首次畫班

見cambridge english調咗星期六上堂，就幫momo報吓學校o既畫班試吓，睇睇佢有幾大興趣。今日第一堂上，又有同班同學仔一齊畫，我諗應該唔抗拒掛...但今堂暫時未有作品欣賞...

親子廚房︰櫻花紅豆慕絲綠茶蛋糕

櫻花樹就無緣見到喇，但可以整番個櫻花甜品黎吃，趁吓呢個櫻花熱潮~

與表弟同遊城門水煻

同表弟一齊行山樂，揀咗個易行o既地方 - 城門水塘。好幸運見到幾隻大黃牛，仲有隻bb黃牛，好得意！亦因為未到雨季，我哋仲可以落到平時被水塘淹蓋o既地方，玩吓吹泡泡。兩個小朋友未有足夠能力行畢整個水塘徑，所以中途折返後，便下山吃午餐。

又來交通安全城

momo未識踩兩輪單車之前，最好o既踩單車地方之一，就係交通安全城。地方唔算大，可以圍住圈踩，又唔算多人，所以我哋商量咗該日o既活動係踩單車o既話，通常都會揀呢到。
平時好少同momo一齊影相，睇吓佢其實真係好鍾意mami XD

大愛青瓜豆漿

momo出街最鍾意去食米線，原因係有佢鍾意嘅飲品 - 青瓜豆漿。不過，mami要等佢食埋嘢先俾佢自己叫，一來避免邊食邊飲嘅習慣，二來訓練吓佢自己點餐嘅能力。當然，為咗杯飲品，佢會好有動力咁食快啲食多啲，又會好勇敢咁嘗試自己落單。哈哈，靠自己爭取，點都好飲啲啦 XD

久咳看醫生

momo放完復活假之後唔夠一星期就開始有咳又有痰，本來收咗鼻水，但又再流番，見佢夜晚臨瞓話個鼻塞住咁慘，都係帶佢睇一次西醫。當然，一向抗拒西藥o既momo，食藥又要大作戰一番，所以試轉bb時睇過o既醫生，等佢見醫生時冇咁抗拒。而今次都只係兩支藥水，咁要餵藥都冇咁淒涼...

車迷mo認ABC的方法

momo認字麻麻，基本上問大寫A至Z都唔係100%會答啱，一般人學A for Apple, B for Boy，對momo作用唔大，於是mami為咗迎合佢學習，即管用佢最鍾意o既車黎設計咗啲圖卡，幫佢加深認識。
呢套卡其實都用咗半年，圖卡上面啲汽車品牌標誌，一早已經滾瓜爛熟，對於佢黎講真係輕而易舉，連繫上ABC o既話，應該會快啲上手。如果大家問momo o既話，佢可能係咁答你︰
A is for Audi, Alfa Romeo,
B is for BMW...

打蓋睡地吃飯

bb時期o既momo好多時都會食食吓飯「釣魚」，但大咗已經好耐冇試過，今日終於又重演呢幕搞笑情境 XD

反瞓mo

小朋友反瞓紀錄︰趴著睡兼踢走晒啲被...其實仲有經常瞓瞓吓唔見咗影，原來去咗床尾瞓 XD

與爺嫲同遊城門水塘

中午前與爺嫲一同到城門水塘走走，因兩老未能走遠，只大約步行半小時左右便回程。

情歌天后魚魚做媽媽後首次個唱，連mami都終於捨得放低個仔...一次咁多...去捧場！要勞煩妹妹睇住momo一晚，等完場後即刻接番佢。momo苦等表哥到夜晚十點幾，玩咗一陣就瞓著咗，我哋去到時已經進入夢鄉 XD

挑戰BMX賽道

呢個小朋友第三次黎，見到其他小朋友試較高難度o既賽道，竟然自己提出話要試！真係超大突破，亦反映佢原來不經不覺成長咗，變得膽大亦願意向難度挑戰！真的值得讚許~~~

親子廚房︰唧花曲奇

多謝中學好友招待，momo首次接觸唧花曲奇笑料不斷，暫時都係較適合做印模曲奇多啲。不過，佢好記得上次同貓貓玩過，要帶埋自己隻玩具貓去同真貓玩，實在太可愛 XD

親子廚房︰日式芝士蛋糕

呢個cream cheese蛋糕味道相當唔錯，可惜momo唔太鍾意啲cheese味，只係食咗一塊就收手...何解佢對cheese冇好感呢？明明細個b食薯茸一定要落芝士撈勻食o架...

board game day

是次探訪悅悅之行o既主要目的係玩board game，用以觀察吓momo對棋類紙牌等遊戲o既興趣有幾大。結果，佢好投入咁玩咗三個唔同類型o既game，仲係咁話要買番屋企玩添！睇黎屋企可以唔係淨玩車仔啦~~~

一個蓋o既髮型

雖然未到夏季，但天氣開始熱，加上momo前額啲頭髮太長，所以daddy又操刀剪髮啦，之但係做咩剪到成個蓋咁呢？

克服海浪的恐懼

同表哥表妹到海灘玩沙，有表哥係到，momo終於克服咗對海浪o既恐懼，會行到水邊接觸海水和用水桶裝水，簡直係超大突破！

43 months old

呢個小朋友戒片都差唔多成年咁滯，但仲係每星期或者兩個星期瀨一次尿，次次掛住玩唔去，明明見佢尿急到係到腳郁郁，都仲唔認自己急，係都要玩，結果又瀨。每次提佢都話知道，但一玩又乜都唔記得。我諗冇小朋友好似佢咁...

今日又去BMX park玩strider，開車開始順暢啲，仲玩足成個下晝添！

兒童節之親子大富翁

大富翁相信冇乜大朋友未玩過，但係咁大個棋盤到同埋小朋友一齊玩，就唔係個個都有機會。有見及此，一見青衣城有大富翁80周年活動，我就即刻報名同momo一齊玩。原先諗住一家三口玩，點知daddy要con call，得番母子二人同行。最初驚momo唔肯自己做棋子，但佢好合作咁跟住在場工作人員指示，玩晒一個回合，抵讚！

玩完仲係咁話要買大富翁番屋企玩添，哈哈...除非同大人組隊，唔係呢個game對呢個小朋友黎講都係太複習啦，起碼要上小學先有機會玩到。

一年一度兒童節，又係議員大派禮物o既時間。玩完大富翁之後，同momo去拎免費禮物，例必係揀車...嘩哈哈...仲要咁大盒添~~~

9月小朋友BBQ

好耐冇見呢班momo未夠一歲已經識o既朋友仔啦，終於約到復活節黎個BBQ，可惜momo同mami都病咗唔燒得嘢食，只好自己食完lunch先join埋一齊玩~ 雖然冇BBQ部分，但室外室內都同小朋友玩得咁開心！

親子廚房：滑滑豆腐花

成功自家製豆腐花，momo差唔多食晒二人份，留番好少俾mami...

親子廚房︰黑芝麻花生粉豆渣小丸子

小丸子再encore!
好似cake pop咁食又得，好似丸子串咁食亦得！