daddy朋友聚

假期差唔多都係見mami啲朋友仔，weekend先有機會見吓daddy啲朋友。新年真係會有好多一年見一次o既聚會，而家又好多朋友都有自己o既小朋友，momo又可以趁機認識多啲小朋友，所以mami都好珍惜農曆新年o既假期，就算要派多啲利是都係開心o既~~~

玩配對

新買咗本disney steps to reading, 入面有埋配對咭。因為有佢熟悉o既卡通人物，所以momo成日係咁拉住我要玩配對！

葛量洪號滅火輪展覽館

去探Lewis弟弟，順便去參觀一吓滅火輪展館，仲去埋鰂魚涌公園玩個夠！新年假mami真係一啲都冇偷懶，momo day day都有外出節目o架~~~

人人生日快樂

初七人日，買兩個蛋糕仔黎慶祝吓先！而今日momo終於係冇圖畫幫助下，認到個字啦，呢個幸運兒係︰眼！

中基大聚會

中基大家庭陣容真係越來越鼎盛！如果唔係大家工作咁忙，多啲有聚會o既話，啲小朋友一定好開心！momo今日都玩得不亦樂乎，因為同事會所個playroom實在太大，而且又有兒童保齡玩，真係連我自己都好想再去~

momo見初生bb

BBSS舊同事欣欣個囡囡Eunice出世差唔多兩個月啦，終於約到見面。當然唔少得見埋當年好友同事汶彬個囡囡柔柔啦，但係唔記得要合照...momo係柔柔屋苑會所玩滑梯，又係佢屋企玩玩具，玩到唔捨得走咁滯...期待下次齊人再聚~

獅頭展

上完游水堂去荃灣食lunch，momo見到個獅頭展覽就逐隻影勻晒，呢個小朋友真係好鍾意影相，哈哈~
午餐見個兒童餐送玩具車，所以就叫咗俾momo食。雖然一見到個玩具就已經想開，但都乖乖咁食咗飯，再等mami砌好先玩。

赤口見老友

初三雖然係赤口，不過唔會因為咁唔見啲朋友仔，momo仲同Issac, Sophia一齊玩舞獅添！獅頭、獅身同打鼓都做齊 XD
夜晚去葵芳食飯，加埋個甜牙牙雪糕就very good喇！

滿月煙花夜

早場係樓下睇多啦A夢，momo其實第一次睇叮噹，但佢都睇得好投入，仲話好好睇添！年初二屋苑有舞獅採青同財神派利是，順便趁吓熱鬧先。係屋企休息足夠先出發去daddy上司囡囡o既滿月宴，仲可以一路食一路睇煙花添呀，正！

家人團拜

初一momo帶住自己整o既年糕魚去太婆到食飯，個個都讚佢整得靚！魚仔可愛o既造型，真係送禮自用都咁開心~
夜晚四老表齊集家中拜年，當然不忘每年一影留念啦！

一湊三

今日挑戰高難度，要湊住momo表哥表妹同momo三個小朋友一晝，真係差啲暈低咁滯...
表妹除咗唔係好食嘢之外，其實最乖冇加入戰團。momo係咁跟住表哥玩，但又會兩個爭嘢唔讓，玩到一個嬲一個喊，真係想抖啖氣飲杯水都唔得...
我真係由心敬佩我媽媽，湊大我哋四兄弟姊妹一啲都唔容易，我對住三個半日都差唔多投晒降 ><

momo今年開始可以幫手入利是啦，以後就靠你啦~~~

親子廚房︰椰汁年糕魚

今年新年唔整黑糖年糕，因為momo已經好有製作食物嘅經驗，所以整造型年糕會開心啲。剛好之前學校學習主題係魚類，一於自製椰汁年糕魚黎同親友分享。呢款椰汁年糕全無人工色素防腐劑，魚仔細細，實在氹得大人小朋友歡喜！一蒸完，momo已食咗兩條喇=p

AIA嘉年華

正式放假第一擊，同悅悅去AIA嘉年華齊齊燒錢 XD
入場費之外，樣樣都係錢，玩咗一晝就冇咗幾百蚊。不過，momo玩得開心，仲係臨走前，自己玩咗一次就嬴咗攤位遊戲o既大波波，真係抵番晒，哈哈~

夜晚去接daddy放工，係IFC到見到十二生肖展覽，momo行勻晒逐隻影，幾時咁鍾意自己影相o架？！

第16個情人節

嘩...hubby原來好神秘咁預備咗紮花係屋企，朝早起身俾momo拎出黎送俾我，真係估佢唔到...
其實情人節我哋都唔主將外出應節消費，所以食個普通o既午餐之後，就同momo去數碼港踩單車。咁啱商場有個自製利是封o既活動，於是一齊設計咗兩個俾momo做今年o既利是封。踩完單車，去埋超巿買火鍋用料，就回家打邊爐。再食埋雪糕同momo係學校整o既桂花榚做飯後甜品，大滿足！

到表哥家

今日下午冇人睇住表哥，所以mami就同momo放咗學出發去表哥家。momo梗係開心啦，可以同表哥玩一晝，但難免玩嘅時候會争，mami要做中間人勸說教導一番，又好快做番好朋友。

家務小幫手之飯後抹枱

momo飯後多咗項小任務，就係負責抹枱。總之係屋企食飯嘅日子，就無間斷咁要佢完成呢項家務。看似簡單，但有時佢食完飯即刻想玩，就會就其咁掃一個圈就算，所以暫時都要係旁邊監工先得。

親子廚房︰手切糯米糍

mami其實好鍾意傳統小食手剪糯米糍，自己整仲一啲都唔難，只要用糯米粉加水，搓成團後隔水蒸熟，最後加啲花生粉剪剪剪就食得！momo用剪刀就應該剪唔到，改用膠刀切吓都仲可以，哈哈~

自助借書

圖書館嘅自助借書機其實幾方便，連momo都好鍾意爭住放圖書去掃個barcode。雖然去櫃枱借書根本唔駛排隊，但我哋每次去都多數用自助機多。

腫咀豬

自己唔小心撞咗去滑板車個輪到，搞到個咀腫咗...

momo今日上完舞蹈興趣班去遊樂場玩時，與同班同學打個同校K3 o既小朋友，仲打到人喊...仲要係佢出手先，我冇諗過佢會係主動o個個...唉...教咗好耐叫佢唔好學人曳，結果自己曳先，我好失望！真係講俾10個人知，9個人都唔會信momo會出手，仲要係主動嗰一個...
成日就人哋做乜，跟住做，我個乖仔去咗邊？！要繼續加強好行為教育先得喇！

兒童單車徑

其實青衣東北公園有兒童單車徑俾小朋友踩單車，不過條單車徑其實得一個圈仔，就算踩住四輪嘅momo都唔夠喉，要去正常嘅單車徑踩，咁唯有跟住係後面，以策安全啦！

提早做節

因為細佬弟婦下星期去旅行關係，是日女家提早團年，約齊人食飯，momo最開心緊係可以同表哥一齊坐玩車啦！

戴口罩防流感

仲有兩個星期就放農曆年假，但最近流感高峰，決定要momo日日戴住口罩上學，以防病患。

41 months old

呢個小朋友番咗半年K1，同啲同學仔熟絡咗，又識到個好朋友，但mami真心覺得佢曳咗好多...成日唔理好醜，總之一同某個小朋友玩，人哋做乜就跟住做，唔順意會動手打人推人尖叫，呢樣真係要好好教導先得。即時停止佢呢啲行為係必須，但鬧起情緒上黎，佢未必肯道歉。不過，之後再同佢傾番，佢會知自己唔啱，會講要做番好會乖。睇黎要不斷提醒再提醒先得...

手指畫

早前買咗兩pack kids' paint番黎，而家可以係屋企做手指畫創作。唔知係咪個個小朋友一有新事物就玩過唔停，所以我一拎啲填字色俾佢點，就點到停唔到手咁滯，哈哈哈~

累極唔願瞓

呢個年紀o既小朋友太鍾意玩，好多時momo番到屋企就即刻衝去啲玩具到玩，午餐都唔食住。就算午餐食完，都繼續係咁玩，好多時見到佢眼瞓，叫佢瞓一陣都唔肯。結果去到五點鐘左右，雙眼已經塌落黎，但都唔瞓，係要捱到晚飯，釣晒魚咁食飯...
睇吓呢個眼瞓樣先︰

喜羊羊@青衣城

momo一見喜羊羊佈置，就即刻行埋去叫mami幫佢影，仲要每隻羊都影晒。幾時開始咁有興趣影相？仲要主動叫人影佢添？！

沙田交通安全城

上完游水堂，去咗沙田regal食lunch，然後入咗交通安全城踩單車。交通安全城平日都對外開放俾公眾使用，只係遇上有團體訂場，先冇得入場。安全城唔算太大，爸媽唔駛要尾隨緊貼照應，momo玩得好開心，而且仲識得係交通燈前停車，叫爸媽過馬路 XD
其實香港都冇乜地方適合小朋友學踩單車，單車徑都係啱大人或者已經識踩單車o既小朋友用。一般公園或者海濱長廊都係禁止踩單車，平日冇乜練習o既地方，所以最多都係周末去遠啲先有機會玩上一個上午或下午。