第16個情人節

嘩...hubby原來好神秘咁預備咗紮花係屋企，朝早起身俾momo拎出黎送俾我，真係估佢唔到...
其實情人節我哋都唔主將外出應節消費，所以食個普通o既午餐之後，就同momo去數碼港踩單車。咁啱商場有個自製利是封o既活動，於是一齊設計咗兩個俾momo做今年o既利是封。踩完單車，去埋超巿買火鍋用料，就回家打邊爐。再食埋雪糕同momo係學校整o既桂花榚做飯後甜品，大滿足！

到表哥家

今日下午冇人睇住表哥，所以mami就同momo放咗學出發去表哥家。momo梗係開心啦，可以同表哥玩一晝，但難免玩嘅時候會争，mami要做中間人勸說教導一番，又好快做番好朋友。

家務小幫手之飯後抹枱

momo飯後多咗項小任務，就係負責抹枱。總之係屋企食飯嘅日子，就無間斷咁要佢完成呢項家務。看似簡單，但有時佢食完飯即刻想玩，就會就其咁掃一個圈就算，所以暫時都要係旁邊監工先得。

親子廚房︰手切糯米糍

mami其實好鍾意傳統小食手剪糯米糍，自己整仲一啲都唔難，只要用糯米粉加水，搓成團後隔水蒸熟，最後加啲花生粉剪剪剪就食得！momo用剪刀就應該剪唔到，改用膠刀切吓都仲可以，哈哈~

自助借書

圖書館嘅自助借書機其實幾方便，連momo都好鍾意爭住放圖書去掃個barcode。雖然去櫃枱借書根本唔駛排隊，但我哋每次去都多數用自助機多。

腫咀豬

自己唔小心撞咗去滑板車個輪到，搞到個咀腫咗...

momo今日上完舞蹈興趣班去遊樂場玩時，與同班同學打個同校K3 o既小朋友，仲打到人喊...仲要係佢出手先，我冇諗過佢會係主動o個個...唉...教咗好耐叫佢唔好學人曳，結果自己曳先，我好失望！真係講俾10個人知，9個人都唔會信momo會出手，仲要係主動嗰一個...
成日就人哋做乜，跟住做，我個乖仔去咗邊？！要繼續加強好行為教育先得喇！

兒童單車徑

其實青衣東北公園有兒童單車徑俾小朋友踩單車，不過條單車徑其實得一個圈仔，就算踩住四輪嘅momo都唔夠喉，要去正常嘅單車徑踩，咁唯有跟住係後面，以策安全啦！

提早做節

因為細佬弟婦下星期去旅行關係，是日女家提早團年，約齊人食飯，momo最開心緊係可以同表哥一齊坐玩車啦！

戴口罩防流感

仲有兩個星期就放農曆年假，但最近流感高峰，決定要momo日日戴住口罩上學，以防病患。

41 months old

呢個小朋友番咗半年K1，同啲同學仔熟絡咗，又識到個好朋友，但mami真心覺得佢曳咗好多...成日唔理好醜，總之一同某個小朋友玩，人哋做乜就跟住做，唔順意會動手打人推人尖叫，呢樣真係要好好教導先得。即時停止佢呢啲行為係必須，但鬧起情緒上黎，佢未必肯道歉。不過，之後再同佢傾番，佢會知自己唔啱，會講要做番好會乖。睇黎要不斷提醒再提醒先得...

手指畫

早前買咗兩pack kids' paint番黎，而家可以係屋企做手指畫創作。唔知係咪個個小朋友一有新事物就玩過唔停，所以我一拎啲填字色俾佢點，就點到停唔到手咁滯，哈哈哈~

累極唔願瞓

呢個年紀o既小朋友太鍾意玩，好多時momo番到屋企就即刻衝去啲玩具到玩，午餐都唔食住。就算午餐食完，都繼續係咁玩，好多時見到佢眼瞓，叫佢瞓一陣都唔肯。結果去到五點鐘左右，雙眼已經塌落黎，但都唔瞓，係要捱到晚飯，釣晒魚咁食飯...
睇吓呢個眼瞓樣先︰

喜羊羊@青衣城

momo一見喜羊羊佈置，就即刻行埋去叫mami幫佢影，仲要每隻羊都影晒。幾時開始咁有興趣影相？仲要主動叫人影佢添？！

沙田交通安全城

上完游水堂，去咗沙田regal食lunch，然後入咗交通安全城踩單車。交通安全城平日都對外開放俾公眾使用，只係遇上有團體訂場，先冇得入場。安全城唔算太大，爸媽唔駛要尾隨緊貼照應，momo玩得好開心，而且仲識得係交通燈前停車，叫爸媽過馬路 XD
其實香港都冇乜地方適合小朋友學踩單車，單車徑都係啱大人或者已經識踩單車o既小朋友用。一般公園或者海濱長廊都係禁止踩單車，平日冇乜練習o既地方，所以最多都係周末去遠啲先有機會玩上一個上午或下午。

剪頭髮

momo啲頭髮都有半年冇剪過，前額啲頭髮都長到拮眼咁滯，所以daddy順便一次過剪過新髮型。...好似有啲薯仔...

K1上學期家長日

家長日班主任話momo進步咗好多，冇一開學咁喊，就連放完聖誕長假番學都冇喊，適應得好好。而家鍾意同小朋友相處，只係有時遇到唔開心嘅事，就未必知點表達出黎，呢方面要老師多啲鼓勵。
見完班主任，係學校同另外兩個同學仔玩到去埋公園，再一齊食包飲豆漿先番屋企休息室 XD

K1上學期獎項

今日係上學期散學禮，momo獲得豬肉獎一個，哈哈！放咗學食完飯，就同囝囝搭車去娘家。呢個小朋友又玩到食到過夜，好彩明天家長日唔駛番學，咁都唔駛趕番屋企。

抹窗小幫手

再過兩個多星期就農曆新年，係時候要抹吓啲窗。momo見個抹窗刷，急不及待要幫手，乜真係咁好玩咩？

悠閒的下午@圖書館

momo唔算係圖書館常客，但一個月都總會有一兩次去圖書館歡渡一個下午。囝囝鍾意o係圖書館到睇書，雖然未識認字，都會一本接一本咁打開黎睇，叫mami講故事內容。如果遇晒佢喜歡o既圖書，就會借番屋企一睇再睇。當然，我同佢講咗大本又重o既係圖書館睇得，借番屋企嗰啲盡量細本啲。

幫Daddy拉行李箱

Daddy趕不及回家拿行李箱，momo收到call即刻幫忙由屋企拉到機場快線給Daddy。其實行李箱一點也不輕，但他全情投入的拉，一點也沒有要Mami協助的意思。

四老表齊聚首

約咗表哥弟妹係屋企玩，表哥同細姨先到步，所以momo即刻開心share啲玩具玩個夠，又齊齊整造型包包。男仔都係鍾意車，睇吓啲包有幾多架車 XD
表弟同舅父舅母，表妹同細姨丈就差唔多時間一齊到，兩個小朋友午睡過後叉晒電，黎到玩咗陣就一齊去食飯。momo有得同表哥坐，全程超興奮！

中大醫學院開放日

momo o架單車放咗係私家車車尾箱，所以假日一外出，而地方許可，就可以踩上一個上午或下午。今日朝早要去馬鞍山洗車，所以順便約同房一家聚聚，仲帶埋佢哋一齊入中大踩單車同玩滑板車。然後，我哋就join埋Isacc, Sophia佢哋去參觀醫學院同玩攤位遊戲。momo對啲身體器官標本都好感興趣，問咗好多問題。希望呢份求知慾，可以一直伴住佢長大，將來喜歡繼續探索。

好友廚房︰芝士麻糬波波

上星期hubby收到保良局幼稚園o既電話，K2有位俾momo插班。我哋商量之後，打算轉校，所以朝早去咗交留位費。如果momo依家呢間學校出年全日班有位o既，都可以考慮唔駛轉校，月尾家長日問一問班主任學位安排先。

momo放學又邀請咗同學仔黎一齊玩，今次一齊整芝士麻糬波波，yummy yummy~

家務小幫手之搬衫

摺好自己啲衫，就梗係幫手搬去櫃桶，順便埋入去啦！momo話疊到咁高都可以拎到o架！

ipad最愛聽的歌

家中雖有ipad同samsung tab，但都好少會俾momo用，最多只會開俾佢聽歌仔。而其中佢最鍾意pink fong o既kids songs，一聽就不停咁播o架啦~

學跳繩

呢排momo鍾意係屋企玩玩具車多過去遊樂場，少咗走動梗係冇咁健康啦，所以買咗條繩俾佢試吓學跳，咁起碼係屋企都可以原地咁跳吓做運動嘛！

出車去科學園

學識踩單車第二日，游完水出車去科學園近食lunch兼練習吓。唔知一年後，momo識唔識得踩兩輪，一齊挑戰單車徑呢？

好友廚房：紅莓造型包 & 首次出車

朝早約咗HM一齊整包包，momo話要整熊仔，而HM媽咪就整咗恐龍，兩個都食得津津有味，正！
上星期拎咗單車，momo已經急不及待係咁o係屋企踩吓踩吓，但都仲未掌握到個技巧。終於等到周末可以出外練習，遠征數碼港海傍，同Issac, Sophia齊齊玩。有Daddy指導下，momo識得兩隻腳用力咁去踩，成功學識咗踩輔助輪o既單車啦~

momo與紅葉

每日番學放學都經過，點都要影番張留個紀念o既~

親子廚房：榛子曲奇

係烘焙店買咗啲榛子粉，一於同momo試吓整榛子印模曲奇。有車王嘅印模，啲曲奇一焗完，momo即刻一件接一件咁食，停唔到口，哈哈~

陪睡玩意

momo瞓覺唔一定要陪睡o既用品，但每逢有新玩具、公仔、書本，佢總會攬住黎一齊瞓。由於囝囝暫時都係同床，所以每晚都要陪佢入睡。除非搬屋momo有自己間房，唔係都好難訓練佢自己瞓...可能真係要等到上小學...

momo新車落地

旅行前訂咗部單車俾momo當做聖誕禮物，今日有時間可以去鋪頭拎番屋企喇。momo一見到mcqueen，即刻要坐上去試吓，一於等下星期去出車啦~

大頭自拍

識用手機拍照後，momo今日自己影咗張大相自拍照...哈哈哈~

好友廚房：pizza & 與學生有約

今日放學後與同學仔一齊整pizza食，整完又玩咗成個下晝，但中間兩個小朋友都有爭玩具，momo俾同學仔咬到係咁喊。後來，夜晚沖涼時，發現真係有個紅印，我諗當時momo真係好痛 ><
兩個以前教過嘅學生專程到家樓下吃晚飯聚聚，最後momo獲得一個甜筒吃，開心死佢。

收到NZ寄番黎封信啦

momo差唔多日日都去睇信箱，今日終於收到旅行時寄番屋企o既咭喇，仲係咁話要同daddy講添呀~

自行完成剪貼畫

momo用剪刀開始較靈活，會勇於嘗試自己剪圖案。若圖案稍為複雜，會擔心自己剪爛，就多數求助於mami。不過，張貼呢個部份就掌握得好好，完全可以自己塗漿糊貼於紙上。

40 months old

對於平時只係得mami做玩伴o既momo黎講，邀請同班同學仔上黎屋企玩其實都幾好。同齡點都啱玩啲，當然爭玩具就少不免，但又多啲機會可以學吓點同小朋友分享。如果之後可以再邀請多一兩個同學仔黎玩，應該仲開心添！

友人新居的超大電視

聖誕假期最後一天，約咗Jess拎早前訂咗o既聖誕同週年禮物，順便探訪新居。新居呢個超大電視，打機同睇戲都一定好好享受，哈！不過，對好耐冇見o既小朋友黎講，都係一齊玩玩具吸引啲！

新西蘭之旅 Day 1

Hong Kong -> Auckland -> Christchurch
去Auckland機程要11小時，我哋揀咗下午三點幾出發，諗住momo會係飛機先瞓晏覺，然後食飯後又再瞓過。可惜momo受肚痾影響，係飛機上都痾咗三次。肚仔唔舒服，再加上接連有bb同小朋友係飛機上面喊，佢自己瞓得唔多好，都扭計喊晒口。雖然係咁，daddy話第一次搭long haul o既momo都已經好叻仔。
到Auckland係朝早七點幾，但計番香港時間係凌晨兩點幾，冇乜點瞓過又冇乜冇點食嘢o既momo應該好攰，不過終於到步o既感覺，令到佢開心番少少。影咗幾張相，去完洗手間又好啲啲。原以為轉機時間有兩個多小時，唔駛趕。點知排luggage check都排咗好耐，international同domestic flight又唔係同一個機場，要抱住囝囝，推住行李狂奔。去到其實都已經boarding time，但都冇乜人係閘口，後來囝囝去完洗手間，都仲未boarding，總之唔駛趕得咁犀利啦...
轉機去Christchurch只係一個小時左右，有小食供應，仲有hobbit o既安全demo。囝囝因為冇乜食過嘢，雖然個肚仲係痛，但都食咗塊餅。
落機都已經中午十二點，買咗張vodafone電話咭上網，準備好拎車再去吃午飯。雖然hubby安排咗係機場拎車，但campervan唔係泊係機場o既停車場，要租車公司安排車輛接送到取車處。只不過由我哋打去租車公司到公司架車黎接我哋都真係等咗超過半個鐘有多，好彩囝囝冇因為咁扭計，只係乖乖咁期待住同campervan見面。
Campervan係New Zealand都好流行，有唔少租車公司都有提供。事前我哋揀咗Mighty Campers (International) NZ，價格相對其他公司較低。剛到達取車處，momo肚子痛又要到洗手間。hubby就負責登記和觀看campervan操作介紹短片，再和職員去取車。當所有手續完成後，其實都已經是三時有多...雖然取車處有飲品機和糖果零食機，但不合肚子不適o既momo，只好趕快開車離開機場範圍，到超巿才算。
momo唔舒服，我同佢留係車到休息，起碼隨時都有洗手間俾佢用到。就叫hubby自己到超巿買麵包和晚餐的材料回來，再趕快到holiday park安頓。累極的momo，最終在途中睡著了。到達holiday park時都已是五時，立刻取出材料和用具，到廚房準備晚餐。而hubby則負責campervan的整理。辛苦了整天，又錯過午餐，當然想盡快弄好晚餐吃個夠。但廚房啲電爐火力實在細得可憐，煮個pasta，烚個菜，都搞咗成個鐘...
我同hubby食飽飽，囝囝都未醒，於是留起pasta，清洗餐具，再到浴室洗澡，便早早休息，調節jet lag。直到九時多，momo突然哭醒說肚子痛，到過洗手間後，問佢食唔食嘢，佢話食，hubby就去廚房煮熱pasta俾佢吃。整日都冇乜嘢到肚，又肚痾成咁，終於好好地食到一碗，然後再齊齊瞓天光！

向奇異國出發啦

15&5週年暨momo自然教育露營車之旅 - national park, glacier, fjord, lake, orchard, star-gazing, zoo, farm, glow worm, geothermal park, hobbiton - 上山下海飛天感受攝氏10至30度的南半球國度

早大半年前計劃o既新西蘭之旅開動啦，可幸momo在出發前的半夜退燒了，但仍有肚痾...希望到步後便沒事啦~~~

小天使momo

momo今早仍有發燒同肚痾，所以幫他向學校請假，於是者他便提早放假了。請假時問過老師會有假期功課，可以放在校務處在今天取，故等hubby下午飛回來後，便到學校一趟。
老師除了在袋子裏放功課外，還細心的放了聖誕禮物及一張穿天使服裝的相片。mami一看照片，頓時心頭暖暖，因為momo真是我家的小天使嘛~
momo快啲好番啦，明天要出發去kiwi國啦！

自己執行李

今日momo都未退到燒，胃口差咗，但個人都唔係病到呆晒，好彩今日剛好唔駛番學，可以留家好好抖吓。本來想同momo一齊整曲奇餅，可以明天回校派俾同學仔同老師，但好大機會要請假提早放聖誕 (已經要請兩日假)...
半夜肚仔痛，都去咗兩三次poo poo，到今日下晝都仲有間斷話痛。不過，睇卡通片同玩又好正常，自己執行李時仲好落力。快啲退燒啦，mami 好擔心你...雖然迫你食藥搞到你喊晒口，但mami真係好想你快啲好番，一家開心在外玩個夠！