N class last day

rainbow jelly要逐層做，每層要待上一小時，終於昨晚mami頂唔住瞓著咗，完成咗一半，另一半朝早趕工算完成，但就搞到分體咗，唔可以一次過show晒咁多層添...

momo放學番黎，學校派咗全學年o既學習檔案，仲有一個好孩子獎！其實呢個獎只不過係俾家長係屋企評估小朋友表現o既計劃黎，我諗大部分小朋友都有~

N班呢十個月，我相信囝囝都係開心渡過o既，雖然佢係最後一個月先唔再怕同mami分離，會同mami揮手再見上校車，但已經比我預期表現好喇！冇諗過佢係學校氹得咁多老師咁開心，有咁多老師唔捨得佢離開啟思。亦慶幸班上的同學們都很友善，momo亦有喜歡的玩伴，希望有呢一年o既學校體驗，幫助囝囝K1的適應，繼續愉快的幼稚園生活！

明天暑假開始，期待的24 X 7 FTM生活即將展開，哈~ 冇報咩暑期班，因為我一早已計劃好精彩o既活動俾momo o架啦~~~

rainbow jelly step by step

明天是N班的最後上課天---散學日聯歡會，每個小朋友都要帶食物回校分享，事前已同momo預習整啫喱，不過單一o既啫喱都冇乜難度，所以今次整rainbow jelly，祝願各位N班小朋友的未來都色彩燦爛！

體操mo？

一向坐定慢熱o既momo，係屋企會做啲估你唔到o既動作，就好似呢個咁，仲要一路做，一路叫你睇佢，都唔知俾咁反應佢好？！哈哈哈~~~

自行完成拼貼圖&食雞脾

原來momo已經可以不用太多協助，自己跟住指定位置貼上配對的圖案，完成呢款拼貼圖，真係冇諗過佢智能同手眼協調o既發展又跨進一步！

momo放學又係瞓著抱住番黎，醒咗就拎住食人生第一隻雞脾，估唔到又食得幾叻喎！

睇星星

momo仲係bb嗰時就已經開始有睇星星o既習慣，講緊o既係投射係天花板會轉色o既星星燈，仲有音樂播放o架！而家佢識自己開關，所以有時bed time story之後，就自己開黎睇住瞓。
mami期望年尾周年之旅，三人一齊睇真正o既星空！

momo整啫喱

下星期散學禮打算整啫喱回校分享，所以今日放學就同momo預習一吓先。囝囝對盒啫喱粉非常有興趣，一路整一路話要食士多啤梨啫喱。我預備三個玻璃樽，好等囝囝分享食物給爸媽，到時一人一份唔駛爭~~~

不再怕花灑洗頭

自從學游水要係泳池沖身，用花灑照頭淋後，momo唔再怕用呢個方式洗頭啦，仲可以自己都沖到涼添呀，叻仔！

吹頭mo

momo見到mami吹頭又要試埋一份，自己拎住係咁吹自己乾o既頭髮...

變形金剛也是車

原本今天要上游泳課，誰知剛上車，教練打來說取消，於是在荃灣吃早餐，再到悅來坊逛。這裡有間售賣玩具的奇趣天地，櫥窗就是大大的tomica display，這真是不得了！就這樣，momo多了架車回家...

樓下商場這星期開始有變形金剛的展覽，原本對機械人沒興趣的momo，知道transformer也是車的時候，即刻非常雀躍，每次經過都說要看。終於到今天daddy有空可以一起拍拍照，哈哈，自己同optimus truck影得幾開心~~~

嫲嫲生日飯

嫲嫲下星期生日，提前於週末慶祝。我同momo一齊去買蛋糕，叫佢揀一個俾嫲嫲，佢當然會揀自己最愛嘅栗子蛋糕啦~
祝嫲嫲生日快樂，身體健康！

手花

呢個小手工，我認為係N班o既勞作入面最靚之一，momo一落校車就話想除俾我戴~

和mami一起說故事

每晚的故事時間，我都讓momo自己選圖書，他多數來來去去選擇幾本有車子的書。講多了看多了，他都可以自己講講那一頁的事物。當然最搞笑是，他會以不是英文的英文講書中的內容，但間中又可以講到書上一兩句。momo重視故事時間，就算自己眼瞓，或遲了入睡，他大多堅持mami要說故事才罷休，希望這個習慣能幫他喜歡上閱讀啦！

自行於平衡木走動

記得冬天時，momo仍不太敢在遊樂場離開爸媽的視綫，很多時都要我們陪著他嘗試，否則很多設施都不會玩。今天momo不用上課，下午在acb上完oxford path，再到中旅社完成回鄉卡申請手續後，便與他到平台遊樂場玩。估不到囝囝已不用我時時在旁陪伴，可以隨意自己玩樂，就連這個平衡木都可以自己玩上幾次了！真有點他突然長大的感覺呢！

媽媽離開身邊的預感

今天和明天都要到校做TSA助理，由於要早早出門，事前請了99過來照顧momo兩個早上。可這個小朋友的預感太強，mami起床已不動聲色，但他已知道我要離開，即使還未到他的起床時間，就已連聲大哭不讓我離開...最後99帶他到電梯大堂說再見，當電梯關上門後，聽到的都是他喊著叫mami的聲音，究竟這個分離恐懼何時了？
其實momo最多喊五到十分鐘，之後便如常玩耍，只係如果可以笑著向mami揮手再見就最理想了...

N班的最後倒數

仲有最後十天的上課日，momo就完結N班生活啦！呢個小朋友去到最後呢個月先真正適應上學，每日食完午餐同佢講要換衫番學，佢完全冇遲疑，十分合作自己換衫，而且同mami離別都完全冇問題，真係令人鼓舞！只係...十天後的悠長暑假後，就要到新的學校上學，希望他長大一歲後，不用這麼長時間來適應吧！

Daddy節

朝早上游泳課前，momo送學校整o既禮物俾daddy先，仲同daddy講I love you, daddy!
夜晚娘家飯聚，momo同公公婆婆一齊番張靚相~

中大遊樂場

又黎中大玩，原本諗住去番之前玩過嗰個遊樂場，但見個滑梯勁污糟，於是搜尋吓其他地方。好順利就係附近搵到另一個遊樂場，呢到仲有鞦韆玩，成個遊樂場都冇其他人，momo係到跑來跑去，玩得勁開心呢~

世界杯足球

為配合世界杯來臨，daddy一早買咗個世界杯足球俾momo。不過，仲爭件國家隊球衣喎...要支持邊隊好呢？

世界杯之認識國旗

世界杯要開鑼啦，一於順便教momo認識不同國家o既國旗，睇吓呢個小朋友記圖象係咪真係咁灑家先！

自然進入課室

上咗abc oxford path都有四個月，momo今日第一次冇喊住入課室，仲同我揮手bye bye，睇黎佢終於適應環境喇！有時我問佢鍾唔鍾意上teacher ley堂，佢都話鍾意，仲話課室有fire truck玩。只係呢個小朋友，實在成日都想痴住mami，想mami陪佢一齊，所以適應期都比較長。希望到9月K1時，可以再叻仔啲，幾日就唔再喊啦~~~

新車王貼紙

mami團購o既新貼紙終於到貨喇，momo一見到即刻想成張要晒咁滯！呢到咁多張，可以慢慢獎俾囝囝，哈哈~

父親節咭設計

學校要設計父親節咭讓小朋友在校分享，momo當然要畫件daddy最喜歡的曼聯衫送給daddy啦~

整pancake

momo喜歡m記的pancake早餐，今天就一起弄來當茶點吃。

好吃檸檬批

早上下雨，又天陰陰，沒得去遊樂場玩，就去中大走走。momo在main lib前玩滑板車，剛好有另外兩三個孩子也在玩，momo就不斷在跟著轉。小朋友去到哪兒，他也歡樂地跟隨著，那爸媽可以坐在一旁看他玩。
除了滑板車，momo今次試了檸檬批。看他這個開心的樣子，就知道是多好吃啦~~~

太累的小朋友

早起早睡o既momo，再加冇午睡番下午班，當精神同體力透支o既情況下，好多時都會係放學番黎瞓咗，又或者食食吓飯釣魚釣到瞓著。即使學期將近完結，都難於調整。幸好，呢個小朋友可以一瞓到天光，好多時晚上7,8點入睡，都可以到早上7,8點起床，計落都有12-13小時睡眠，應該都好足夠。只係睡醒後要撐足10-12小時，係會攰啲o既...

33 months old

1000日之後，momo開始夜晚都冇濕片啦，睇黎就快可以戒晒片片喇，yeah~ 仲諗住佢可能三歲都未得，但原來只要ready好，就好快掂！
呢個月仲有另一樣進步o既，就係開始識得連線練習喇。當然未可以好順暢咁書寫，但見佢咁用心寫，仲要做完一頁，又想做一頁，真係好認真。希望將來都係咁積極做好功課啦~~~

又黎新車...

daddy又入咗兩架新tomica俾momo喇...囝囝嘅cars家族持續增加！
點解mami冇禮物㗎？買俾個仔又咁順灘...

大扭計

momo以往少有哭鬧的情況，即使有扭計時，都不是無理取鬧的。但最近他可以因為不順心的事，在一個早上，發脾氣次數多達三次，還要不斷講︰唔好！唔好！然後，當然是發癲說甚麼都聽不入耳...
其實大部分都係小事，例如早餐選擇、除褲去小便、要求他拾回跌在地上的東西...等等，總之他覺得不如意，就要撒野一番...那如何處置？
一般就叫他要停止，若不停止便讓他發難完畢，情緒安定後，才講道理，並要求他道歉，及重申下次應如何表現才是好孩子的行為。至於收唔收效，都視乎情況，但肯定他一定有記在心的。因為有時他平靜和我說話的時候，都會講︰我冇扭計呀，我乖呀。今日我......

說到底，momo還是最怕mami唔睬佢，或者冇回應佢，想要mami陪住身邊~

探馬b之二

端午節當然要吃粽子應節啦，momo一見到就好興奮，但都只象徵式吃了一口...然後，在出發探Baby Kaia之前，一家三口在家賞龍舟競渡！momo仲要坐定定睇，非常捧場，仲搞到遲咗去睇bb添...
Baby Kaia剛好小Baby Maris一個月，今日兩個小b拍埋一齊影相時，真係好可愛！momo去到9月小朋友家排訪，很快融入小朋友中一齊玩耍，雖然佢冇份做哥哥，但都同其他升任做哥哥姐姐o既小朋友們一樣，大個咗喇！

今次整咗玫瑰頭飾俾Kaia扮靚靚，嘻嘻~

盪鞦韆進級版

下午同咗99去探太婆，然後番6299到做節。食飯前，momo去樓下公園玩番夠本先！今日自己話要試坐平板鞦韆，第一次坐都算唔錯啦，仲想學隔離哥哥咁向前後fing腳仔，但又未識得平衡，哈哈~