故意蝦佢時，更會用手推開，或擰轉面背住人。有時我哋大聲啲話佢，佢會即刻喊俾你睇，仲會講我哋鬧佢。小小三歲人仔，都唔知係學邊個o既？！

今日同兩個同月出世o既妹妹一齊食lunch，佢哋o既媽媽都係FTM，離職前都係同行。得閒可以見吓面，等小朋友玩吓，媽媽們又有得傾吓計~

親子閱讀計劃

學校早前有宗教中心嘅親子閱讀證書獎勵計劃報名表，見書單上嘅書都幾適合momo，而且6本書都係二百幾蚊，就好自然參加咗喇！今日收到啲書同紀錄冊，即刻打開咗幾本黎睇。momo以乎幾鍾意啲新書，bedtime story已經完成一本！

建立城堡

momo對城堡o既概念已充分掌握，而且更可以自己用積木建立複雜o既城堡外型。mami期待你發揮更多創意，創立更多不同類型o既設計！

Disney night parade

好多謝我舊生o既邀請，可以一家三口免費入場玩。不過，我哋唔貪心，主力去睇新o既夜間巡遊 - 有momo至愛o既Mcqueen同Mack，於是等囝囝瞓埋晏覺先出發。
momo進入園區首先被兩架巴士吸引，即刻叫daddy mami幫佢影相。然後，我哋先去禮品店揀定啲禮品，等臨走時再約舊生以折扣價買回家。由於今日係特選週末，紅咭都可以入園，所以園區都比較多遊人。我哋只能係巡遊前去咗睇獅子王show，momo都睇得好投入，完咗仲話唔捨得啲場景...
離場時天已全黑，趕緊搵個靚位睇巡遊，daddy負責買少少嘢食醫吓個肚仔先。momo就梗係心急啦，坐係到等咁耐，就問咁耐有未？！一出場o既係tinker bell，然後有monsters，跟住就係mack同mcqueen啦，belle同mickey and friends就係壓軸。今次呢個parade好靚，唔止momo睇得興奮，mami都好鍾意啲音樂同LED！
雖然momo之後係咁話要再黎disneyland，但等下次再有優惠時，先再帶囝囝來吧！

全日玩

momo是日因高班旅行，放假一天，於是與mami連走三場，由朝玩到晚。先是朝早到訪Lewis家玩車仔，中午就到表表弟家探訪，下午到黃昏再到婆婆家，和臻臻表弟玩樂。
晚飯時間時，終於不敵周公呼喚，在mami懷裏入睡，好彩食飽飽個肚先咋...回程時借咗表弟架車仔黎瞓咗大半程，最終抱住呢個小朋友到家門前醒咗，仲話要搵表弟，係咁話唔捨得佢...哈哈哈~

遊樂場新相識

momo而家去遊樂場已經唔會係咁搵mami陪佢玩，佢會嘗試同其他小朋友玩，但都唔係個個都一定一齊玩o架喎。不過，如果佢同個小朋友玩開，就係咁會搵/跟住人哋。見到佢同小朋友相處融洽，mami真係好開心。呢日佢仲搵番昨天一齊玩過o既小朋友玩添！

爸媽婚照

屋企牆上有幅爸媽婚照，momo好多時都會指住講︰daddy mami。今日晚飯時，突然同我講︰momo呢？momo係邊到？
到咗小朋友階段，開始識問相入面點解冇自己。我同佢講嗰時未有momo，momo未出世。佢當然繼續問︰點解未出世？我話︰係呀，momo未生出黎，daddy mami結婚後，momo先係mami肚到出世o架。以為佢會繼續問點解，點知佢問︰momo咁可唔可以一齊影呀？我話︰好呀！我哋問daddy，睇吓daddy同唔同我哋一齊影，好冇？

如果佢問自己係邊到黎，可能就要開始性教育啦~

固定遊樂場時間

momo每日放學番黎食完午餐都唔願瞓覺，見天氣秋涼，於是就去平台遊樂場玩個多小時，舒展一吓。有得玩點會唔開心，只係每到晚飯時間會釣魚，好多時未能自行用餐，惟有要mami代勞，然後再回早點入睡，一般八至九時便已進入夢鄉lu。

Daddy birthday之昂坪360

生日除咗去海洋公園有免費入場之外，昂坪360都有免費來回乘坐普通車廂o既優惠，所以朝早食完birthday cake，就出發去坐纜車啦~
momo當然開心啦，仲要一到昂坪巿集，就係禮品店買咗個cable car加入佢o既車仔collection喇！三歲o既momo都好利害，成功挑戰上大佛條長命梯，反而落先要daddy抱，哈哈~~~

momo影相而家好多表情，爸媽反而冇乜特別，都唔知學邊個...

Daddy, happy birthday! We love you so much!!!

參觀屯門消防局開放日

事前播放救火演習片段俾momo睇，已經日日話想去睇消防車，終於等到開放日喇！momo去到已相當興奮，但未到入場時間，已大排長龍，momo顯得十分心急，常問︰得未？不過，一入到去就見到多部消防車停泊任影，即刻冇晒煩躁，哈哈~~~
消防局開放重頭節目係救火演習，momo恨咗幾日想親身睇，可惜不敵周公急call，係演習前數分鐘瞓著咗，唯有...唯有...再等下次開放日先有機會喇！

觀察昆蟲

momo對昆蟲興趣唔算大，有時有蟲有蜜蜂飛過，仲係咁話驚...但如果mami先走近觀察，佢又會減低對昆蟲o既恐懼，願意一同近距離觀賞昆蟲o既活動。

濕疹來襲

momo手腕最近起咗好多點點，有時紅晒，佢又成日R，見到佢都辛苦。最初諗住可能普通敏感，兩三日應該退啦，點知範圍越來越大。whatsapp請教Almen醫生話係濕疹，今日即刻買AI cream搽，希望快啲退，momo冇咁慘慘 ><

親子廚房：奶油脆豬

早前係網上見到奶油豬o既食譜，已經想試整好耐，今日整咗同momo當下午茶一齊食，佢食晒成個都仲想添。可想而知，脆豬包o既魅力真係沒法擋！

好想睇消防車

momo睇乜睇到咁入神？咪就係消防演習示範囉！我同佢講黎緊星期六可以帶佢去參觀消防局，仲有救火演習睇，佢即刻就好開心，不斷重複播放片段，又係whatsapp錄音俾daddy話同佢一齊去，可想而之，佢有幾期待呢！